Hiak swak thang rwe
Chongdip

Tongnu bi Thinu le Ringnu

Chong khatle bahak lang pakaangnu. Chong bing ga thinu mak tabe ringnu pon tanu tui kathuknu gaye, kapangnu om bao ga baom nam gaye, khatle ngaisu mak basaan chong katakenu ga kazaknu gaye. Tudannuna bakoi lu chung bina atka rinnu maan ga mi khatna rinswannu basaan bataktanu danga ngaiye, khatle ket basui thangnu unao ga han choi inku katup nge dinu heiya chap na rin nge.

Bung 18.

Tudannu bahak lang kapaangnu maan gana baom bathainu ding zeiye; maanna ningtingnu kasanu nun ding kae rwe. Kapangnu gana theinu bi pemnu make, atiyeda baom baning ga pi mu thangnu bi za pemme. Kasianu hungnu kaan bi, phaang batannu le hung nge, khatle takung maknu nung bi khan lang hung nge. Misa om bao chong ga tui kathuknu gaye; ningtingnu om tuikhun ga lwang swaknu tuiqwa gaye. Sa maknu mi khou mi thot mi mai phaangga, ririak senu ding chongsem bi za maknu ga kasanu make. Kapangnu om mun gana kae kanaanu pon thang nge, khatle baom bao na bwei lang kouwe. Kapangnu om bao ga baom braannu gaye, khatle baom mun ga baom katha lang nam gaye. Tu tu tam tamnu mi om chong ga kasanu sa khok danga ongme; haga misa sung lak pi khut swak lat tamme. Tudannu baom chwannu bi tun natnu maan ga, pot to braannu mi om unao gaye. Ani Pa om meng ga kanatnu basaang in gaye; ririak senu maan ga ha bi lan khutluga saga amlune. Lungsanu om ka amnu ga baom rangkaan nampui gaye; baom baning bi haga basaang kapan danga ongme. Braannu kama bi misa om lungning ga lian towe, atiyeda takungnu kama bi bangiam ta taknu hung nge. Pakhatna ngaisunu kama bi chong katake dabe, haga baom kapangnu khatle baom kazaknu gaye. Misa om katha na naanu kaan bi maan khaang thang ngamme, atiyeda katha kachatnu ding tuna khaang theinu ngamgabo? Kakhan theinu lungning na theinu ga lou khute, khatle ningtingnu mi om kana na haga zongsu nge. Misa om leithwan na baom lang lampui lat thangga, bakung to kataknu mi nun meithaan bi maan pui khute. Baom koi ga kama takka rinnu maan ga baze dan nge, atiyeda mi khat hungluga maan ding zet thei tang nge. Tasaan phaangnu na kae kanaanu ga pi loi thangga, kraan pon ongnu munanu nun ding khok lang swake. Ket basuinu unao ding rangkaan nampui ma lousunu inku raa nge, khatle kae kanaanu ga rangkaan in om inkhaan tatang danga ongme. Misa om bao kraa bina baom bon ga imba nge; baom mun om kraa na maan brumza thang nge. Thinu le ringnu le tongnu om kraan bi amme, khatle haga kriangnu bing na ha om kraa ga salune. Tudannu mei kadounu maan gana kasanu pot ding zaye, khatle ani Pa khouna za thangnu ga louwe. Paangsun mi gana phaangkriang lang hweiye, atiyeda lungsanu gana raza chong na katake. Ong bachamnu rwan khang amnu manpa ga braannu bi ta zaye, atiyeda unao ma inkuga za ta kanu se bachamnu pakhat amme.