Ani Pa na Sung Bing Ding Za Thang Nge
Inkhun bing riangre ta ongnu: kae kanaa lou ding danga bazwan sat ding sanuwe, ningtingnu amnu brumza khatna kazak thangnu sa lu chung bi rwan thweilune, khatle batu rwan ga mi kalaannu om luthop gaye. Twei thangnu chwan ga chapnuna phaang nge: kapangnu khou bwei raza khat tannu danga, katheinu mi sung la tatoga datnu bathuk thang nge, khatle khwa seiga amnu bakoi ding titcha pinuwe.
17 1Dai bazaangnu le diga tui maaknu uilu thiak sa ga, kae kanaana sipnu sa in kadoinu in ma karo inkunuwe. 2Ningtingnu bainpuba gana koi phunnu basa lu chung bi rwan thwei onglune, khatle unao rwan lak pi pot bing ding khok lang swaklune. 3Sendang lang thinzin in gaye khatle sena lang meikhun gaye, atiyeda ani Pa na sung bing ding za thang nge. 4Kasianu chwan tonu mi gana kasianu mun chong ding ngaiye; chong karwaknu gana to basiatnu tongnu ding ngaiye. 5Tudannu lungsianu ding choi banuinu maan ga baom dam thangnu Bating ding insung nge; tudannu mi om braannu lang bi karonu maan ga chong kasem bina dwak laye. 6Batu rwanna mi kalaannu om luthop gaye, khatle naosen rwan om takung ga banu bapa gaye. 7Banemnu chong ga kapangnu lang batik cha make—kaliannu mi lang chong karwaknu mun ga tatoga batik cha make. 8Sian lo ding pinu mi lang, haga meithaan charut danga munu nge; maan pek maan khou pen kaan bi, maan upai lat thanglune diga baning nge. 9Tudannu koi thinlem thangnu maan ga kriangnu chat nge, atiyeda haga leng leng pi rin ongnu maan gana kriangnu baraan ding khok lang swak nge. 10Kapangnu khou bwei raza khat tannu ma, katheinu mi khou twei kadou khat gana sung la tatoga bathuk thang nge. 11Rwan thwei ong maknu manpa gana kasianu langza zong nge, atiyeda kasianu chonglang mi ding bating maitwang bi lang thanglune. 12Basa laak swaknu sahang ding chamnu ga, baom domnu bi ongnu kapangnu ding chamnu makka ma karo inkunuwe. 13Tudannu pakhatna karonu lang bi kasianu ga sa late dabe, kasianu ga baom insung bina impha ni beida pen swak laye. 14Kae kanaa han latnu ga tuikhun baap thangnu danga gaye; atibriakpina lian ga pwak bak maan swakna, haga lou sat ngo. 15Tudannu ririak se maknu ding pi baze thangnu khatle tudannu ririak senu ding koi impu thangnu—bani ni le khatcha toga, ani Pa lang batannu nunne. 16Kapangnu om kut bi ningtingnu lou lang sian amnu ga, pa-aam to lang gabo, maanna thuke nwamnu sung ba maak peida? 17Baraan khatna kaan khangsung bi kriang nge, khatle nau nanao ga riangrenu kaan lang pon thang ongme. 18Sensaak maaknu mi gana kut banaanluga chongren towe, khatle banem lang baman ga pi to lang kabeng nge. 19Tudannu ririak senu ding kriangnu maan ga kae kanaa ding kriang nge; tudannu baom langkon ding kaliannu bacha thounu maan ga to basiatnu talot nge. 20Kadipnu sung amnu maan ga karonu dou laye, khatle kadipnu tongnu amnu maan ga riangrenu bi baklune. 21Tudannu kapangnu ding pon thangnu maan ga baraantoza chung bi sung riangrenu phun nge; Rikrwang ding kachi maknu kapangnu om pa khou karonu ba maake. 22Karonu sung ga bathang thangnu hidan karo danga gaye, atiyeda tasiatnu katha gana baru ding pi thit thang nge. 23Kasianu chwan tonu mi gana sian lo ga inkamga take, atiga justus om lampui ding pi semaan thang nge. 24Katheinu mi gana ningtingnu ding bameithaan bi mu ongme, atiyeda kapangnu om mik ga talei ram bakung tangga kanei thou dam nge. 25Kapangnu basa ga bapa khou sung riangrenu gaye, khatle bating ponnu banu khou kakhaanu gaye. 26Ririak senu ding laaknu ga karo make, baom imphom tanaat maknu briakpina takungnu mi ding bweinu le karo make. 27Tudannu baom chong bing ding lou satnu maan ga katheinu amme, khatle bazaangnu katha amnu maan ga sensaak amnu mi gaye. 28Kapangnu pakhat ting rim rimga ongnu maan ga ningtingnu mi diga chak thang nge; maanna baom mun ding chui thangnu kaan bi, maan katheinu mi danga munu nge.