Seneibü Bouei Maang Takteida
Chem khonsaka kibü: oyophetyo lapbü toje mausiletbü maibou, ngoubüloubü shou thüka damanchühbü khangenbou aei yaangbou, shisi shousi shuong jaishoubouei khun. Hak cheei ditenbü müt to yaangbou souda, ngoubüloubü müt to juong saongaoei tetbü toje aei nepbou souda dogo ngeda, hoba kila kibü lepbou to sosotham mautida.
17 1Oyophetyo yoan lema shenbü chem che khantoje, maanglema kibüa nyak ulangbü denche che shaubü maibou. 2Damanchühbü khangenbouei ngoubüloubü shou thüka khangenlabü, hoba jaisina yoa onat phanlabü. 3Sempak shanga yaüshang ki hoba hon shanga namyaüshang ki, lausikei seneibü Bouei maang takteida. 4Amaibü kümbouei amaibü sembung to ditkuda; yepeijawebü mütei hatlabü lishang to ditkuda. 5Aoei shalebü to nyikula haoei haoeibü kümbou to nyikuda; aoei thushed to olinyola hao ayuktiko aphokulabü. 6Shisi shousi shuong kho jaishou shuongeibü khun ki, hoba shousi shuongeibü soneikangbü kho haoeneibü nyusibou ki. 7Maibü ngüh kho ngoubüloubü müt la apaplepyo, kho ong ayingko yepeijawebü sembung kho yaangbou la aei apaplepyo. 8Besa kho hao la kubou la seikümbü laang che tegü chühenda; hao lae sepeida, hao haükulabü dogo thounouda. 9Aoei shedbü yuklaje haoei sanou lamda, lausikei aoei kho ong ong laulaje haoei thangbou lepbou sepai. 10Juong saongaoei ngoubüloubü müt to tetbü khantoje, hak cheei ditenbü müt to aei haübou souda. 11Ngüha alebü mütei amaibü ong lamda, hoba hao khulimbo kaangbü ngühlangbou che hautilabü. 12Ngoubüloubü müt haoeibü ngoualoua shuokbü khantoje, soan sungan satbü khongthu to shuokbü maibou. 13Aoei maibü shanga amaibü ngaitikulaje, amaibü kho haoeibü chem ka ladangkei asatlabü. 14Oyophetyo jaübü kho dei koutikubü tegü ki, kheijinei kho koutida akhambü ka lemen kho apashi. 15Aoei amaibü to tangtikulaje hoba aoei ngühmaanglanbou to attila, tan nyi pendou kho seneibü Bou la asaopobü ki. 16Ngoubüloubü müt ika nam aila kida, haoei ditletla maang akitei shanga, songsihon jekla lo? 17Thangbouei chalou pendoua sanouda, hoba jaisina kho thushed chaloua shanga bukkei. 18Sensimaang akibü mütei ik shatan theletbü leilabü, hoba haoeibü lepbou shanga theyolanyoda. 19Aoei shedbü sanoulaje haoei oyophetyo sanouda; aoei haoeibü longshang tap danglaje haoei mautibü lamda. 20Kombünongbü maang kibou maibü ahaplabü, hoba khüpeilangbü lishang kibou thushed ka tuonglabü. 21Aoei ngoubü shou buklaje haoei haoeibü lolo maangnoutida; ngoubüloubü shoueibü bou la olinbü akilabü. 22Olinbü maang kho shat semtibü maisho ki, lausikei maangshikbü soushouei lo yuitikuda. 23Amaibü mütei matjembü lam sepeitila shanga, huphanga besa leda. 24Damanchühbü müt thedanga songsihon kida, lausikei ngoubüloubü müteibü nyekei kaodak denshang sühko shoongaida. 25Ngoubü shou kho haoeibü bou la maangnoubü ki, hoba hao bukbü nyu la khauekbü ki. 26Ngühmaanglanbou litibü kho maibü aying, ayingsi haoeneibü tükdebü laüa yaangbou shieikoebü kho aei amaibü. 27Aoei haoeibü ngüh üanglaje haoei hapbüngebü kibou ki, hoba lemenbü soushou kibou kho ditenbü müt ki. 28Semele kibü ngoubüloubü müt ongkei, haoen hao to songsido kibou dogo thounouda; haoei sembung khop alongeilaje, hao damanchühbü tegü chühenda.
