Seneibü Bouei Haoeibü Younak Kümbuda
Maangponei damda hoba seneibü Bouei youlam tangda, kho hehoat ho le khümboa paida, nyek ka takbü lot sühko. Aei kho choba shuong hoba haoeneibü maangpon shanga ki. Üeisanou kho hailabü jeila louda, hoba jembü soushou yeibü kho sangnyu lapbü toje aei maibou.
16 1Maangpona dambü shuong kho müt shangabü ki, lausikei lishang kabü jongaibü kho seneibü Bou ka longda. 2Müt cheeibü lamnyu pendou haoeibü nyeka hinseibü ki, lausikei seneibü Bouei soushou shuong weyoda. 3Kaibü kümsilei shuong seneibü Bou to kushi, hoba kaibü dambü shuong hau kilabü. 4Seneibü Bouei peisilei pendou khoeibü nyekchüh shanga kümbei, amaibü shuong ongkei khonsak chalou shanga kümbei. 5Aoyou maangpona lilibü kho seneibü Bouei mangsenda; maimaitham, haoei alitilabü. 6Üeisanou hoba maanglembü shabü shanga saumei saüla kümda, hoba seneibü Bou to souhat kubüei müt amaibü ka sepeida. 7Müt cheeibü salang seneibü Bou thedanga maiakei longa, seneibü Bouei haoeibü dangbou shuong ongkei hao yoa sangmaia kitida. 8Saopobü yoa shisho kho ngühmai amaibü yoa juongbü toje maibou. 9Müteibü maangei haoeibü salang takda, lausikei seneibü Bouei haoeibü younak kümbuda. 10Chobaeibü sembunga khuthükbü matjem ki; haoeibü sembungei ngühmai to khümbo akulabü. 11Ngühmaibü seret hoba takjin kho seneibü Bou shangabü ki; seret hoba takbü pendou haoeibü kümsilei ki. 12Choba shuongei shabü kümbü kho mangsenlabü ki, aishanga setshang kho saopobüei hau kida. 13Saopobü sembung kho Choba shuongeibü olinbü ki, hoba haoenei ngühmai joyobü müt to sanouda. 14Chobaeibü maangshat kho haibü khuthük hangangbü ki, lausikei songbüdobü mütei kho khauang sotilabü. 15Chobaeibü the ngesakbüa langkei ki, hoba haoeibü onou kho lang sungbabü sangmei tegü ki. 16Songsihon hapbü kho hon tokei aei maibou! Ditenbü pailetbü kho chandinam tokei khaibou. 17Maang tangbü shuongeibü kaoyaülam kho amaibü ka sepeida; aoei haoeibü lam lomda, haoei haoeibü langkei maanglemda. 18Lilibü kho mautibü thedanga louda, hoba yonglam lilibü soushou kho tuongbü thedanga louda. 19Shalebü shuong yoa soushoua yantida müt kho, lilibü shuong yoa soletbü phet kubü toje maibou. 20Aoei ngüh to ngüha leda, haoei maibü haplabü, hoba seneibü Bou to maanglembü müt kho olinbou ki. 21Maangpona songbüdobü müt kho ditenbü dogo lauda, hoba teibü ngühei sungletbü hau kungaida. 22Ditenbü kho khünei kabü müt shanga langkei deikük ki, lausikei ngoubü shuong kho haoeneibü ngoualouabüei dangalabü. 23Songbüdobü müteibü maangei haoeibü ngüh songsihon kümda, hoba haoeibü sembunga sungletbü hau jinyokujan. 24Lai teibü ngüh shuong kho naodei hap ki, soushou shanga teibü hoba lo shanga shat semtilabü. 25Müt che thedanga maiakei dogo chühenbü lam che ki, lausikei khoeibü khei kho haibü lam ki. 26Kümkaleibü müteibü mühei haibüei hao shanga kümda; haoeibü mühei haibüei hao shieida. 27Jim akibü mütei amaibü thuada, hoba haoeibü sembunga suibü wan ki. 28Shedbü kümbü müt ka oyophetyobü longda, hoba nyikubü mütei thangbou shuong janyinkuda. 29Ikoksimbü müteibü haoeibü lepbü suletan, hoba amaibü lama hao leida. 30Aoei haoeibü nyek ngepda, haoei shedbü thamtham lamda; aoei haoeibü sembung thipda, haoei amaibü kümbo lamlean ki. 31Khuthu phambü kho soneikangbü khun ki; kho saopobü lama hapda. 32Hau kibü müt toje lounyu natenbü müt maibou, hoba sangnyu langsenbü müt toje haoeibü soushou songdakbü müt maibou. 33Phaang kho khukua pakda, lausikei khoeibü matjem pendou kho seneibü Bou ka longda.
