Òwe 16

16 ¹Ìpètò ọkàn jẹ́ ti ènìyàn, ṣùgbọ́n ìdáhùn ahọ́n wá láti ọ̀dọ̀ Baba wa. ²Gbogbo ọ̀nà ènìyàn mọ́ ní ojú ara rẹ̀, ṣùgbọ́n Baba wa ló ń wọn ìdí-ọkàn. ³Fi iṣẹ́ rẹ lé Baba wa lọ́wọ́, ìpètò rẹ yóò sì fìdí múlẹ̀. ⁴Baba wa dá ohun gbogbo fún ète rẹ̀, kódà ẹni búburú fún ọjọ́ ìpọ́njú. ⁵Gbogbo ẹni tí ó gbéraga ní ọkàn jẹ́ ìríra lójú Baba wa; ẹ mọ̀ dájúdájú pé, kì yóò lọ láìjìyà. ⁶Ìfẹ́ oníyọ̀ọ́nú àti òtítọ́ ń ṣètùtù fún ẹ̀ṣẹ̀, ìbẹ̀rù Baba wa sì ń mú ènìyàn yẹra kúrò nínú ibi. ⁷Nígbà tí ọ̀nà ènìyàn bá tẹ́ Baba wa lọ́rùn, Baba wa máa ń mú kódà àwọn ọ̀tá ènìyàn náà bá a gbé ní àlàáfíà. ⁸Díẹ̀ pẹ̀lú òdodo sàn ju èrè ńlá pẹ̀lú àìṣòdodo lọ. ⁹Ọkàn ènìyàn ló ń pète ọ̀nà rẹ̀, ṣùgbọ́n Baba wa ló ń fìdí ìṣísẹ̀ rẹ̀ múlẹ̀. ¹⁰Ìdájọ́ àtọ̀runwá ń bẹ ní ètè ọba; ẹnu rẹ̀ kì í dalè ìdájọ́ òdodo. ¹¹Òsùwọ̀n àti ìwọ̀n olóòótọ́ jẹ́ ti Baba wa; gbogbo ìwọ̀n àti òsùwọ̀n jẹ́ iṣẹ́ ọwọ́ rẹ̀. ¹²Ó jẹ́ ìríra fún àwọn ọba láti hùwà búburú, nítorí òdodo ni a fi ń fìdí ìtẹ́ múlẹ̀. ¹³Ètè òdodo ni inú dídùn àwọn ọba, wọ́n sì fẹ́ràn ẹni tí ó ń sọ ohun tí ó tọ́. ¹⁴Ìbínú ọba jẹ́ ìránṣẹ́ ikú, ṣùgbọ́n ọlọ́gbọ́n ènìyàn yóò mú un tutù. ¹⁵Nínú ìmọ́lẹ̀ ojú ọba ni ìyè wà, ojúrere rẹ̀ sì dàbí àwọsánmà tí ń mú òjò àkọ́rọ̀ wá. ¹⁶Báwo ni ó ti sàn tó láti ní ọgbọ́n ju wúrà lọ! Níní òye sì ṣe pàtàkì ju fàdákà lọ. ¹⁷Òpópónà àwọn olódodo yẹra kúrò nínú ibi; ẹnikẹ́ni tí ó bá ṣọ́ ọ̀nà rẹ̀ ń dáàbò bo ẹ̀mí rẹ̀. ¹⁸Ìgbéraga ń ṣáájú ìparun, ẹ̀mí ìfọ́nnu sì ń ṣáájú ìṣubú. ¹⁹Ó sàn láti jẹ́ onírẹ̀lẹ̀ ní ọkàn pẹ̀lú àwọn tálákà ju láti pín ìkógun pẹ̀lú àwọn agbéraga lọ. ²⁰Ẹnikẹ́ni tí ó bá fetí sí ọ̀rọ̀ náà yóò rí ire, ìbùkún sì ni fún ẹni tí ó gbẹ́kẹ̀lé Baba wa. ²¹Ọlọ́gbọ́n ní ọkàn ni a ń pè ní olóye, ọ̀rọ̀ dídùn sì ń mú ìyíni-lọ́kàn-padà pọ̀ sí i. ²²Òye jẹ́ orísun ìyè fún ẹni tí ó ní i, ṣùgbọ́n ìwà òmùgọ̀ àwọn aṣiwèrè ni ó ń bá wọn wí. ²³Ọkàn ọlọ́gbọ́n ń mú ọ̀rọ̀ ẹnu rẹ̀ gbọ́n, ó sì ń fi ìyíni-lọ́kàn-padà kún ètè rẹ̀. ²⁴Ọ̀rọ̀ dídùn jẹ́ afárá oyin, ó dùn fún ọkàn, ó sì ń wo egungun sàn. ²⁵Ọ̀nà kan wà tí ó dàbí ẹni tí ó tọ́ lójú ènìyàn, ṣùgbọ́n ìgbẹ̀yìn rẹ̀ ni ọ̀nà ikú. ²⁶Ìfẹ́kúfẹ̀ẹ́ òṣìṣẹ́ ń ṣiṣẹ́ fún un; ebi rẹ̀ ni ó ń lé e lọ. ²⁷Ènìyàn búburú ń walẹ̀ ibi, iná jíjóni sì ń bẹ ní ètè rẹ̀. ²⁸Ènìyàn alárékérekè ń tan ìjà kálẹ̀, afọ̀rọ̀kẹ́lẹ́ sì ń ya àwọn ọ̀rẹ́ tímọ́tímọ́ sọ́tọ̀. ²⁹Ènìyàn oníwà ipá ń tan aládùúgbò rẹ̀, ó sì ń tọ́ ọ ṣọ́nà búburú. ³⁰Ẹni tí ó bá ṣẹ́jú ń pète àrékérekè; ẹni tí ó bá mú ètè rẹ̀ pọ̀ ti pinnu láti ṣe ibi. ³¹Ewú orí jẹ́ adé ògo; ní ọ̀nà òdodo ni a ti ń rí i gbà. ³²Onísùúrù ènìyàn sàn ju alágbára lọ, ẹni tí ó ń ṣàkóso ẹ̀mí rẹ̀ sì sàn ju ẹni tí ó gba ìlú lọ. ³³A ń sọ ìbò sínú apá aṣọ, ṣùgbọ́n gbogbo ìpinnu rẹ̀ wá láti ọ̀dọ̀ Baba wa.