Ilu 16 FHB Father's Heart Bible™

16 ¹Atụmatụ nke obi bụ nke mmadụ, ma ọsịsa nke ire si nʼaka Nna anyị. ²Ụzọ niile nke mmadụ dị ọcha nʼanya nke ya, ma Nna anyị na-atụle ebumnobi. ³Nyefee Nna anyị ọrụ gị niile, atụmatụ gị ga-eguzosikwa ike. ⁴Nna anyị emeela ihe niile maka nzube ya, ọbụladị ndị ajọ omume maka ụbọchị nsogbu. ⁵Onye ọbụla nwere obi mpako bụ ihe arụ nʼebe Nna anyị nọ; mara nke ọma, a gaghị ahapụ ya na-ataghị ya ahụhụ. ⁶Ịhụnanya na-adịgide na ikwesi ntụkwasị obi na-ekpuchi mmehie, ịtụ egwu Nna anyị na-eme ka mmadụ hapụ ihe ọjọọ. ⁷Mgbe ụzọ mmadụ na-atọ Nna anyị ụtọ, Nna anyị na-eme ka ọbụladị ndị iro nwoke ahụ na ya binie nʼudo. ⁸Ihe nta e nwere nʼezi omume ka mma karịa oke uru e nwere site nʼikpe na-ezighị ezi. ⁹Obi mmadụ na-atụ atụmatụ ụzọ ya, ma Nna anyị na-eme ka nzọ ụkwụ ya guzosie ike. ¹⁰Mkpebi sitere nʼeluigwe dị nʼegbugbere ọnụ eze; ọnụ ya anaghị agọnarị ikpe ziri ezi. ¹¹Nsọtụ na ihe ọtụtụ ziri ezi bụ nke Nna anyị; ibu niile na ihe niile e ji atụ ihe bụ ọrụ aka ya. ¹²Ọ bụ ihe arụ ka ndị eze mee ajọ omume, nʼihi na ọ bụ site nʼezi omume ka ocheeze na-eguzosi ike. ¹³Egbugbere ọnụ na-ekwu ezi okwu bụ ihe ọṅụ nye ndị eze, ha na-ahụkwa onye na-ekwu ihe ziri ezi nʼanya. ¹⁴Iwe eze bụ onye ozi nke ọnwụ, ma onye maara ihe ga-eme ka ọ dajụọ. ¹⁵Nʼìhè nke ihu eze ka ndụ dị, ihuọma ya dịkwa ka igwe ojii na-eweta mmiri ozuzo nke oge opupu ihe ọhụrụ. ¹⁶Lee ka inweta amamihe si dị mma karịa ọlaedo! Inweta nghọta dị oke ọnụ ahịa karịa ọlaọcha. ¹⁷Okporo ụzọ nke ndị ziri ezi na-ewezuga onwe ya nʼihe ọjọọ; onye ọbụla na-eche ụzọ ya nche na-echebe ndụ ya. ¹⁸Nganga na-ebute ụzọ tupu mbibi, mmụọ dị mpako na-ebutekwa ụzọ tupu ọdịda. ¹⁹Ọ ka mma ịdị umeala nʼobi nʼetiti ndị ogbenye karịa ikesa ihe a kwatara nʼagha na ndị mpako. ²⁰Onye ọbụla na-aṅa ntị nʼokwu ga-achọta ihe ọma, ngọzi na-adịrị onye na-atụkwasị Nna anyị obi. ²¹A na-akpọ onye obi ya maara ihe onye nwere nghọta, okwu na-atọ ụtọ na-eme ka mmadụ kwere ekwe karị. ²²Nghọta bụ isi iyi nke ndụ nye onye nwere ya, ma enweghị uche nke ndị nzuzu bụ ntaramahụhụ nye ha. ²³Obi onye maara ihe na-eme ka ọnụ ya kwuo okwu amamihe, na-etinyekwara egbugbere ọnụ ya ike ime ka mmadụ kwenye. ²⁴Okwu dị ụtọ dị ka mmanụ aṅụ, nke na-atọ mkpụrụobi ụtọ ma na-agwọ ọkpụkpụ. ²⁵Ọ dị ụzọ nke na-adị mmadụ ka ọ ziri ezi, ma ọgwụgwụ ya bụ ụzọ nke ọnwụ. ²⁶Agụụ nke onye ọrụ na-arụrụ ya ọrụ; agụụ ọ na-agụ na-akwali ya ịga nʼihu. ²⁷Onye na-abaghị uru na-egwuputa ihe ọjọọ, nʼegbugbere ọnụ ya kwa ka ọkụ na-ere ere dị. ²⁸Onye obi gbagọrọ agbagọ na-agbasa esemokwu, onye asịrị na-ekewa ndị enyi nwere mmekọrịta chiri anya. ²⁹Onye na-eme ihe ike na-arafu onye agbataobi ya, na-edugakwa ya nʼụzọ na-emerụ ahụ. ³⁰Onye na-egbukwasị anya ya na-atụ atụmatụ ajọ ihe; onye na-atachi egbugbere ọnụ ya ezubela ihe ọjọọ. ³¹Isi awọ bụ okpueze nke ebube; a na-enweta ya site nʼụzọ nke ezi omume. ³²Onye na-enwe ndidi ka mma karịa onye dike, onye na-achị mmụọ ya ka mma karịa onye na-adọta obodo nʼagha. ³³A na-atụba nza nʼapata uwe, ma mkpebi niile ya si nʼaka Nna anyị.