Jongaibü Hanbüei Maangshat Sepeikuda
Ho le ngüh laubü lam shanga ki. Jongaibü hanbü cheei maangshat sepeida, lausikei ngüh kaangbüei ange shouentida, hoba jembü chalou ka loubü ngüh kho olinbü ki. Seneibü Bou nyek lan pendoua ki dogo nyibou lauda, hoba sanou yoa shaubü shaang kho mangsen yoa shaubü shangnabü masu toje aei soumotida.
15 1Jongaibü hanbü cheei maangshat sepeida, lausikei ngüh kaangbüei ange shouentida. 2Songbüdobü shuong tongde hapbüngebü maiko lenda, lausikei ngoubü shuong sembungei ngoualouabü phinthonda. 3Seneibü Bou nyek lan pendoua ki, amaibü hoba maibü shuong to lombo kida. 4Tongde hanbü kho langkei bu ki, lausikei tongde asaopobüei soushou maangshikda. 5Ngoubou jembü bou ngühkhüm mangsenda, lausikei aoei tangtikubü jungeida haoei damanchühbü ki. 6Saopobü mütshuong chema nyaksinam juong ki, lausikei amaibü shuong longbüei khonsak künda. 7Songbüdobü shuong sembungei hapbüngebü lintida, lausikei ngoubü shuong maangpon kho tegü aying. 8Amaibü shuongeibü lembü kho seneibü Bou shanga mangsenbü ki, lausikei maang tangbü shuong welaubü kho haoeibü olinbü ki. 9Amaibü shuong lamnyu kho seneibü Bou shanga mangsenbü ki, lausikei saopobü shijung lambou to haoei sanouda. 10Lamnyu satbü shanga aeibou tangtikubü ki, hoba aoei tangtikubü mangsenda haoei hailabü. 11Hee hoba Mautishang kho seneibü Bou thedanga longeian ki; müt pendoueibü maangpon kho aei lai lai longeian ki! 12Nyikubouei tangtikubü to asanouda; haoei songbüdobü shuong jungto ahaulabü. 13Maang olinbüei thenyek olinbü kümda, lausikei maang maangmaubüei soushou maangshikda. 14Ditenbü maangponei hapbüngebü lamda, lausikei ngoubü shuong sembungei ngoualouabü shauda. 15Khonkutibü shuongeibü chalou pendou kho amaibü ki, lausikei maang olinbü kho athakko lem haibüa ki. 16Nyaksinam juong hoba khonsak yoa kibü toje, seneibü Bou to hatan shisho kibü maibou. 17Sanou kibüa pikshik shausiyung kho, mangsenbü yoa masu amenbou toje maibou. 18Khauang hangbü mütei oyophetyo shouentida, lausikei khauangla maangyangshobüei oyophetyo temau yeitikuda. 19Haulohaushedbü lamnyu kho jak ba tegü ki, lausikei maang tangbü shuong lamnyu kho lenglengtham kaoyaülam ki. 20Songbüdobü shouei bou olinbü kümda, lausikei ngoubü mütei jembü nyu mangsenda. 21Sensimaang akibü müt shanga ngoualouabü kho olinbü ki, lausikei ditenbü mütei lamnyu tangsheitham to paida. 22Dambü akilonga huon shuong athükda, lausikei damanchühbü shuong juong yoa haükuda. 23Müt cheei jongaibü maibü lenko olinda, hoba maibü chaloua laubü ngüh kho lai maibou! 24Langkei lamnyu damanchühbü müt kuito leida, phanga kibü hee ka hao sepeida. 25Seneibü Bouei lilibü shuongeibü chem leilukuda, lausikei haoei latnyueibü leilang maanglemda. 26Amaibü shuong thounoubü kho seneibü Bou shanga mangsenbü ki, lausikei onoubü ngüh kho saopobü ki. 27Kümsilei amaibü mangsühbouei jembü chempen shanga khonsak künda, lausikei besa mangsenbü haoei langlabü. 28Saopobü mütshuong maangponei ai jongaila dogo thounouda, lausikei amaibü shuong sembungei amaibü phinthonda. 29Seneibü Bou kho amaibü shuong ka lounyu hean ki, lausikei haoei saopobü shuong welaubü ditkuda. 30Nyek ngesakbüei maangpon olinda, hoba ngühlang maibüei lo shanga moli phatko kuda. 31Langkei kubü tangtikubü to ditbü nou kho songbüdobü shuong yoa kilabü. 32Aoei ngühkhüm to aditku, haoei himshuong mangsenda, lausikei aoei hakbü to ditda, haoei ditenbü pailetda. 33Seneibü Bou to hatbü kho songsihon ngühkhüm ki, hoba himshuong yantibü kho soneikangbü thedanga ki.
