Uphungu wa Baba wathu Usalimira
Usiwa na uxamwali, kulongwa mwakusaya kubisa: cuma cisathimizira axamwali, pikhali abale a munthu wakusowa ene asan'thawa. Pabodzi na pyenepi pali kudzitonga, thangwi nzeru isacitisa munthu kucedwa kuipirwa, ndipo kudumpha kuphonya kusacemerwa ulemerero wace. Kupereka kuna anyakusowa ndi kukongesa Baba wathu.
19 1Ndi mwadidi munthu wakutcerenga anafamba mu ulungami wace, kupita ule ana mafala akupindika mbaali dzemwa. 2Pontho, kufuna kwakusowa cidziwiso nkhabe kudidi, ule anacita mwakucimbiza asaperewa njira. 3Udzemwa wa munthu usafudza njira yace, mbwenye ntima wace usaipirwa na Baba wathu. 4Mpfuma isathimizira axamwali azinji, mbwenye nyakutcerenga asalekaniswa na xamwali wace. 5Mboni ya uthambi nkhabe kukhonda kutcunyuswa, ule analonga maunthambi nkhabe kupulumuka. 6Anthu azinji asasaka kukomerwa ntima na munthu wakupasa, pontho onsene ndi axamwali a ule anapereka miyoni. 7Abale onsene a nyakutcerenga asan'wenga; mphapo axamwali ace asankhala kutali kakamwe na iye! Iye asaacemera, mbwenye iwo aenda kale. 8Ule anakhala na udziwi asafuna moyo wace; ule anakoya kubvesesa anagumana pyadidi. 9Mboni ya uthambi nkhabe kukhonda kutcunyuswa, ule analonga maunthambi anafudzika. 10Umaso wakukhala mwadidi nkhabe kuthema kwa dzemwa—kakamwe nee kwa ntumiki toera kutonga ana a mambo. 11Nzeru za munthu zisancitisa kukhala wakudembuka kuipirwa, mbiri yace ndi kulekerera madawo. 12Ukali wa mambo uli ninga kudzumunya kwa nkhalamu, mbwenye kufuna kwace kuli ninga mame pa tsanga. 13Mwana wakupusa ndi kufudzika kwa babace, kuketesana kwa nkazi kuli ninga kudonola kwakukhonda kumala. 14Nyumba na mpfuma ndi unthaka wakubuluka kwa ambuya, mbwenye nkazi wanzeru asabuluka kuna Baba wathu. 15Unyolo usabweresa kugona kukulu, munthu waulesi anabva njala. 16Ule anakoya matongero asakoya umaso wace; ule anapwaza njira zace anafa. 17Ule anapasa anyakutcerenga asabwereketsa kuna Baba wathu, Baba wathu anam'bwezera thangwi ya pidacita iye. 18Sandzaya mwanako mukhalipo cidikhiro, leka kuikha ntima pa kufudzika kwace. 19Munthu wa ukali ukulu asafunika kulipa; thangwi ungampulumusa, unadzacita pontho basi. 20Bvesera uphungu, mbutawira kusandzaywa, toera ukhale wanzeru mu ntsiku zinafuna kudza. 21Masasanyiro ndi mazinji muntima mwa munthu, mbwenye uphungu wa Baba wathu ndiwo unadzalimira. 22Cinafunika mwa munthu ndi kufuna kwa cibverano, nyakutcerenga ndi mwadidi kupita nyakuthambi. 23Kugopa Baba wathu kusatsogolera ku umaso, ule anakhala naku asapuma mwakukwana, mbakhonda kukhuyiwa na pyakuipa. 24Nyaulesi asaikha nyere yace mu mbale mbakhonda kuibwezera pa mulomo wace. 25Menya nyakusingirira, anyakupusa anadzapfundza nzeru; sandika munthu wakubvesesa, iye anadzathimizira cidziwiso. 26Ule anacitira babace nyatwa mbathamangisa maiwace ndi mwana anabweresa manyadzo na kupwazika. 27Leka kubvesera mapfundzisiro, mwananga, unadzasochera kubuluka mu mafala a cidziwiso. 28Mboni yakusowa basa isasingirira ulungami, mulomo wa akuipa usamedza pyakuipa. 29Kutcunyuswa kwakhunganyirwa anyakusingirira, kumenyiwa kwa misana ya madzemwa.
