ምሳሌ 19

19 ¹በቅንነቱ የሚመላለስ ድኻ፣ ጠማማ ንግግር ካለውና ሞኝ ከሆነ ሰው ይልቅ ይሻላል። ²ደግሞም ዕውቀት የሌለው ምኞት መልካም አይደለም፤ የሚቸኩል ሰውም መንገዱን ይስታል። ³የሰው ራሱ ሞኝነት መንገዱን ያበላሻል፤ ልቡ ግን በአባታችን ላይ ይቈጣል። ⁴ሀብት ብዙ ወዳጆችን ይጨምራል፤ ድኻው ግን ከወዳጁ ይለያል። ⁵የሐሰት ምስክር ሳይቀጣ አይቀርም፤ ውሸትን የሚተነፍስም አያመልጥም። ⁶ብዙዎች የለጋስ ሰውን ሞገስ ይፈልጋሉ፤ ሰው ሁሉም ስጦታ ለሚሰጥ ወዳጅ ነው። ⁷የድኻ ወንድሞቹ ሁሉ ይጠሉታል፤ ወዳጆቹማ እንዴት አብልጠው ይርቁታል! ከኋላቸው እየጠራ ይከተላል፤ እነርሱ ግን የሉም። ⁸ጥበብን የሚያገኝ ነፍሱን ይወዳል፤ ማስተዋልን የሚጠብቅ መልካም ነገርን ያገኛል። ⁹የሐሰት ምስክር ሳይቀጣ አይቀርም፤ ውሸትን የሚተነፍስም ይጠፋል። ¹⁰ለሞኝ ምቾት አይገባውም፤ ባሪያ በመሳፍንት ላይ መግዛቱማ ከቶ አይገባውም። ¹¹የሰው ማስተዋል ለቍጣ የዘገየ ያደርገዋል፤ በደልን መተውም ክብሩ ነው። ¹²የንጉሥ ቍጣ እንደ አንበሳ ግሣት ነው፤ ሞገሱ ግን በሣር ላይ እንዳለ ጤዛ ነው። ¹³ሞኝ ልጅ ለአባቱ ጥፋት ነው፤ የሚስት ጥልም የማያቋርጥ ነጠብጣብ ነው። ¹⁴ቤትና ሀብት ከወላጆች የሚወረስ ርስት ነው፤ አስተዋይ ሚስት ግን ከአባታችን ነው። ¹⁵ስንፍና ወደ ከባድ እንቅልፍ ይጥላል፤ ሥራ ፈት ሰውም ይራባል። ¹⁶ትእዛዝን የሚጠብቅ ነፍሱን ይጠብቃል፤ መንገዱን የሚንቅ ግን ይሞታል። ¹⁷ለድኻ ለጋስ የሆነ ለአባታችን ያበድራል፤ አባታችንም ስለ ሥራው ይከፍለዋል። ¹⁸ተስፋ ባለ ጊዜ ልጅህን ገሥጽ፤ ለጥፋቱም ልብህን አታድርግ። ¹⁹እጅግ የሚቈጣ ሰው ቅጣቱን ይሸከማል፤ ብታድነው እንኳ፣ ዳግመኛ ማድረግ ይጠበቅብሃልና። ²⁰ምክርን ስማ፤ ተግሣጽንም ተቀበል፤ በኋለኛው ዘመን ጥበበኛ ትሆን ዘንድ። ²¹በሰው ልብ ውስጥ ብዙ ዕቅድ አለ፤ የሚጸናው ግን የአባታችን ምክር ነው። ²²በሰው ዘንድ የሚፈለገው ታማኝ ፍቅር ነው፤ ድኻ ሰውም ከውሸታም ይሻላል። ²³አባታችንን መፍራት ወደ ሕይወት ይመራል፤ ያለው ሰውም ጠግቦ ያድራል፤ ክፉም አይነካውም። ²⁴ሰነፍ እጁን በወጭቱ ውስጥ ይቀብራል፤ ወደ አፉ መልሶ ለማምጣት እንኳ አይፈልግም። ²⁵ፌዘኛን ግረፍ፤ የዋሁም ጥንቃቄን ይማራል፤ አስተዋይ ሰውን ገሥጽ፤ እርሱም ዕውቀትን ያገኛል። ²⁶በአባቱ ላይ ግፍ የሚፈጽም እናቱንም የሚያባርር፣ ነውርና ውርደት የሚያመጣ ልጅ ነው። ²⁷ልጄ ሆይ፣ ተግሣጽን መስማት ብታቆም፣ ከዕውቀት ቃላት ትስታለህ። ²⁸ምናምንተኛ ምስክር ፍትሕን ያፌዝበታል፤ የክፉዎች አፍም ክፋትን ይውጣል። ²⁹ለፌዘኞች ቅጣት ተዘጋጅቷል፤ ለሞኞች ጀርባም ግርፋት ተዘጋጅቷል።