ምሳሌ 19 FHB Father's Heart Bible™

19 ¹ብቕንዕናኡ ዝኸይድ ድኻ ሰብ ካብቲ ዘረባኡ ጠዋይ ዝኾነ ዓሻ ይበልፅ። ²ፍልጠት ዘይብሉ ድልየት ፅቡቕ ኣይኮነን፤ ብህፁፅ ዝሰርሕ ድማ መንገዱ ይስሕት። ³ዕሽነት ሰብ መንገዱ የበላሹ፥ ልቡ ግና ኣብ ኣቦና ይቝጣዕ። ⁴ሃብቲ ብዙሓት ኣዕርኽቲ ይውስኽ፥ ድኻ ግና ካብ ዓርኩ ይፍለ። ⁵ናይ ሓሰት ምስክር ብዘይ ቅፅዓት ኣይተርፍን፥ ሓሰት ዘስተንፍስ ድማ ኣየምልጥን። ⁶ብዙሓት ሞገስ ለጋስ ሰብ ይደልዩ፤ ንወሃብ ህያብ ከዓ ኵሉ ዓርኪ እዩ። ⁷ኵሎም ኣሕዋት ድኻ ሰብ ይፀልእዎ፤ ኣዕርኽቱስ ክንደይ ድኣ ካብኡ ይርሕቑ! ይፅውዖም እዩ፥ ንሳቶም ግና የለዉን። ⁸ጥበብ ዝረክብ ንነፍሱ የፍቅር፤ ምስትውዓል ዝሕሉ ፅቡቕ ክረክብ እዩ። ⁹ናይ ሓሰት ምስክር ብዘይ ቅፅዓት ኣይተርፍን፥ ሓሰት ዘስተንፍስ ድማ ክጠፍእ እዩ። ¹⁰ተድላ ንዓሻ ኣይግባእን፥ ባርያ ኣብ ልዕሊ መሳፍንቲ ኽገዝእ ከዓ ኣዝዩ ኣይግባእን። ¹¹ኣእምሮ ሰብ ንቝጥዓ ደንጓዪ ይገብሮ፥ ንበደል ሸለል ምባል ከዓ ክብሩ እዩ። ¹²ቝጥዓ ንጉስ ከም ጓዘማ ኣንበሳ እዩ፥ ሞገሱ ግና ከም ኣብ ሳዕሪ ዘሎ ኣውሊ እዩ። ¹³ዓሻ ወዲ ንኣቦኡ ጥፍኣት እዩ፥ ባእሲ ሰበይቲ ድማ ዘየቋርፅ ነጠብጣብ እዩ። ¹⁴ቤትን ሃብትን ካብ ኣቦታት ዝውረስ ርስቲ እዩ፥ መስተውዓሊት ሰበይቲ ግና ካብ ኣቦና እያ። ¹⁵ህኩይነት ናብ ዓሚቝ ድቃስ የውድቕ፥ ህኩይ ሰብ ድማ ክጠሚ እዩ። ¹⁶ትእዛዝ ዝሕሉ ነፍሱ ይሕሉ፤ መንገዱ ዝንዕቕ ግና ክመውት እዩ። ¹⁷ንድኻ ዝልግስ ንኣቦና የለቅሕ፥ ኣቦናውን ስለ ግብሩ ክፈድዮ እዩ። ¹⁸ተስፋ ክሳዕ ዘሎ ንወድኻ ቕፅዓዮ፥ ናብ ጥፍኣቱ ግና ልብኻ ኣይተንብር። ¹⁹ብርቱዕ ቝጥዓ ዘለዎ ሰብ መቕፃዕቲ ኽኽፍል ኣለዎ፥ ንስኻ እንተ ኣድሓንካዮ ኸዓ፥ መሊስካ ኽትገብሮ ኢኻ። ²⁰ምኽሪ ስማዕ፥ ተግሳፅ ከዓ ተቐበል፥ ኣብ ዝመፅእ መዓልቲ ጥበበኛ ምእንቲ ኽትከውን። ²¹ኣብ ልቢ ሰብ ብዙሕ ሓሳባት ኣሎ፥ ዝፀንዕ ግና ምኽሪ ኣቦና እዩ። ²²ካብ ሰብ ዝድለ ምሕረት እዩ፤ ድኻ ሰብ ከዓ ካብ ሓሳዊ ይበልፅ። ²³ፍርሓት ኣቦና ናብ ህይወት ይመርሕ፥ ዘለዎ ድማ ፀጊቡ የዕርፍ፥ ክፉእ ከዓ ኣይበፅሖን። ²⁴ህኩይ ሰብ ኢዱ ኣብ ሸሓነ የእቱ፥ ናብ ኣፉ መሊሱ ኽመልሳ እኳ ኣይደልን። ²⁵ንመላገፂ ውቀዓዮ፥ እቲ ገርሂ ኸዓ ክልብም እዩ፤ ነስተውዓሊ ሰብ ገስፆ፥ ንሱ ኸዓ ፍልጠት ክረክብ እዩ። ²⁶ኣብ ኣቦኡ ዓመፅ ዝገብር፥ ነኖኡ ድማ ዝሰጋ፥ ሕፍረትን ውርደትን ዘምፅእ ወዲ እዩ። ²⁷ወደይ፥ ተግሳፅ ምስማዕ ኣቋርፅ፥ ካብ ቃላት ፍልጠት ከዓ ክትስሕት ኢኻ። ²⁸ከንቱ ምስክር ንፍርዲ የላግፅ፥ ኣፍ ክፉኣት ከዓ ዓመፅ ይውሕጥ። ²⁹ንመላገፅቲ መቕፃዕቲ ተዳልዩሎም ኣሎ፤ ንዝባን ዓያሹ ድማ ህርመት።