Chānsam 20

20 ¹Drakhāra̱ hi mashātkazar, zamshei hi nganang ngasakkhamena, kala chiwui azingli khayitzata a chi thangmei maningmana. ²Awungawui khangachee hi kazingkha̱ nira thaina; ali malungvāt ngasakkhame a china khalattawui mirin shimānhaira. ³Mili nganang eina chihochao hi khayākakāna, kha mangkhama̱ saikorana thākta kharar ngaroka. ⁴Chāngshena zingrot khare atamli lui vākhavai masāmana; chithākha māhāli ana heiun phāda khikha masamphangmana. ⁵Miwui ningli ngarān hi kathuka tara̱ thaina, kha theishingkakhui kakā a china chi khuishoka. ⁶Mi kachungkhana khalattawui makhangachei leikashi hākashoka, kha shitkasanga akha khipāna phākhuishapra? ⁷Khangarongabingna athumwui ningsākhangazip alungli zata; athumwui thili athumwui naongarā sokhami ngasāranu! ⁸Bicharwui wungpamkhongli pama awungana awui mik eina makaphā-makhayā saikora ngum sāda kheikhang. ⁹Khipāna, "Ina iwui wuklung tharzā eina haichinga; iwui morei eina tharhaira" da hāngshapra? ¹⁰Khāntam khani yur kala luk khani yur, ithumwui Avāna khanini chila ningkachai. ¹¹Awui acham tharzā kala khamashung khala da, naoshinao akhala awui otsak eina theisera. ¹²Nganā khanā kala kathei mik, ithumwui Avāna khanini chila sākhui. ¹³Pikakhui maleishilu, maningkha na chāmngasakra; namik sholu, chithākha kashakazā kashap leira. ¹⁴"Arema, arema!" da khalona hānga; chieina a unglaga awui longai kahai chi langso. ¹⁵Sinā kala chāra̱-chāsān kachungkha leiya, kha theikakhui matui morchai hi hakmahālak kahai lanna. ¹⁶Kha̱mi akhawui vang nganingkhami tharan mi chiwui kachon chi khuilu; makatheia mibingwui vang tharan chi khangashit thāda awui kachon khuihailu. ¹⁷Mikhanam eina tongkhui kashakazā shima, kha naoda khamor lunghailātung eina pemtinghai. ¹⁸Hāngkachithei eina khangarān sakāmira; chiwui vang thangkhameiwui thānkhami eina rai sālu. ¹⁹Kasupkazata mina khangui tui khuishokta ngasaka; chiwui vang mangkhama̱ali ngasotnao masaalu. ²⁰Kachikathāna avāva̱li lah ava̱va̱li khonshiakha, awui thaomei pa̱khangapā tangkhamangli sāshimithaora. ²¹Haokaphokli ngalāngda samphangkahai shimlui chi naolak eina masomimara. ²²"Makaphāwui vang ina makaphā tāngasakra" da mahānglu. Ithumwui Avāli ngarailu, chieina ana nali kanshokmira. ²³Makhamashung mari chi ithumwui Avāna ningkachai, kala makhamashunga khāntam maphāmana. ²⁴Miwui pheikār chi ithumwui Avāwui einana; chithākha mina kathāda akhalattawui apong theishingkhuipaira? ²⁵Sāphāphāda kachikathā akha tharchigatta, naolak eina khangashit chi latluida phaningkachunga hi khalenna. ²⁶Thangkhama awungana makhayābing chi ngum sā ngasaka, kala athumwuitungli lanpum kāngphei kātaklamira. ²⁷Miwui manglā chi ithumwui Avāwui thaomeina, phasā alung saikora phākazatna. ²⁸Makhangachei leikashi kala ningkatong china awungali mayonmi; makhangachei leikashi eina awui wungpamkhong khāngkhuimira. ²⁹Yaronnaobingwui khayākakā chi athumwui yāngna, kha khararnaobingwui tekhamatei chi kuingapokthamna. ³⁰Kakeimi shākha china makaphā pheomi ngasaka, kala kashaona phasā alung tharngasakra.