1 Kọrinti 11

11 ¹Ẹ máa ṣàfarawé mi, gẹ́gẹ́ bí èmi náà ti ń ṣàfarawé Kristi.

²Ǹjẹ́ mo yìn yín nítorí tí ẹ rántí mi nínú ohun gbogbo, tí ẹ sì ń pa àwọn àṣà àtọwọ́dọ́wọ́ mọ́ gẹ́gẹ́ bí mo ti fà wọ́n lé yín lọ́wọ́. ³Ǹjẹ́ mo fẹ́ kí ẹ mọ̀ pé: orí olúkúlùkù ọkùnrin ni Kristi, orí obìnrin ni ọkùnrin, orí Kristi sì ni Baba wa. ⁴Olúkúlùkù ọkùnrin tí ó bá gbàdúrà tàbí tí ó sọ àsọtẹ́lẹ̀ pẹ̀lú orí rẹ̀ tí a bò, ó kẹ́gàn orí rẹ̀. ⁵Ṣùgbọ́n olúkúlùkù obìnrin tí ó bá gbàdúrà tàbí tí ó sọ àsọtẹ́lẹ̀ pẹ̀lú orí rẹ̀ tí kò bò, ó kẹ́gàn orí rẹ̀—ó dà bí ẹni tí a fá orí rẹ̀. ⁶Bí obìnrin kò bá fẹ́ bo orí rẹ̀, kí a gé irun rẹ̀ kúrò; ṣùgbọ́n níwọ̀n bí ó ti jẹ́ ìtìjú fún obìnrin láti gé irun rẹ̀ kúrò tàbí láti fá orí rẹ̀, kí ó bo orí rẹ̀. ⁷Ọkùnrin kò gbọdọ̀ bo orí rẹ̀, níwọ̀n bí ó ti jẹ́ àwòrán àti ògo Baba wa; obìnrin sì ni ògo ọkùnrin. ⁸Nítorí ọkùnrin kò ti inú obìnrin wá, bí kò ṣe obìnrin ti inú ọkùnrin. ⁹Bẹ́ẹ̀ ni a kò dá ọkùnrin nítorí obìnrin, bí kò ṣe obìnrin nítorí ọkùnrin. ¹⁰Nítorí náà, obìnrin gbọdọ̀ ní àmì àṣẹ lórí rẹ̀, nítorí àwọn áńgẹ́lì.

¹¹Ṣùgbọ́n, nínú Olúwa, obìnrin kò lómìnira kúrò lọ́dọ̀ ọkùnrin, bẹ́ẹ̀ ni ọkùnrin kò lómìnira kúrò lọ́dọ̀ obìnrin. ¹²Nítorí gẹ́gẹ́ bí obìnrin ti ti inú ọkùnrin wá, bẹ́ẹ̀ ni ọkùnrin ń ti ipasẹ̀ obìnrin wá; ohun gbogbo sì ti ọ̀dọ̀ Baba wa wá. ¹³Ẹ ṣèdájọ́ fúnra yín: ó ha yẹ fún obìnrin láti gbàdúrà sí Baba wa, pẹ̀lú orí rẹ̀ tí kò bò bí? ¹⁴Ìṣẹ̀dá fúnra rẹ̀ kò ha kọ́ yín pé irun gígùn lórí ọkùnrin jẹ́ ìtìjú fún un, ¹⁵ṣùgbọ́n bí obìnrin bá ní irun gígùn, ó jẹ́ ògo fún un, nítorí a fún un ní irun rẹ̀ gẹ́gẹ́ bí ìbòjú. ¹⁶Bí ẹnikẹ́ni bá fẹ́ jiyàn nípa èyí, àwa kò ní àṣà irú rẹ̀, bẹ́ẹ̀ ni àwọn ìjọ Baba wa kò ní.

Tábìlì Olúwa tí a kò Bọ̀wọ̀ fún

¹⁷Nínú fífún yín ní ìtọ́ni yìí, èmi kò yìn yín, nítorí tí ẹ péjọ kì í ṣe fún rere bí kò ṣe fún búburú. ¹⁸Nítorí lákọ̀ọ́kọ́, nígbà tí ẹ bá péjọ gẹ́gẹ́ bí ìjọ, mo gbọ́ pé ìyapa wà láàrin yín, mo sì gbà á gbọ́ ní apá kan. ¹⁹Nítorí ìyapa gbọdọ̀ wà pàápàá láàrin yín, kí àwọn olóòótọ́ láàrin yín lè fi ara hàn. ²⁰Nítorí náà, nígbà tí ẹ bá péjọ sí ibì kan, kì í ṣe Oúnjẹ Alẹ́ Olúwa ni ẹ ń jẹ. ²¹Nítorí bí ẹ ti ń jẹun, olúkúlùkù ń yára jẹ oúnjẹ alẹ́ tirẹ̀ ṣáájú—ebi ń pa ẹnìkan, ọtí sì ń pa ẹlòmíràn. ²²Ẹ kò ha ní ilé láti máa jẹun àti láti máa mu bí? Tàbí ẹ ń gan ìjọ Baba wa, tí ẹ sì ń dójútì àwọn tí kò ní nǹkankan? Kí ni kí n wí fún yín? Kí n yìn yín bí? Èmi kò yìn yín nítorí èyí.

²³Nítorí mo gbà láti ọ̀dọ̀ Olúwa ohun tí mo sì fà lé yín lọ́wọ́: Olúwa Jesu, ní òru tí a fi í hàn, ó mú àkàrà,

²⁴lẹ́yìn tí ó dúpẹ́, ó bù ú, ó sì wí pé, “Èyí ni ara mi, fún yín; ẹ máa ṣe èyí láti rántí mi.” ²⁵Bákan náà, lẹ́yìn oúnjẹ alẹ́, ó tún mú ago náà, ó ń wí pé, “Ago yìí ni májẹ̀mú tuntun nínú ẹ̀jẹ̀ mi. Ẹ máa ṣe èyí, nígbàkigbà tí ẹ bá mu ún, láti rántí mi.”

²⁶Nígbàkigbà tí ẹ bá jẹ àkàrà yìí, tí ẹ sì mu ago yìí, ẹ ń kéde ikú Olúwa títí yóò fi dé.

²⁷Nítorí náà, ẹnikẹ́ni tí ó bá jẹ àkàrà náà tàbí tí ó mu ago Olúwa ní àìlẹ́tọ̀ọ́, ó jẹ̀bi ara àti ẹ̀jẹ̀ Olúwa. ²⁸Kí ènìyàn máa dán ara rẹ̀ wò, lẹ́yìn náà kí ó jẹ àkàrà náà, kí ó sì mu ago náà. ²⁹Nítorí ẹnikẹ́ni tí ó bá jẹ tí ó sì mu láìfi ìyàtọ̀ mọ ara náà, ó ń jẹ, ó sì ń mu ìdájọ́ wá sórí ara rẹ̀. ³⁰Ìdí nìyí tí ọ̀pọ̀ láàrin yín fi jẹ́ aláìlera àti aláìsàn, tí ẹlòmíràn sì ti sùn. ³¹Ṣùgbọ́n bí àwa bá ṣèdájọ́ ara wa dáadáa, a kì bá ti dá wa lẹ́jọ́. ³²Nígbà tí Olúwa bá ń dá wa lẹ́jọ́, ó ń bá wa wí, kí a má ba à jẹ̀bi pẹ̀lú ayé. ³³Nítorí náà, ẹ̀yin ará mi, nígbà tí ẹ bá péjọ láti jẹun, ẹ máa dúró de ara yín. ³⁴Bí ebi bá ń pa ẹnikẹ́ni, kí ó jẹun ní ilé, kí ìpéjọ yín má ba à mú ìdájọ́ wá. Èmi yóò yanjú ìyókù nígbà tí mo bá dé.