Watheti wa Khoditu 11 FHB Father's Heart Bible™

11 ¹Lwalanda mbandu ya meni, bwosu meni phi yisi landa mbandu ya Kidisitu.

²Buthwena, yiluzitisa kikuma lubati mbambukila muna moosu amana lusimbidila mikuku bwosu yiluhekini mawu. ³Buthwena, nzodi ni luzaya: mutwa wa mutu wosu wa yakala wenina Kidisitu, mutwa wa mukhetu wenina yakala, amana mutwa wa Kidisitu wenina Tata wetu. ⁴Mutu wosu wa yakala wuna wisi lombila ho wisi bikula yi mutwa wandi wufidingini, kisi lewula mutwa wandi. ⁵Kaasi mukhetu wosu wuna wisi lombila ho wisi bikula yi mutwa wandi wukondi fidinga, kisi lewula mutwa wandi; mutindu wumosi hanga mukhetu wuzengwa nsuki. ⁶Yuka ni mukhetu kazodiku fidinga mutwa wandi, bamuzengila nsuki; kaasi bwosu bwenina tsoni kwena mukhetu wuzengwa nsuki ho wuzengwa mutwa, bulungi kadifidinga mutwa wandi. ⁷Mutu wa yakala kafwaniku fidinga mutwa wandi, mukuma yandi kenina kifwani yi khembu ya Tata wetu; kaasi mukhetu kenina khembu ya yakala. ⁸Mukuma yakala kátukaku mu mukhetu, kaasi mukhetu wátuka mu yakala. ⁹Amana yakala káhangamaku mu dyambu dya mukhetu, kaasi mukhetu wáhangama mu dyambu dya yakala. ¹⁰Yihana ni, mukhetu bulungi kakala yi dimbu dya luyalu hana mutwa wandi, kikuma kya banzyo.

¹¹Kaasi mwena Pfumu, mukhetu keku konda yakala, amana yakala keku konda mukhetu. ¹²Mukuma bwosu mukhetu wátuka mu yakala, bwabuna phi yakala kisi tuka mu mukhetu; kaasi moosu matukini kwena Tata wetu. ¹³Fundisenu benu-benu: bufwani ni mukhetu kalombila kwena Tata wetu yi mutwa wandi wukondi fidinga? ¹⁴Khadidi yandi-meni yisiku lulonga ni nsuki milabuka mu mutu wa yakala mina tsoni kwena yandi, ¹⁵kaasi yuka ni mukhetu kakala yi nsuki milabuka, mina khembu yandi, mukuma nsuki wámuhana hanga kima kya kufidinga mutwa? ¹⁶Yuka ni mutu kazodi kuyumana mu dyambu dina, betu tukondi kikalulu kyakina, amana Mabundu ma Tata wetu maku phi.

Mesa dya Pfumu Dilewudibwa

¹⁷Mu kuhana mulongi wawu, yiluzitisaku, mukuma lusi kutakana ka kikuma kya mboti ku kaasi kikuma kya mbi. ¹⁸Mukuma theti, tangwa lubati kutakana nana Dibundu, ngyukiki ni ngyengu zenina hakati dya benu; amana ndambu mukwikidi. ¹⁹Mukuma bulungi ngyengu zakala hakati dya benu, ndangu batu ba kyedika hakati dya benu bakituka bengele. ²⁰Yihana ni, tangwa lubati kutakana ha buangu bumosi, Mesa dya Pfumu lusi dyaku. ²¹Mukuma bwosu lubati dya, kosu mutu kisi tekila kudyaka madya mandi; mosi wenina yi nzala, mukwawu wuzedini malafu. ²²Lukondi ni nzu za kudya yi kunwa? Ho lusi lewula Dibundu dya Tata wetu amana luyukisa tsoni babana bakondi kima? Nzimbwala ni biki kwena benu? Yiluzitisa ni? Yiluzitisaku mu dyambu dina.

²³Mukuma meni yátambula kwena Pfumu mana meni phi yáluhekini: mu phipha Pfumu Yesu bamulambudi, wábonga dipha,

²⁴kunima dya kuvutula matondu, wábukuna amana wázimbula: «Dyadi dyenina lutu lwama, kikuma kya benu; salenu bwabu mu kumbambukila.» ²⁵Mutindu wumosi phi, kunima dya kudya, wábonga mbungu, wázimbula: «Mbungu yayi yenina bulunda bwa pha mu menga mama. Salenu bwabu, mbala yosu yina lwanwa, mu kumbambukila.»

²⁶Mbala yosu yina lwadya dipha dyadi amana lwanwa mbungu yayi, lusi samuna lufwa lwa Pfumu, tii yi kuna kakwísa.

²⁷Yihana ni, wosu wuna wisi dya dipha ho kanwa mbungu ya Pfumu konda kufwana, kenina mukuludi wa lutu yi menga ma Pfumu. ²⁸Mutu kadibedi yandi-meni, amana kadya dipha, kanwa phi mbungu. ²⁹Mukuma wosu wuna wisi dya amana kanwa konda kuzaya lutu lwa Pfumu, kisi dya amana kanwa pfundusu hana yandi-meni. ³⁰Yihana ni, batu lawu hakati dya benu benina balembwa yi bambefu, amana ndambu balekidi tulu. ³¹Kaasi yuka ni twadibedisa betu-betu kwatoma, betu tulendaku tambula pfundusu. ³²Tangwa Pfumu kisi tufundisa, kisi tusungika, ndangu tulendaku bedisama ha kimosi yi tsi. ³³Yihana ni, baphangi bama, tangwa lubati kutakana mu kudya, luhingila benu yi benu. ³⁴Yuka ni mutu kenina yi nzala, kadila kuna nzu yandi, ndangu kutakana kwenu kwalendaku kunata pfundusu. Mana makwawu yimateleka tangwa yikwísa.