Malongi matukidini mu kubwa kwa batata betu
Batata betu bákala yi tuti, yi mbu, yi madya mamosi ma kitembu, amana bábwa mu nganga—byásonikwa hanga ndongisila. Kufukamina biteki kufweti tinwa, kaasi Tata wawu wenina wa kyedika amana wisi hana nzila ya kutotila. Dyenu mana masya; hangenu byosu kikuma kya khembu yandi.
10 1Baphangi, nzodini ni luzaya: batata betu boosu bákala ku tsina dya tuti, amana boosu básabuka mu mbu. 2Boosu bábotokolo mu Moyize muna tuti yi muna mbu. 3Boosu bádya madya mamosi ma kitembu, 4amana boosu banwa mamba mamosi ma kitembu, mukuma banwa ku ditadi dya kitembu dyákala landa; ditadi dina dyákala Kidisitu. 5Kaasi Tata wetu kásephelaku yi batu balutakana kati dya bawu, mukuma bábondolo muna nganga.
6Buthwena mambu mama mákitukini mbandu yetu, hanga twabamba ni tunékaku mambu ma mbi hanga buna bawu bánekila. 7Lukalaku bafukamini biteki hanga bahika kati dya bawu bwabakadila; bwosu básonikina: «Batu basikuka mu kudya yi kunwa, amana bátokama mu kusakana.» 8Tukalenu mu kusala kindumba hanga buna bahika kati dya bawu básadila; batu makumodi yi bitatu bya mili báfwa mu kilumbu kimosi. 9Tukalenu mu kumeka Kidisitu, hanga buna bahika kati dya bawu bámeka, amana bátotolo kwena banyoka. 10Amana lubokutaku, hanga buna bahika kati dya bawu bábokuta, amana bátotolo kwena wanzyo wa lufwa. 11Mambu mama mábabwila hanga mbandu, amana másonikina hanga ndongisila yetu, betu babana tsuka ya matangwa yátula. 12Yihana ni, wosu wuna kadibanzila ni watelama, kadikenga ndangu kabwaku. 13Konda kimeka kilukwati, kyana kilenda bwila batu boosu. Amana Tata wetu kenina wa kyedika: kaluyambulaku luhitila mu kimeka kuluta buna lulendila kutambwasa, kaasi muna kimeka kakútula phi nzila ya kutotukila, hanga lwalenda kutambwasa.
14Yihana ni, benu bazodami, tinenu kufukamina biteki. 15Yiluzimbwadini hanga kwena batu ba mayedi; benu-benu lufundisa mana yizimbula. 16Bungu dya lusakumunu dyadina tusakumunini, dyisiku kithwadi ku menga ma Kidisitu? Dipha dyadina tubukuna, dyisiku kithwadi ku lutu lwa Kidisitu? 17Mukuma dipha dimosi dyenina, betu balawu twenina lutu lumosi, mukuma boosu tubongi kithwadi mu dipha dimosi. 18Talenu batu ba Kiseledi: babana bisi dya mikhayilu basiku bakwa kithwadi ku kifulu kya kutambika kimenga? 19Buna biki yizonzidini? Ni madya matambikini kwena biteki menina kima, holo ni kiteki kyenina kima? 20Loni, kaasi mana matambikini batu babana bakondi zaya Tata, bawu bisi matambika kwena bampheve za mbi, keti kwena Tata wetu; nzodiku ni lubongila kithwadi yi bampheve za mbi. 21Lulendaku kunwa bungu dya Pfumu yi bungu dya bampheve za mbi; lulendaku kubonga kithwadi ku mesa ma Pfumu amana phi ku mesa ma bampheve za mbi. 22Holo twisi sanda kukwatisa Pfumu kiphala? Betu twenina yi ngolu kuluta yandi?
23«Byosu byenina mu muswa», kaasi ka byosu ku byenina mupfunu. «Byosu byenina mu muswa», kaasi ka byosu ku byisi tunga. 24Mutu kasandaku mboti yandi-meni, kaasi kasanda mboti ya mukwandi. 25Dyenu kyosu kina bisi tekila ku zandu dya mbisi, konda kuhyula byufu kikuma kya katsatsa, 26mukuma «tsi yenina ya Tata wetu, yi byosu bina benina mwena yawu.» 27Yuka ni mutu wukondi kala mukwikidi wukutedi ku madya amana nzodi kwenda, dyenu kyosu kina bisi tula ha mesa, konda kuhyula byufu kikuma kya katsatsa. 28Kaasi yuka ni mutu wukuzimbwadini: «Dyadi dyátambikama kwena kiteki», wudyaku kikuma kya wuna wukuzimbwadini, yi kikuma kya katsatsa. 29Yizonzidini ni heku katsatsa kaku ku, kaasi katsatsa ka mukwenu. Mukuma biki katsatsa ka mukwenu kafúndisa kiphwanza kyama? 30Yuka ni meni ndidi yi matondu, biki yibundilwa kikuma kya kima yisi vutula matondu?
31Yihana ni, keti lwadya, keti lwanwa, keti lwasala kyosu kima, byosu bisalenu kikuma kya khembu ya Tata wetu. 32Lubwisaku Bayuta mu kubwa holo Bangeleki holo Dibundu dya Tata wetu, 33hanga meni phi yisi sanda kusephidisa batu boosu mu mambu moosu, konda kusanda mboti yama-meni, kaasi mboti ya balawu, hanga bahuluka.
