1 Wakorintho 10

10 ¹Ndugu zangu, nataka mjue: baba zetu wa zamani wote walikuwa chini ya wingu, wote walipita katikati ya bahari. ²Wote walibatizwa kuwa wa Musa katika lile wingu na katika ile bahari. ³Wote walikula chakula kile kile cha kiroho, ⁴na wote walikunywa kinywaji kile kile cha kiroho, kwa maana walikunywa kutoka mwamba wa kiroho uliowafuata—na mwamba huo ulikuwa Kristo. ⁵Lakini Baba yetu hakupendezwa na wengi wao, kwa maana walipigwa chini jangwani.

⁶Basi mambo haya yakawa mifano yetu, ili tusitamani mambo maovu kama wao walivyotamani. ⁷Msiwe waabudu sanamu kama baadhi yao walivyokuwa; kama ilivyoandikwa: "watu waliketi kula na kunywa, kisha wakainuka kucheza." ⁸Tusifanye uzinzi kama baadhi yao walivyofanya—wakafa watu ishirini na tatu elfu kwa siku moja. ⁹Tusimjaribu Kristo, kama baadhi yao walivyomjaribu, wakaangamizwa na nyoka. ¹⁰Wala msinung'unike, kama baadhi yao walivyonung'unika, wakaangamizwa na yule mwangamizi. ¹¹Mambo haya yaliwapata wao yakiwa mifano, nayo yaliandikwa kuwa onyo kwetu sisi, ambao mwisho wa nyakati umetufikia. ¹²Basi, yeye anayedhani amesimama na aangalie asianguke. ¹³Hakuna jaribu lililowapata isipokuwa lililo kawaida kwa wanadamu. Naye Baba yetu ni mwaminifu: hatawaacha mjaribiwe kupita mnavyoweza, bali pamoja na lile jaribu atawapa na njia ya kutokea, ili mpate kulistahimili.

¹⁴Kwa hiyo, wapenzi wangu, ikimbieni ibada ya sanamu. ¹⁵Nasema nanyi kama watu wenye akili; hukumuni ninyi wenyewe hayo ninayosema. ¹⁶Kikombe cha baraka tunachokibariki—je, si ushirika katika damu ya Kristo? Mkate tunaoumega—je, si ushirika katika mwili wa Kristo? ¹⁷Kwa kuwa mkate ni mmoja, sisi tulio wengi tu mwili mmoja, kwa maana sisi sote twashiriki ule mkate mmoja. ¹⁸Waangalieni watu wa Israeli: je, wale walao dhabihu si washirika wa madhabahu? ¹⁹Basi nasema nini—kwamba chakula kilichotolewa sadaka kwa sanamu ni kitu, au kwamba sanamu ni kitu? ²⁰La, bali kile wanachotoa sadaka wale wasiomjua Baba, wanakitoa kwa mashetani, si kwa Baba yetu; nami sitaki ninyi mshirikiane na mashetani. ²¹Hamwezi kunywa kikombe cha Bwana na kikombe cha mashetani; hamwezi kushiriki meza ya Bwana na meza ya mashetani. ²²Au je, tunataka kumtia Bwana wivu? Je, sisi tuna nguvu kumzidi yeye?

²³"Kila kitu ni halali"—lakini si kila kitu chenye faida. "Kila kitu ni halali"—lakini si kila kitu chenye kujenga. ²⁴Mtu asitafute faida yake mwenyewe, bali faida ya mwenzake. ²⁵Kuleni kila kinachouzwa sokoni bila kuuliza swali lolote kwa ajili ya dhamiri, ²⁶kwa maana "nchi ni mali ya Baba yetu, pamoja na vyote vilivyomo ndani yake." ²⁷Kama asiyeamini akiwaalika kwenye chakula nanyi mkitaka kwenda, kuleni chochote kitakachoandaliwa, bila kuuliza swali kwa ajili ya dhamiri. ²⁸Lakini mtu akiwaambia, "Hiki kilitolewa sadaka," msile, kwa ajili ya yule aliyewaambia, na kwa ajili ya dhamiri. ²⁹Nina maana ya dhamiri, si yako mwenyewe, bali ya yule mwingine. Kwa maana kwa nini uhuru wangu uhukumiwe na dhamiri ya mtu mwingine? ³⁰Kama nikila kwa shukrani, kwa nini nashutumiwa kwa ajili ya kitu ambacho nakitolea shukrani?

³¹Basi mkila, mkinywa, au mkifanya lolote, fanyeni yote kwa utukufu wa Baba yetu. ³²Msiwe kikwazo kwa Wayahudi wala kwa Wayunani wala kwa kanisa la Baba yetu, ³³kama mimi ninavyojaribu kuwapendeza wote katika kila jambo—si nikitafuta faida yangu mwenyewe, bali faida ya wengi, ili wapate kuokolewa.