1 Wakorintho 11

11 ¹Iweni wafuasi wangu, kama mimi nami nilivyo wa Kristo.

²Basi nawasifu kwa kunikumbuka katika kila jambo na kuyashika mapokeo kama nilivyowakabidhi. ³Nataka mjue: kichwa cha kila mwanamume ni Kristo, na kichwa cha mwanamke ni mwanamume, na kichwa cha Kristo ni Baba yetu. ⁴Kila mwanamume anayeomba au kutoa unabii hali kichwa chake kimefunikwa, hukivunjia heshima kichwa chake. ⁵Lakini kila mwanamke anayeomba au kutoa unabii hali kichwa chake hakijafunikwa, hukivunjia heshima kichwa chake—ni sawa na kunyolewa nywele. ⁶Kama mwanamke akikataa kufunika kichwa chake, na akatwe nywele; lakini kwa kuwa ni aibu kwa mwanamke kukatwa nywele au kunyolewa, na afunike kichwa chake. ⁷Mwanamume haimpasi kufunika kichwa chake, kwa kuwa yeye ni mfano na utukufu wa Baba yetu; naye mwanamke ni utukufu wa mwanamume. ⁸Kwa maana mwanamume hakutoka kwa mwanamke, bali mwanamke alitoka kwa mwanamume. ⁹Wala mwanamume hakuumbwa kwa ajili ya mwanamke, bali mwanamke kwa ajili ya mwanamume. ¹⁰Kwa hiyo mwanamke imempasa kuwa na ishara ya mamlaka juu ya kichwa chake, kwa sababu ya malaika.

¹¹Walakini, katika Bwana mwanamke hajitegemei bila mwanamume, wala mwanamume hajitegemei bila mwanamke. ¹²Kwa maana kama mwanamke alivyotoka kwa mwanamume, vivyo hivyo mwanamume huzaliwa kwa mwanamke; na vitu vyote vyatoka kwa Baba yetu. ¹³Amueni ninyi wenyewe: je, ni vyema mwanamke amwombe Baba yetu hali kichwa chake hakijafunikwa? ¹⁴Je, hata asili yenyewe haiwafundishi ya kwamba mwanamume akiwa na nywele ndefu ni fedheha kwake, ¹⁵bali mwanamke akiwa na nywele ndefu ni utukufu kwake? Kwa maana amepewa hizo nywele ziwe kifuniko chake. ¹⁶Lakini mtu ye yote akitaka kushindana kwa neno hili, sisi hatuna desturi kama hiyo, wala makanisa ya Baba yetu.

Meza ya Bwana Yavunjiwa Heshima

¹⁷Nami katika kutoa agizo hili, siwasifu, kwa sababu mkutanikapo si kwa faida bali kwa hasara. ¹⁸Kwanza, mkutanikapo kama kanisa, nasikia kwamba kuna mafarakano kati yenu; nami nusu naamini. ¹⁹Kwa maana lazima kuwe na mafarakano kati yenu, ili wale waliohalisi kati yenu wapate kudhihirika. ²⁰Basi, mnapokutanika mahali pamoja, si Meza ya Bwana mnayoila. ²¹Kwa maana mnapokula, kila mmoja hutangulia kula chakula chake mwenyewe—mmoja ana njaa, na mwingine amelewa. ²²Je, hamna nyumba za kulia na kunywa? Au mnalidharau kanisa la Baba yetu, na kuwaaibisha wale wasio na kitu? Niwaambie nini? Niwasifu? Katika jambo hili siwasifu.

²³Kwa maana mimi nalipokea kwa Bwana yale niliyowakabidhi ninyi: ya kwamba Bwana Yesu, usiku ule aliotolewa, alitwaa mkate,

²⁴naye akiisha kushukuru, akaumega, akasema, "Huu ndio mwili wangu, uliotolewa kwa ajili yenu; fanyeni hivi kwa ukumbusho wangu." ²⁵Vivyo hivyo baada ya kula, akakitwaa kikombe, akisema, "Kikombe hiki ni agano jipya katika damu yangu. Fanyeni hivi kila mnywapo, kwa ukumbusho wangu."

²⁶Kwa maana kila mnapokula mkate huu na kukinywa kikombe hiki, mnaitangaza mauti ya Bwana hata ajapo.

²⁷Basi kila aulaye mkate huo au kunywa kikombe cha Bwana isivyostahili, atakuwa na hatia ya mwili na damu ya Bwana. ²⁸Lakini mtu ajichunguze mwenyewe, ndipo aule mkate na kukinywa kikombe. ²⁹Kwa maana ye yote alaye na kunywa pasipo kuupambanua mwili, hujilia na hujinywea hukumu. ³⁰Kwa sababu hiyo wako wengi kati yenu walio hawawezi na wagonjwa, na kadhaa wamelala usingizi. ³¹Lakini kama tungejihukumu wenyewe kwa haki, tusingehukumiwa. ³²Bwana anapotuhukumu, hutuadhibu, ili tusipate kuhukumiwa pamoja na dunia. ³³Basi, ndugu zangu, mkutanikapo ili kula, ngojaneni. ³⁴Mtu akiwa na njaa, na ale nyumbani kwake, ili kukutanika kwenu kusilete hukumu. Na mambo yaliyosalia nitayatengeneza nitakapokuja.