1 Kọrinti 10

10 ¹Ẹ̀yin ará, mo fẹ́ kí ẹ mọ̀ pé: gbogbo àwọn baba ńlá wa ni ó wà lábẹ́ ìkùùkùú, gbogbo wọn sì la Òkun kọjá. ²A ṣe ìtẹ̀bọmi fún gbogbo wọn sínú Mose nínú ìkùùkùú àti nínú Òkun. ³Gbogbo wọn jẹ oúnjẹ ẹ̀mí kan náà, ⁴gbogbo wọn sì mu ohun mímu ẹ̀mí kan náà, nítorí wọ́n mu láti inú àpáta ẹ̀mí tí ń tẹ̀lé wọn—àpáta náà sì ni Kristi. ⁵Ṣùgbọ́n inú Baba wa kò dùn sí ọ̀pọ̀lọpọ̀ nínú wọn, nítorí a lù wọ́n bolẹ̀ nínú aginjù.

⁶Nísinsìnyí, àwọn nǹkan wọ̀nyí di àpẹẹrẹ fún wa, kí àwa má baà ṣe ìfẹ́kúfẹ̀ẹ́ sí àwọn nǹkan búburú bí wọ́n ti ṣe ìfẹ́kúfẹ̀ẹ́. ⁷Ẹ má ṣe di abọ̀rìṣà bí àwọn kan nínú wọn ti rí; gẹ́gẹ́ bí a ti kọ ọ́ pé: “àwọn ènìyàn náà jókòó láti jẹun àti láti mu, wọ́n sì dìde láti ṣeré.” ⁸Ẹ jẹ́ kí a má ṣe àgbèrè bí àwọn kan nínú wọn ti ṣe—ẹgbẹ̀rún mẹ́tàlélógún ló kú ní ọjọ́ kan ṣoṣo. ⁹Ẹ jẹ́ kí a má dán Kristi wò, bí àwọn kan nínú wọn ti ṣe, tí àwọn ejò sì pa wọ́n run. ¹⁰Ẹ má sì kùn, bí àwọn kan nínú wọn ti kùn, tí aparun sì pa wọ́n run. ¹¹Àwọn nǹkan wọ̀nyí ṣẹlẹ̀ sí wọn gẹ́gẹ́ bí àpẹẹrẹ, a sì kọ wọ́n sílẹ̀ gẹ́gẹ́ bí ìkìlọ̀ fún wa, àwa ẹni tí òpin àwọn ìgbà ti dé bá. ¹²Nítorí náà, ẹnikẹ́ni tí ó bá rò pé òun dúró, kí ó ṣọ́ra kí ó má baà ṣubú. ¹³Kò sí ìdẹwò kan tí ó ti dì yín mú àfi èyí tí ó wọ́pọ̀ fún ènìyàn. Baba wa sì jẹ́ olóòótọ́: kì yóò jẹ́ kí a dán yín wò ju èyí tí ẹ lè rù lọ, ṣùgbọ́n pẹ̀lú ìdẹwò náà yóò tún pèsè ọ̀nà àbáyọ, kí ẹ lè fàradà rẹ̀.

¹⁴Nítorí náà, ẹ̀yin olùfẹ́, ẹ sá fún ìbọ̀rìṣà. ¹⁵Mo ń sọ̀rọ̀ gẹ́gẹ́ bí ẹni tí ń bá àwọn olóye sọ̀rọ̀; ẹ ṣe ìdájọ́ fúnra yín ohun tí mo sọ. ¹⁶Ago ìbùkún tí a ń bùkún—kì í ha ṣe ìpín nínú ẹ̀jẹ̀ Kristi bí? Àkàrà tí a ń bù—kì í ha ṣe ìpín nínú ara Kristi bí? ¹⁷Níwọ̀n bí àkàrà kan ṣoṣo ti wà, àwa tí a pọ̀ jẹ́ ara kan, nítorí gbogbo wa ni a jọ pín àkàrà kan náà. ¹⁸Ẹ wo àwọn ènìyàn Israẹli: àwọn tí ń jẹ ẹran ẹbọ, wọn kì í ha ṣe alábàápín nínú pẹpẹ bí? ¹⁹Kí ni mo ń sọ, nígbà náà—pé oúnjẹ tí a fi rú ẹbọ sí òrìṣà jẹ́ ohun kan, tàbí pé òrìṣà jẹ́ ohun kan? ²⁰Rárá, ṣùgbọ́n ohun tí àwọn tí kò mọ Baba ń rú ní ẹbọ, àwọn ẹ̀mí èṣù ni wọ́n ń rú u sí, kì í ṣe Baba wa; èmi kò fẹ́ kí ẹ ní ìpín pẹ̀lú àwọn ẹ̀mí èṣù. ²¹Ẹ kò lè mu ago Olúwa àti ago àwọn ẹ̀mí èṣù; ẹ kò lè ní ìpín nínú tábìlì Olúwa àti tábìlì àwọn ẹ̀mí èṣù. ²²Tàbí a ń gbìyànjú láti mú Olúwa jowú ni? Àwa ha lágbára ju òun lọ bí?

²³“A yọ̀ǹda ohun gbogbo”—ṣùgbọ́n kì í ṣe ohun gbogbo ló ń ṣe àǹfààní. “A yọ̀ǹda ohun gbogbo”—ṣùgbọ́n kì í ṣe ohun gbogbo ló ń gbéniró. ²⁴Kí ẹnikẹ́ni má wá ire ara rẹ̀, bí kò ṣe ire aládùúgbò rẹ̀. ²⁵Ẹ jẹ ohunkóhun tí a bá tà ní ọjà ẹran láì béèrè ìbéèrè kankan nítorí ẹ̀rí-ọkàn, ²⁶nítorí “ti Baba wa ni ayé, àti ohun gbogbo tí ń bẹ nínú rẹ̀.” ²⁷Bí aláìgbàgbọ́ kan bá pè yín sí oúnjẹ, tí ẹ sì fẹ́ lọ, ẹ jẹ ohunkóhun tí a bá gbé kalẹ̀ fún yín, láì béèrè ìbéèrè nítorí ẹ̀rí-ọkàn. ²⁸Ṣùgbọ́n bí ẹnìkan bá sọ fún yín pé, “A fi èyí rú ẹbọ ni,” ẹ má jẹ ẹ́, nítorí ẹni tí ó sọ fún yín, àti nítorí ẹ̀rí-ọkàn. ²⁹Kì í ṣe ẹ̀rí-ọkàn tiyín fúnra yín ni mo ń sọ, bí kò ṣe ti ẹlòmíràn. Nítorí èéṣe tí ẹ̀rí-ọkàn ẹlòmíràn yóò fi ṣe ìdájọ́ òmìnira mi? ³⁰Bí mo bá fi ọpẹ́ jẹun, èéṣe tí a fi ń bú mi nítorí ohun tí mo dúpẹ́ lórí rẹ̀?

³¹Nítorí náà, yálà ẹ ń jẹun, ẹ ń mu, tàbí ẹ ń ṣe ohunkóhun, ẹ ṣe gbogbo rẹ̀ fún ògo Baba wa. ³²Ẹ má ṣe fa ìkọ̀sẹ̀ fún àwọn Júù tàbí fún àwọn Giriki tàbí fún ìjọ Baba wa, ³³gẹ́gẹ́ bí èmi ti ń gbìyànjú láti wu gbogbo ènìyàn nínú ohun gbogbo—láì wá ire ara mi, bí kò ṣe ire àwọn púpọ̀, kí wọ́n lè rí ìgbàlà.