1 ቆሮንቶስ 10

10 ¹ወንድሞችና እኅቶች ሆይ፤ አባቶቻችን ሁሉ ከደመናው በታች እንደ ነበሩ፣ ሁሉም በባሕር መካከል እንዳለፉ ታውቁ ዘንድ እፈልጋለሁ። ²ሁሉም በደመናውና በባሕሩ ውስጥ ወደ ሙሴ ተጠመቁ። ³ሁሉም ያንኑ መንፈሳዊ ምግብ በሉ፤ ⁴ሁሉም ያንኑ መንፈሳዊ መጠጥ ጠጡ፤ ይከተላቸው ከነበረው መንፈሳዊ ዐለት ጠጥተዋልና፤ ያም ዐለት ክርስቶስ ነበረ። ⁵አባታችን ግን ከእነርሱ በአብዛኞቹ ደስ አላለውም፤ በምድረ በዳ ተጥለው ወድቀዋልና።

⁶እነርሱ እንደ ተመኙ እኛ ክፉ ነገርን እንዳንመኝ፣ ይህ ሁሉ ለእኛ ምሳሌ ሆነ። ⁷ከእነርሱ አንዳንዶቹ እንደ ነበሩ ጣዖት አምላኪዎች አትሁኑ፤ እንዲህ ተብሎ ተጽፎአልና፤ “ሕዝቡ ሊበሉና ሊጠጡ ተቀመጡ፣ ከዚያም ሊጫወቱ ተነሡ።” ⁸ከእነርሱ አንዳንዶቹ እንዳደረጉት በዝሙት ኀጢአት አንሥራ፤ በአንድ ቀን ውስጥ ፳፫ ሺህ ሞቱ። ⁹ከእነርሱ አንዳንዶቹ ክርስቶስን እንደ ፈተኑ፣ በእባቦችም እንደ ጠፉ፣ እኛ አንፈትነው። ¹⁰ከእነርሱ አንዳንዶቹ እንዳጒረመረሙ፣ በአጥፊውም እንደ ጠፉ፣ እናንተ አታጒረምርሙ። ¹¹ይህ ሁሉ ለእነርሱ እንደ ምሳሌ ሆኖ ደረሰባቸው፤ የዘመናት ፍጻሜ ለደረሰብን ለእኛም ማስጠንቀቂያ ይሆን ዘንድ ተጻፈ። ¹²እንግዲያስ የቆመ የሚመስለው እንዳይወድቅ ይጠንቀቅ። ¹³ለሰው ሁሉ ከሚገጥመው በቀር ምንም ፈተና አልያዛችሁም። አባታችንም ታማኝ ነው፤ ልትሸከሙት ከምትችሉት በላይ እንድትፈተኑ አይፈቅድም፤ ነገር ግን ፈተናውን ልትታገሡት እንድትችሉ ከእርሱ ጋር መውጫውን ደግሞ ያዘጋጃል።

¹⁴ስለዚህ ወዳጆች ሆይ፤ ከጣዖት አምልኮ ሽሹ። ¹⁵ለአስተዋዮች እንደምናገር እናገራለሁ፤ የምለውን እናንተ ራሳችሁ ፍረዱ። ¹⁶የምንባርከው የበረከት ጽዋ በክርስቶስ ደም መካፈል አይደለምን? የምንቈርሰው እንጀራ በክርስቶስ ሥጋ መካፈል አይደለምን? ¹⁷አንድ እንጀራ ስላለ፣ ሁላችን ያንኑ አንዱን እንጀራ ስለምንካፈል፣ እኛ ብዙዎች አንድ ሥጋ ነን። ¹⁸የእስራኤልን ሕዝብ ተመልከቱ፤ መሥዋዕቱን የሚበሉ በመሠዊያው ተካፋዮች አይደሉምን? ¹⁹እንግዲያስ ምን እያልሁ ነው? ለጣዖት የተሠዋ ምግብ ምንም ነው፣ ወይስ ጣዖት ምንም ነው ማለቴ ነውን? ²⁰አይደለም፤ ነገር ግን አባታችንን የማያውቁ የሚሠዉት፣ ለአባታችን ሳይሆን ለአጋንንት ይሠዋሉ፤ እናንተ ከአጋንንት ጋር ተካፋዮች እንድትሆኑ አልፈልግም። ²¹የጌታን ጽዋና የአጋንንትን ጽዋ ልትጠጡ አትችሉም፤ የጌታን ማዕድና የአጋንንትን ማዕድ ልትካፈሉ አትችሉም። ²²ወይስ ጌታን ለቅናት እናስነሣዋለንን? ከእርሱ እንበረታለንን?

²³“ሁሉ ተፈቅዶአል”፤ ነገር ግን ሁሉ አይጠቅምም። “ሁሉ ተፈቅዶአል”፤ ነገር ግን ሁሉ አያንጽም። ²⁴ማንም የራሱን ጥቅም አይሻ፤ የባልንጀራውን ጥቅም እንጂ። ²⁵ስለ ሕሊና ምንም ሳትጠይቁ፣ በሥጋ መሸጫ የሚሸጠውን ሁሉ ብሉ፤ ²⁶“ምድርና በውስጧ ያለው ሁሉ የአባታችን ነውና።” ²⁷የማያምን ሰው ወደ ግብዣ ቢጠራችሁ መሄድም ብትፈልጉ፣ ስለ ሕሊና ምንም ሳትጠይቁ፣ የቀረበላችሁን ሁሉ ብሉ። ²⁸ነገር ግን አንድ ሰው፣ “ይህ የተሠዋ ነው” ብሎ ቢነግራችሁ፣ ስለ ነገራችሁ ሰውና ስለ ሕሊና ሲባል አትብሉት፤ ²⁹የማለውም የራሳችሁን ሕሊና ሳይሆን የሌላውን ነው። ነጻነቴ በሌላው ሕሊና ለምን ይፈረድበታል? ³⁰እኔ በምስጋና ብበላ፣ ስለማመሰግንበት ነገር ለምን እወቀሳለሁ?

³¹እንግዲያስ ብትበሉ፣ ብትጠጡ፣ ወይም ማናቸውንም ነገር ብታደርጉ፣ ሁሉን ለአባታችን ክብር አድርጉት። ³²ለአይሁድ ቢሆን፣ ለግሪኮች ቢሆን፣ ለአባታችን ቤተ ክርስቲያን ቢሆን መሰናክል አትሁኑ፤ ³³እኔም የብዙዎች እንዲድኑ፣ የራሴን ጥቅም ሳልሻ የብዙዎችን ጥቅም እንጂ፣ በሁሉ ነገር ሁሉን ደስ ለማሰኘት እጥራለሁ።