መጠንቀቕታ ካብ ውድቀት ኣቦታትና

እስራኤል እቲ ደበናን ባሕርን ሓደ ዓይነት መንፈሳዊ ብልዕን ነበሮም፥ ኾይኑ ግና ኣብ ምድረ በዳ ወደቑ — ንመጠንቀቕታ ኸዓ ተፃሕፈ። ካብ ምምላኽ ጣዖት ክህደም ኣለዎ፥ ኣቦኦም ግና እሙን እዩ፥ መውፅኢ መንገዲ ኸዓ ይህብ። እቲ ዝቐርበልኩም ብልዑ፤ ኵሉ ንኽብሩ ግበሩ።

ምዕራፍ 10።

ኣቱም ኣሕዋተይ፥ ክትፈልጡ እደሊ ኣለኹ፦ ኣቦታትና ኵሎም ኣብ ትሕቲ እቲ ደበና ነበሩ፥ ኵሎም ድማ ነቲ ባሕሪ ተሳገሩ። ኵሎም ድማ ኣብ ደበናን ኣብ ባሕርን ናብ ሙሴ ተጠመቑ። ኵሎም ሓደ ዓይነት መንፈሳዊ ብልዒ በልዑ፥ ኵሎም ድማ ሓደ ዓይነት መንፈሳዊ መስተ ሰተዩ፤ ካብቲ ዝስዕቦም ዝነበረ መንፈሳዊ ኰዅሒ ሰትዮም እዮም እሞ፤ እቲ ኰዅሒ ኸዓ ክርስቶስ ነበረ። ኣቦና ግና ብመብዛሕትኦም ደስ ኣይበሎን፤ ኣብ ምድረ በዳ ተቐዝፉ እሞ።

እዞም ነገራት እዚኣቶም ድማ፥ ከምቲ ንሳቶም ዝተመነይዎ፥ ንሕና ንኽፉእ ነገር ከይንምነ፥ ኣብነትና ኾኑ። ከምቲ ገሊኣቶም ዝነበርዎ መምለኽቲ ጣዖት ኣይትኹኑ፤ ከምቲ ዝተፃሕፈ፦ “እቲ ህዝቢ ክበልዑን ክሰትዩን ተቐመጡ፥ ክፃወቱ ድማ ተንስኡ።” ከምቲ ገሊኣቶም ዝገበርዎ ኣይነመንዝር፤ ኣብ ሓንቲ መዓልቲ ኸዓ ዕስራን ሰለስተን ሽሕ ሞቱ። ከምቲ ገሊኣቶም ዝገበርዎ ንክርስቶስ ኣይንፈትኖ፤ ብኣትማን ድማ ጠፍኡ። ከምቲ ገሊኣቶም ዘጕረምረሙ ድማ ኣይተጕረምርሙ፤ በቲ መጥፍኢ ድማ ጠፍኡ። እዞም ነገራት እዚኣቶም ንኣብነት ኮይኖም ኣጋጠምዎም፥ ነቶም መወዳእታ ዘመናት ዝበፅሐና ድማ መጠንቀቕታ ኾይኖም ተፃሕፉ። እምበኣር እቲ ደው ኢለ ኣለኹ ኢሉ ዝሓስብ ሰብ፥ ከይወድቕ ይጠንቀቕ። ካብ ንሰብ ዝልመድ ወፃኢ ፈተና ኣይሓዘኩምን። ኣቦና ድማ እሙን እዩ፤ ካብ ዓቕምኹም ንላዕሊ ክትፍተኑ ኣይሓድገኩምን እዩ፤ ምእንቲ ኽትዕገስዎ ኸዓ፥ ምስቲ ፈተና መውፅኢ መንገዲ ከዳልወልኩም እዩ።

ስለዙይ፥ ኣቱም ፍቑራተይ፥ ካብ ምምላኽ ጣዖት ህደሙ። ከም ንለባማት ሰባት እየ ዝዛረብ ዘለኹ፤ ነቲ ዝብሎ ባዕልኻትኩም ፍረዱ። እታ እንባርኻ ፅዋዕ በረኸት፥ ኣብ ደም ክርስቶስ ምክፋልዶ ኣይኮነትን? እቲ እንስብሮ እንጀራ፥ ኣብ ስጋ ክርስቶስ ምክፋልዶ ኣይኮነን? ሓደ እንጀራ ስለ ዘሎ፥ ንሕና ብዙሓት ሓደ ስጋ ኢና፤ ኵልና ኻብቲ ሓደ እንጀራ ንካፈል ኢና እሞ። ነቶም ህዝቢ እስራኤል ተመልከቱ፦ እቶም መስዋእቲ ዝበልዑ፥ ኣብ መሰውኢ መሻርኽቲዶ ኣይኮኑን? እንታይ ደኣ እየ ዝብል ዘለኹ? ንጣዖት ዝተሰውአ ብልዒ ገለ እዩ፥ ወይ ጣዖት ገለ እዩ ማለተይ ድዩ? ኣይኮነን፤ ነቲ ንኣቦ ዘይፈልጥዎ ዝስውእዎ ግና፥ ንኣቦና ዘይኮነ ንኣጋንንቲ እዮም ዝስውእዎ፤ ምስ ኣጋንንቲ ክትካፈሉ ድማ ኣይደልን እየ። ፅዋዕ ጐይታን ፅዋዕ ኣጋንንትን ክትሰትዩ ኣይትኽእሉን ኢኹም፤ ኣብ መኣዲ ጐይታን መኣዲ ኣጋንንትን ክትካፈሉ ኣይትኽእሉን ኢኹም። ወይ ንጐይታ ከነቕንኦ ንፅዕር ኣለና ድዩ? ካብኡዶ ንሕይል ኢና?

“ኵሉ ተፈቒዱ እዩ”፥ ኵሉ ግና ኣይጠቅምን። “ኵሉ ተፈቒዱ እዩ”፥ ኵሉ ግና ኣይሃንፅን። ነፍሲ ወከፍ ፅቡቕ ብፃዩ እምበር፥ ፅቡቕ ርእሱ ኣይድለ። ኣብ ዕዳጋ ስጋ ዝሽየጥ ኵሉ፥ ምእንቲ ሕሊና ዝኾነ ጥያቐ እንተይጠየቕኩም ብልዑ፤ “እታ ምድርን ኵሉ ኣብኣ ዘሎን ናይ ኣቦና እዩ” እሞ። ሓደ ዘይኣምን ናብ ምሳሕ እንተ ዓደመኩም ክትከዱ ድማ እንተ ደሊኹም፥ ምእንቲ ሕሊና ጥያቐ እንተይጠየቕኩም፥ ዝቐረበልኩም ኵሉ ብልዑ። ሓደ ሰብ ግና “እዙይ ንመስዋእቲ ዝቐረበ እዩ” እንተ በለኩም፥ ምእንቲ እቲ ዝነገረኩም ሰብን ምእንቲ ሕሊናን ኢልኩም ኣይትብልዕዎ። ዝብሎ ዘለኹ፥ ሕሊና እቲ ኻልእ ሰብ እምበር፥ ሕሊና ርእስኻ ኣይኮነን። ስለ ምንታይ ደኣ ነፃነተይ ብሕሊና ኻልእ ሰብ ዝፍረድ? ኣነ ኣመስጊነ እንተ በሊዐ፥ ብዛዕባ እቲ ዘመስግነሉ ነገር ስለ ምንታይ እፅረፍ?

ስለዙይ እንተ በላዕኹም፥ እንተ ሰተኹም፥ ወይ ገለ እንተ ገበርኩም፥ ኵሉ ንኽብሪ ኣቦና ግበርዎ። ንኣይሁድ ኮነ ንግሪካውያን ወይ ንቤተ ክርስቲያን ኣቦና መዓንቀፊ ኣይትኹኑ፤ ስለዙይ ኣነ፥ ንሳቶም ምእንቲ ኽድሕኑ፥ ፅቡቕ እቶም ብዙሓት እምበር ፅቡቕ ርእሰይ እንተይደለኹ፥ ንዅሉ ሰብ ብዅሉ ደስ ከብል እፅዕር ኣለኹ።