1 Corinthnao 10

10 ¹Ivānaobing, hi nathumli phaningung ngasakngai: ishāvā ngarā saikora muiyā azingli leida, saikora tara̱ eina ngaruivai. ²Athum saikora muiyā eina tara̱li Mosesli ra̱hikmi. ³Athum saikorana manglāwui kashakazā akhamāng shai, ⁴kala saikorana manglāwui mangkhavai akhamāng manga, kaja athumli shurkazata manglāwui lunghārwui eina athumna manga; lunghār chiya Khristana. ⁵Kha ithumwui Avā chi athumwui mikachungkha chili ningyāng maungmana, kaja athum lamhāngli sāthata.

⁶Ara athumna ningchāng thāda ithumna makhayā ot maningchāng khavai, ot hi ithumwui vang ngayo khavai ngasāhaowa. ⁷Athumwui ngachaili kaikha thāda meoma̱li kapha̱ masāluialu; hithada kapihaida lei: "mibing china phāshak phazā khavai pama, laga ngareo khavai ngakarthuihaowa." ⁸Athumwui ngachaili kaikhana sai thāda, ithum shāmkasa masausa. Chitharan zimiksho akhamāng eina mi 23,000 thihaowa. ⁹Athumwui ngachaili kaikhana chāng tamda phara̱bing eina sāthata kahai chithada, ithumna Khristali chāng matamausa. ¹⁰Kala athumwui ngachaili kaikhana ngurngur matuilaga sākakathāna sāthata kahai chithada, ngurngur mamatuialu. ¹¹Ot hi athumli acham sāda shokkahaina, kala achābingwui angachāng rākahai ithumwui vang hāngkhamathin sāda kapihaira. ¹²Chieina, kachikathā a nganinga da phaningakha a makonglui khavai khalatta nganātitkhuiranu. ¹³Mi saikorali kharā kasui maningla, kasui khangatei akhala nathumli maseizatmana. Kala ithumwui Avā chi chisin kahaina: ana nathumna phunshap chila lāngda kasuili mazang ngasakmara, kha nathumna chi khāngshap khavai kasui chiwui eina yamshokwui apong ngarānmira.

¹⁴Chieina, leikasābing, meoma̱li khorumki eina yāmulu. ¹⁵Ina theithangmei mibingli hāng thāda nathumli hāngna; ina kahāng chi nathum khalatta bichar sālu. ¹⁶Ithumna somi sokhamiwui tengkot chi Khristawui asheeli khangarum maningmala? Ithumna sākhai khamui chi Khristawui phasāli khangarum maningmala? ¹⁷Khamui akhamāng leiwui vang, ithum tarākha leilala phasā akhamānga, kaja ithum saikorana khamui akhamāng chi khangarumna. ¹⁸Israelwui mibingli phaninglu: pha̱kaphayā shaibing chi hanphutli ngarumpaibing maningmala? ¹⁹Chithada ina khi hāngngaina: meoma̱li pha̱kahai kashakazā chi khikha akhala, lah meoma̱ chi khikha akhala? ²⁰Maningmana, kha Avā makatheibingna pha̱phayā chi, athumna ithumwui Avāli maningla kameobingli pha̱phayai; kala kameobing eina nathumna ngarumsak chi ina masākhangaimana. ²¹Nathumna Prohowui tengkot kala kameobingwui tengkot chi mangrarmana; Prohowui table kala kameobingwui table chi nathumna ngarumpairarmana. ²²Lah ithumna Proholi yuikashi mathuk ngasak khavai hotnai? Ithum ali pangmeira?

²³"Ot saikora sāpaira," kha ot saikorana mangachonmana. "Ot saikora sāpaira," kha ot saikorana reisang masāmana. ²⁴Khipānakha khalattawui kaphā maphālu, kha khongnainaowui kaphā phālu. ²⁵Sā markli yorsang chi saikora mashun-makhuiwui vang khikha mangahānkāla shailu, ²⁶kaja "ngalei kala chiwui alungli khalei ot saikora ithumwui Avāwuina." ²⁷Mashitkasanga mi akhana nali phazā khavai hoda nathumna vākhangaiakha, nathumwui mangāli sangmi chi saikora mashun-makhuiwui vang khikha mangahānkāla shailu. ²⁸Kha kachikathā akhana nathumli, "Hi pha̱kaphayāli chigat kahaina," da hāngakha, nathumli kahāng chiwui vang kala mashun-makhuiwui vang chi mashailu. ²⁹Ina hāngga chiya nathum khalattawui mashun-makhui maningla, kha mi kateiwuina. Kaja khisāda mi kateiwui mashun-makhuina iwui ningkhān chi bichar sārakhala? ³⁰Ina ningkashi eina shaiakha, ina ningkashi mihai chiwui vang khisāda ili shātrakhala?

³¹Chithada nathumna shailala, manglala, khikha sālala, ithumwui Avāwui khayākakāwui vang ot saikora sālu. ³²Jihudibingli nilala, Greekbingli nilala, ithumwui Avāwui churchli nilala kakhayak masāluiranu, ³³chithada I khalattawui kaphā maphāla, mi kachungkhawui kaphā phāda, athum kahui samphang khavai ina ot saikorali mi saikorawui ningyāng ungkhavai hotnai.