1 Corinthnao 11

11 ¹Ina Khristawui thada sāhai athishurda, nathumna iwui thada sālu.

²Ara ina nathumli masot mi, khikhalajila nathumna ot saikorali ili phaningungda, kala ina nathumli tamchithei kahai athishurda khamashung tamchithei chili mayona. ³Ara ina nathumli theingasakngai: mayarnao kachiva̱wui kui chi Khristana, sha̱naowui kui chi mayarnaona, kala ithumwui Avā chi Khristawui kuina. ⁴Mayarnao kachiva̱ akui farormi seihā sā nilala phongmi nilala kasā chiya akui khayā lāna. ⁵Kha sha̱nao kachiva̱ akui mafarormila seihā sā nilala phongmi nilala kasā chiya akui khayā lāna; chiya akui si kahai sha̱nao eina khangatei maleimana. ⁶Sha̱naona akui farormi khavai mamayāmada, awui kuisam chichāpranu; kha sha̱naona kuisam chichāp nilala kui si nilala chi kakhayak otna, chieina akui farormiranu. ⁷Mayarnaona akui farormipaimana, khikhalajila a ithumwui Avāwui sakrin kala tekhamateina; kha sha̱nao chi mayarnaowui tekhamateina. ⁸Khikhalajila mayarnao chi sha̱naowui eina kharāmana, kha sha̱nao chi mayarnaowui eina kharāna. ⁹Kala mayarnao chi sha̱naowui vang sākhuimana, kha sha̱nao chi mayarnaowui vang sākhuihaowa. ¹⁰Chiwui vang eina kazingraobingwui vang eina sha̱naona akuili pangshapwui machut leiphalungra.

¹¹Chithālala, Prohowui lungli sha̱nao chi mayarnao maleila leipaimana, kala mayarnaola sha̱nao maleila leipaimana. ¹²Khikhalajila sha̱nao chi mayarnaowui eina kharā thāda, mayarnaola sha̱naowui eina kharāna; kala ot saikora chi ithumwui Avāwui eina kharāna. ¹³Nathum khalatta bichar sālu: sha̱naona akui mafarormila ithumwui Avāli seihā sā khavai achamla? ¹⁴Khangachā khalattanala mayarnao kuisam sāngsang leiakha chi awui vang maishida da nathumli matamchitheimalā, ¹⁵kha sha̱naona kuisam sāngsang leiakha, chi awui tekhamateina, khikhalajila awui kuisam chi faror khavai ali mikahaina. ¹⁶Kachikathāna hiwui pongli ngaphat khavai ningchāngakha, ithumli chikathāwui khangachā maleimana, ithumwui Avāwui churchbingli maleimana.

Prohowui Table Khayā Lānhai

¹⁷Hi ningkhami hāngchitheida, ina nathumli masot mamimana, khikhalajila nathum rākazip chi kaphā khavai maningla makaphā khavaina. ¹⁸Khare, nathum church thada rākazip tharan, nathumwui ngachaili makai lei kaji ina shā, kala ina kaikha shitsanga. ¹⁹Kaja nathumwui ngachaili akachangabing theingasak khavai, makai lei phalungra. ²⁰Chieina, nathum apam akhali rākazip tharan, nathumna kazā chi Prohowui phazāt maningmana. ²¹Kaja nathum phazā tharan, mi kachiva̱na khalattawui phazāt chi rida shai; akhana thaihaowa, khangatei akhana maripa. ²²Nathumna phāshak phazā khavai shim maleimalā? Lah nathumna ithumwui Avāwui churchli ningkachaida khikha maleibingli maishi ngasakra? Ina nathumli khi hāngrakhala? Nathumli ina masot mirakhala? Hiwui pongli ina nathumli masot mimana.

²³Kaja ina Prohowui eina samphangda nathumli inala mihai chi hina: ali yansaida ngayā chili Proho Jishuna khamui khuida,

²⁴ningkashi mihailaga, chi serkhaida hānga, "Hi iwui asā, nathumwui vangna; ili phaningungda hi sālu." ²⁵Chithada sāda, phazāt tākam eina, ana tengkot chila khuida hānga, "Hi tengkot chi iwui ashee eina sākahai kadhara tuingashitna. Nathumna hi khamang kachida, ili phaningungda hi sālu."

²⁶Nathumna hi khamui shai kala hi tengkot khamang kachida, ana marāranglakha eina tangda Prohowui kathi chi phongshokra.

²⁷Chieina, khipānakha makānvai thāda Prohowui khamui shaida lah tengkot khamanga chi Prohowui asā kala asheeli khayon kasāna. ²⁸Mi akhana khalatta chāng tamyangkhuilaga, chiwui thili khamui chi shaida tengkot chi mangranu. ²⁹Kaja khipānakha phasā chi matheikhuila kashaia kala khamanga a chi, khalattawui tungli bichar shaida manga. ³⁰Chiwui vang eina nathumwui ngachaili mi kachungkha makakā kala kagazā, kala kaikha thihaira. ³¹Kha ithumna khalatta khamashung eina bichar sāpaisi kaja, ithumli bichar masāmara. ³²Prohona ithumli bichar sā tharan, ithum okathui ngasoda yonngasak masā khavai, ana ithumli hāngkhamachinna. ³³Chieina, ivānaongarā, nathum phazā khavai rākazip tharan, akha eina akhali ngarailu. ³⁴Nathumwui rākazip chi nathumwuitungli bichar rā masā khavai, khipānakha thaihaoakha, ana shimli shairanu. Kha khalei chi ina rā tharan ngahānkāra.