1 KwabaseKhorinte 11

11 ¹Lingisani mina, njengoba nami ngilingisa uKhristu.

²Manje ngiyanincoma ngokungikhumbula ezintweni zonke nangokugcina amasiko njengoba nganiwadlulisela. ³Manje ngifuna ukuba nazi lokhu: inhloko yayo yonke indoda inguKhristu, inhloko yowesifazane iyindoda, kanti inhloko kaKhristu inguBaba wethu. ⁴Yonke indoda ethandazayo noma ephrofethayo imbozile ikhanda layo iyalidumaza ikhanda layo. ⁵Kodwa wonke owesifazane othandazayo noma ophrofethayo ikhanda lakhe lingambozwe uyalidumaza ikhanda lakhe—kufana nokuba liphuciwe. ⁶Uma owesifazane engavumi ukumboza ikhanda lakhe, izinwele zakhe mazigundwe; kodwa njengoba kuyihlazo kowesifazane ukugundwa izinwele noma ukuphucwa ikhanda, makalimboze ikhanda lakhe. ⁷Indoda akufanele imboze ikhanda layo, njengoba iwumfanekiso nenkazimulo kaBaba wethu; owesifazane uyinkazimulo yendoda. ⁸Ngokuba indoda ayivelanga kowesifazane, kodwa owesifazane wavela endodeni. ⁹Futhi indoda ayidalelwanga owesifazane, kepha owesifazane wadalelwa indoda. ¹⁰Ngakho-ke owesifazane kufanele abe nophawu lwegunya ekhanda lakhe, ngenxa yezingelosi.

¹¹Nokho, eNkosini owesifazane akazimele ngaphandle kwendoda, nendoda ayizimele ngaphandle kowesifazane. ¹²Ngokuba njengoba owesifazane avela endodeni, kanjalo indoda iza ngowesifazane; konke kuvela kuBaba wethu. ¹³Zahluleleni nina ngokwenu: kufanele yini ukuba owesifazane athandaze kuBaba wethu, ikhanda lakhe lingambozwe? ¹⁴Imvelo uqobo lwayo ayinifundisi yini ukuthi izinwele ezinde endodeni ziyihlazo kuyo, ¹⁵kodwa uma owesifazane enezinwele ezinde, kuyinkazimulo kuye, ngokuba izinwele zakhe uziphiwe zibe yisembozo. ¹⁶Uma ekhona othanda ukuphikisana ngalokhu, thina asinalo isiko elinjalo, namabandla kaBaba wethu awanalo.

Ukudelelwa Kwetafula LeNkosi

¹⁷Ekuninikezeni lo myalo, anginincomi, ngokuba nibuthana hhayi ngokuba kube ngcono kodwa kube kubi kakhulu. ¹⁸Ngokuba kuqala, lapho nibuthana nilibandla, ngizwa kukhona ukwehlukana phakathi kwenu, futhi ngikukholwa kwengxenye. ¹⁹Ngokuba ukwehlukana kumele kube khona ngisho naphakathi kwenu, ukuze kubonakale abaqotho phakathi kwenu. ²⁰Ngakho-ke, lapho nibuthana ndawonye, akusiso iSidlo seNkosi enisidlayo. ²¹Ngokuba lapho nidla, yilowo nalowo ushesha phambili ngesidlo sakhe—omunye alambe, omunye adakwe. ²²Aninazo yini izindlu zokudlela nezokuphuzela? Noma niyalidelela yini ibandla likaBaba wethu, nihlazise labo abangenalutho? Ngithini kini? Nginincome yini? Anginincomi ngalokhu.

²³Ngokuba ngakwamukela eNkosini lokho engakudlulisela nakini: iNkosi uJesu, ngobusuku eyakhashelwa ngabo, yathatha isinkwa,

²⁴isibongile, yasihlephula yathi: “Lokhu kungumzimba wami, owaninikelwa; yenzani lokhu ningikhumbule.” ²⁵Ngokunjalo, emva kwesidlo, yathatha nenkomishi, yathi: “Le nkomishi iyisivumelwano esisha egazini lami. Yenzani lokhu, njalo lapho niyiphuza, ningikhumbule.”

²⁶Njalo lapho nidla lesi sinkwa niphuze le nkomishi, nimemezela ukufa kweNkosi ize ifike.

²⁷Ngakho noma ngubani odla isinkwa noma aphuze inkomishi yeNkosi ngokungafanele, unecala lomzimba negazi leNkosi. ²⁸Umuntu makazihlole yena, bese edla isinkwa ephuza nenkomishi. ²⁹Ngokuba odlayo ephuza engawuqondi umzimba, udlela aphuzele ukwahlulelwa kwakhe. ³⁰Kungakho abaningi phakathi kwenu bebuthakathaka begula, nabanye sebelele ubuthongo bokufa. ³¹Kodwa uma besizahlulela ngokufanele, besingeke sahlulelwe. ³²Lapho iNkosi isahlulela, iyasilaya, ukuze singalahlwa kanye nezwe. ³³Ngakho-ke, bazalwane bami, lapho nibuthana ukuba nidle, lindelanani. ³⁴Uma ekhona olambile, makadlele ekhaya, ukuze ukubuthana kwenu kungalethi ukwahlulelwa. Okunye ngizokuhlela lapho ngifika.