1 കൊരിന്ത്യർ 11 FHB Father's Heart Bible™

11 ¹ഞാൻ ക്രിസ്തുവിനെ അനുകരിക്കുന്നതുപോലെ നിങ്ങളും എന്നെ അനുകരിക്കുന്നവരായിരിക്കുവിൻ.

²എല്ലാ കാര്യത്തിലും എന്നെ ഓർക്കുകയും ഞാൻ നിങ്ങൾക്കു കൈമാറിയ പാരമ്പര്യങ്ങൾ പാലിക്കുകയും ചെയ്യുന്നതിൽ ഞാൻ നിങ്ങളെ പ്രശംസിക്കുന്നു. ³ഇതു നിങ്ങൾ അറിയണമെന്നു ഞാൻ ആഗ്രഹിക്കുന്നു: ഓരോ പുരുഷന്റെയും തല ക്രിസ്തുവാണ്, സ്ത്രീയുടെ തല പുരുഷനാണ്, ക്രിസ്തുവിന്റെ തല നമ്മുടെ പിതാവാണ്. ⁴തല മൂടിക്കൊണ്ടു പ്രാർഥിക്കുകയോ പ്രവചിക്കുകയോ ചെയ്യുന്ന ഓരോ പുരുഷനും തന്റെ തലയെ അപമാനിക്കുന്നു. ⁵എന്നാൽ തല മൂടാതെ പ്രാർഥിക്കുകയോ പ്രവചിക്കുകയോ ചെയ്യുന്ന ഓരോ സ്ത്രീയും തന്റെ തലയെ അപമാനിക്കുന്നു—അതു തല മൊട്ടയടിച്ചതിനു തുല്യമത്രേ. ⁶ഒരു സ്ത്രീ തല മൂടാൻ വിസമ്മതിക്കുന്നെങ്കിൽ അവളുടെ മുടി മുറിച്ചുകളയട്ടെ; എന്നാൽ മുടി മുറിക്കുന്നതോ തല മൊട്ടയടിക്കുന്നതോ സ്ത്രീക്കു ലജ്ജാകരമാകയാൽ അവൾ തല മൂടട്ടെ. ⁷പുരുഷൻ നമ്മുടെ പിതാവിന്റെ പ്രതിച്ഛായയും തേജസ്സും ആകയാൽ തന്റെ തല മൂടരുത്; സ്ത്രീയോ പുരുഷന്റെ തേജസ്സാകുന്നു. ⁸പുരുഷൻ സ്ത്രീയിൽനിന്നല്ല, സ്ത്രീ പുരുഷനിൽനിന്നത്രേ ഉണ്ടായത്. ⁹പുരുഷൻ സ്ത്രീക്കുവേണ്ടിയല്ല, സ്ത്രീ പുരുഷനുവേണ്ടിയത്രേ സൃഷ്ടിക്കപ്പെട്ടത്. ¹⁰അതുകൊണ്ടു ദൂതന്മാർനിമിത്തം സ്ത്രീ തന്റെ തലയിൽ അധികാരത്തിന്റെ അടയാളം ധരിക്കേണ്ടതാകുന്നു.

¹¹എങ്കിലും കർത്താവിൽ സ്ത്രീ പുരുഷനെക്കൂടാതെയല്ല, പുരുഷൻ സ്ത്രീയെക്കൂടാതെയുമല്ല. ¹²സ്ത്രീ പുരുഷനിൽനിന്നുണ്ടായതുപോലെ പുരുഷനും സ്ത്രീമുഖാന്തരം ഉണ്ടാകുന്നു; എല്ലാം നമ്മുടെ പിതാവിൽനിന്നത്രേ. ¹³നിങ്ങൾതന്നെ വിധിക്കുവിൻ: തല മൂടാതെ ഒരു സ്ത്രീ നമ്മുടെ പിതാവിനോടു പ്രാർഥിക്കുന്നതു ഉചിതമോ? ¹⁴പുരുഷനു നീണ്ട മുടി അപമാനമാണെന്നു പ്രകൃതിതന്നെ നിങ്ങളെ പഠിപ്പിക്കുന്നില്ലയോ, ¹⁵എന്നാൽ സ്ത്രീക്കു നീണ്ട മുടിയുണ്ടെങ്കിൽ, അവളുടെ മുടി മൂടുവാനായി അവൾക്കു നല്കപ്പെട്ടിരിക്കുന്നതിനാൽ, അതു അവൾക്കു തേജസ്സാകുന്നു. ¹⁶ഇതിനെക്കുറിച്ചു തർക്കിക്കുവാൻ ആർക്കെങ്കിലും താത്പര്യമുണ്ടെങ്കിൽ, ഞങ്ങൾക്ക് അങ്ങനെയൊരു ആചാരമില്ല, നമ്മുടെ പിതാവിന്റെ സഭകൾക്കുമില്ല.

കർത്താവിന്റെ മേശ അവമാനിക്കപ്പെടുന്നു

¹⁷ഈ നിർദേശം നല്കുമ്പോൾ ഞാൻ നിങ്ങളെ പ്രശംസിക്കുന്നില്ല, എന്തെന്നാൽ നിങ്ങൾ കൂടിവരുന്നതു നന്മയ്ക്കല്ല, തിന്മയ്ക്കത്രേ. ¹⁸ഒന്നാമതായി, നിങ്ങൾ സഭയായി കൂടിവരുമ്പോൾ നിങ്ങളുടെ ഇടയിൽ ഭിന്നതകളുണ്ടെന്നു ഞാൻ കേൾക്കുന്നു, അതു ഭാഗികമായി ഞാൻ വിശ്വസിക്കുകയും ചെയ്യുന്നു. ¹⁹നിങ്ങളുടെ ഇടയിൽ യോഗ്യരായവർ വെളിപ്പെടേണ്ടതിന് നിങ്ങളുടെ ഇടയിൽ ഭിന്നതകൾ ഉണ്ടാകേണ്ടതുതന്നെ. ²⁰ആകയാൽ നിങ്ങൾ ഒരിടത്തു കൂടിവരുമ്പോൾ നിങ്ങൾ ഭക്ഷിക്കുന്നതു കർത്താവിന്റെ അത്താഴമല്ല. ²¹എന്തെന്നാൽ ഭക്ഷിക്കുമ്പോൾ ഓരോരുത്തനും സ്വന്തം അത്താഴവുമായി തിടുക്കത്തിൽ മുന്നോട്ടു നീങ്ങുന്നു—ഒരുവൻ വിശന്നിരിക്കുന്നു, മറ്റൊരുവൻ മത്തനായിത്തീരുന്നു. ²²തിന്നുവാനും കുടിക്കുവാനും നിങ്ങൾക്കു വീടുകളില്ലയോ? അതോ നിങ്ങൾ നമ്മുടെ പിതാവിന്റെ സഭയെ നിന്ദിക്കുകയും ഒന്നുമില്ലാത്തവരെ ലജ്ജിപ്പിക്കുകയും ചെയ്യുന്നുവോ? ഞാൻ നിങ്ങളോട് എന്തു പറയേണ്ടു? നിങ്ങളെ പ്രശംസിക്കണമോ? ഇതിൽ ഞാൻ നിങ്ങളെ പ്രശംസിക്കുന്നില്ല.

²³ഞാൻ നിങ്ങൾക്കു കൈമാറിയതു കർത്താവിൽനിന്നു ഞാൻ പ്രാപിച്ചതത്രേ: കർത്താവായ യേശു താൻ ഒറ്റിക്കൊടുക്കപ്പെട്ട രാത്രിയിൽ അപ്പമെടുത്തു,

²⁴സ്തോത്രം ചെയ്തശേഷം നുറുക്കി, “ഇതു നിങ്ങൾക്കുവേണ്ടിയുള്ള എന്റെ ശരീരമാകുന്നു; എന്നെ ഓർക്കേണ്ടതിന് ഇതു ചെയ്യുവിൻ” എന്നു പറഞ്ഞു. ²⁵അങ്ങനെതന്നെ അത്താഴത്തിനുശേഷം അവിടുന്നു പാനപാത്രവും എടുത്തു, “ഈ പാനപാത്രം എന്റെ രക്തത്തിലുള്ള പുതിയ ഉടമ്പടിയാകുന്നു. നിങ്ങൾ ഇതു കുടിക്കുമ്പോഴൊക്കെയും എന്നെ ഓർക്കേണ്ടതിന് ഇതു ചെയ്യുവിൻ” എന്നു പറഞ്ഞു.

²⁶ഈ അപ്പം തിന്നുകയും ഈ പാനപാത്രം കുടിക്കുകയും ചെയ്യുമ്പോഴൊക്കെയും അവിടുന്നു വരുവോളം നിങ്ങൾ കർത്താവിന്റെ മരണം പ്രസ്താവിക്കുന്നു.

²⁷ആകയാൽ അയോഗ്യമായി കർത്താവിന്റെ അപ്പം തിന്നുകയോ പാനപാത്രം കുടിക്കുകയോ ചെയ്യുന്നവൻ കർത്താവിന്റെ ശരീരത്തിനും രക്തത്തിനും കുറ്റക്കാരനാകുന്നു. ²⁸ഒരുവൻ തന്നെത്തന്നെ പരിശോധിക്കട്ടെ, പിന്നെ അപ്പം തിന്നുകയും പാനപാത്രം കുടിക്കുകയും ചെയ്യട്ടെ. ²⁹ശരീരം തിരിച്ചറിയാതെ തിന്നുകയും കുടിക്കുകയും ചെയ്യുന്നവൻ തനിക്കുതന്നെ ശിക്ഷാവിധി തിന്നുകയും കുടിക്കുകയും ചെയ്യുന്നു. ³⁰അതുകൊണ്ടത്രേ നിങ്ങളുടെ ഇടയിൽ പലരും ബലഹീനരും രോഗികളും ആയിരിക്കുന്നതും കുറെപ്പേർ നിദ്രപ്രാപിച്ചതും. ³¹എന്നാൽ നാം നമ്മെത്തന്നെ ശരിയായി വിധിച്ചിരുന്നെങ്കിൽ നാം വിധിക്കപ്പെടുകയില്ലായിരുന്നു. ³²കർത്താവു നമ്മെ വിധിക്കുമ്പോൾ, നാം ലോകത്തോടുകൂടെ ശിക്ഷാവിധിക്കു പാത്രമാകാതിരിക്കേണ്ടതിന് അവിടുന്നു നമ്മെ ശിക്ഷിച്ചു നന്നാക്കുന്നു. ³³ആകയാൽ എന്റെ സഹോദരീസഹോദരന്മാരേ, നിങ്ങൾ ഭക്ഷിക്കാൻ കൂടിവരുമ്പോൾ അന്യോന്യം കാത്തിരിക്കുവിൻ. ³⁴ആർക്കെങ്കിലും വിശക്കുന്നെങ്കിൽ, നിങ്ങളുടെ കൂടിവരവു ശിക്ഷാവിധിക്കു കാരണമാകാതിരിക്കേണ്ടതിന് അവൻ വീട്ടിൽവച്ചു ഭക്ഷിക്കട്ടെ. ശേഷിക്കുന്നതു ഞാൻ വരുമ്പോൾ ക്രമപ്പെടുത്തും.