1 Corinto 11

11 ¹Awata ninyo ako, maingon nga ako nag-awat usab kang Cristo.

²Karon ginadayeg ko kamo kay ginahinumdoman ninyo ako sa tanang butang ug ginahuptan ninyo ang mga tulumanon sumala sa akong gitunol kaninyo. ³Karon buot kong masayran ninyo: ang ulo sa matag lalaki mao si Cristo, ang ulo sa babaye mao ang lalaki, ug ang ulo ni Cristo mao ang atong Amahan. ⁴Ang matag lalaki nga mag-ampo o managna nga tinabonan ang iyang ulo nagpakaulaw sa iyang ulo. ⁵Apan ang matag babaye nga mag-ampo o managna nga wala taboni ang iyang ulo nagpakaulaw sa iyang ulo—sama ra kini nga gikiskisan ang iyang ulo. ⁶Kon ang babaye dili motabon sa iyang ulo, putlon ang iyang buhok; apan tungod kay makauulaw alang sa babaye nga maputlan ang iyang buhok o makiskisan ang iyang ulo, tabonan niya ang iyang ulo. ⁷Ang lalaki dili angay motabon sa iyang ulo, kay siya mao ang hulagway ug himaya sa atong Amahan; ang babaye mao ang himaya sa lalaki. ⁸Kay ang lalaki wala maggikan sa babaye, kondili ang babaye gikan sa lalaki. ⁹Ni gibuhat ang lalaki alang sa babaye, kondili ang babaye alang sa lalaki. ¹⁰Busa ang babaye angay nga may timaan sa pagbulot-an diha sa iyang ulo, tungod sa mga anghel.

¹¹Bisan pa niini, diha sa Ginoo ang babaye dili mahimulag sa lalaki, ni ang lalaki mahimulag sa babaye. ¹²Kay maingon nga ang babaye gikan sa lalaki, mao usab nga ang lalaki pinaagi sa babaye; ang tanan naggikan sa atong Amahan. ¹³Paghukom kamo alang sa inyong kaugalingon: angay ba nga mag-ampo ang babaye sa atong Amahan nga wala taboni ang iyang ulo? ¹⁴Dili ba ang kinaiyahan mismo nagatudlo kaninyo nga ang taas nga buhok sa lalaki makauulaw alang kaniya, ¹⁵apan kon ang babaye may taas nga buhok, kini mao ang iyang himaya, kay ang iyang buhok gihatag kaniya ingon nga tabon. ¹⁶Kon aduna may buot makiglalis mahitungod niini, wala kami niana nga batasan, ni ang mga iglesia sa atong Amahan.

Gipakaulawan ang Lamesa sa Ginoo

¹⁷Sa paghatag niini nga sugo, dili ko kamo dayegon, kay kamo nagatigom dili alang sa kaayohan kondili sa kadaot. ¹⁸Kay una sa tanan, kon kamo magtigom ingon nga iglesia, nakadungog ako nga adunay mga pagkabahinbahin taliwala kaninyo, ug sa usa ka bahin nagatuo ako niini. ¹⁹Kay kinahanglan gayod nga adunay mga pagkabahinbahin taliwala kaninyo, aron mapadayag ang mga matuod diha kaninyo. ²⁰Busa, kon kamo magtigom sa usa ka dapit, dili mao ang Panihapon sa Ginoo ang inyong gikaon. ²¹Kay samtang kamo nagakaon, ang matag usa nagadali-dali sa iyang kaugalingong panihapon—ang usa gigutom, ang usa nahubog. ²²Wala ba kamoy mga balay nga kan-anan ug imnanan? O ginatamay ba ninyo ang iglesia sa atong Amahan ug ginapakaulawan ang mga walay bisan unsa? Unsa may akong isulti kaninyo? Dayegon ko ba kamo? Dili ko kamo dayegon tungod niini.

²³Kay nadawat ko gikan sa Ginoo ang akong gitunol usab kaninyo: ang Ginoong Jesus, sa gabii nga siya gibudhian, mikuha ug tinapay,

²⁴ug human makapasalamat, iya kining gipikaspikas ug miingon, “Kini mao ang akong lawas, alang kaninyo; buhata ninyo kini sa paghinumdom kanako.” ²⁵Sa samang paagi, human sa panihapon, mikuha usab siya sa kopa, nga nag-ingon, “Kini nga kopa mao ang bag-ong kasabotan diha sa akong dugo. Buhata ninyo kini, sa matag higayon nga kamo moinom niini, sa paghinumdom kanako.”

²⁶Sa matag higayon nga kamo mokaon niini nga tinapay ug moinom niini nga kopa, ginamantala ninyo ang kamatayon sa Ginoo hangtod nga siya moabot.

²⁷Busa si bisan kinsa nga mokaon sa tinapay o moinom sa kopa sa Ginoo sa dili takos nga paagi, sad-an batok sa lawas ug dugo sa Ginoo. ²⁸Susihon sa tawo ang iyang kaugalingon, ug unya mokaon sa tinapay ug moinom sa kopa. ²⁹Kay si bisan kinsa nga mokaon ug moinom nga wala moila sa lawas, nagakaon ug nagainom ug hukom batok sa iyang kaugalingon. ³⁰Mao kana nga daghan kaninyo ang maluya ug masakiton, ug ang uban nangatulog na. ³¹Apan kon atong hukman ang atong kaugalingon sa hustong paagi, dili kita pagahukman. ³²Kon kita hukman sa Ginoo, ginadisiplina kita niya, aron dili kita pagasilotan uban sa kalibotan. ³³Busa, mga igsoon ko, kon kamo magtigom aron sa pagkaon, maghulatay kamo sa usag usa. ³⁴Kon aduna may gigutom, mokaon siya sa balay, aron ang inyong panagtigom dili magdala ug hukom. Ang uban husayon ko kon moabot ako.