1 Mga Corinto 11

11 ¹Tularan ninyo ako, gaya ng pagtulad ko kay Cristo.

²Ngayon ay pinupuri ko kayo dahil inaalala ninyo ako sa lahat ng bagay at iniingatan ang mga tradisyon gaya ng ibinigay ko sa inyo. ³Ngayon ay nais kong malaman ninyo: ang ulo ng bawat lalaki ay si Cristo, ang ulo ng babae ay ang lalaki, at ang ulo ni Cristo ay ang ating Ama. ⁴Bawat lalaking nananalangin o nanghuhula na natatakpan ang ulo ay nilalapastangan ang kaniyang ulo. ⁵Ngunit bawat babaing nananalangin o nanghuhula na walang takip ang ulo ay nilalapastangan ang kaniyang ulo—katulad ito ng pagiging kalbo. ⁶Kung ayaw takpan ng babae ang kaniyang ulo, gupitin na ang kaniyang buhok; ngunit yamang kahiya-hiya para sa babae ang gupitin ang kaniyang buhok o kalbuhin ang kaniyang ulo, takpan niya ang kaniyang ulo. ⁷Hindi dapat takpan ng lalaki ang kaniyang ulo, sapagkat siya ang larawan at kaluwalhatian ng ating Ama; ang babae ang kaluwalhatian ng lalaki. ⁸Sapagkat ang lalaki ay hindi nagmula sa babae, kundi ang babae ay mula sa lalaki. ⁹Ni hindi nilikha ang lalaki para sa babae, kundi ang babae para sa lalaki. ¹⁰Kaya dapat magkaroon ang babae ng tanda ng awtoridad sa kaniyang ulo, dahil sa mga anghel.

¹¹Gayunman, sa Panginoon ay hindi malaya ang babae nang hiwalay sa lalaki, ni ang lalaki nang hiwalay sa babae. ¹²Sapagkat kung paanong ang babae ay nagmula sa lalaki, gayundin ang lalaki ay nagmumula sa pamamagitan ng babae; ang lahat ng bagay ay mula sa ating Ama. ¹³Humatol kayo para sa inyong sarili: nararapat ba para sa babae na manalangin sa ating Ama nang walang takip ang ulo? ¹⁴Hindi ba itinuturo mismo ng kalikasan sa inyo na kahihiyan para sa lalaki ang mahabang buhok, ¹⁵ngunit kung ang babae ay may mahabang buhok, ito ay kaniyang kaluwalhatian, sapagkat ibinigay sa kaniya ang kaniyang buhok bilang pantakip? ¹⁶Kung sinuman ay nais makipagtalo tungkol dito, wala kaming ganitong kaugalian, ni ang mga iglesya ng ating Ama.

Nilapastangan ang Hapag ng Panginoon

¹⁷Sa pagbibigay ng tagubiling ito, hindi ko kayo pinupuri, dahil kayo ay nagkakatipun-tipon hindi para sa ikabubuti kundi sa ikasasama. ¹⁸Sapagkat una sa lahat, kapag nagtitipon kayo bilang iglesya, nababalitaan kong may mga pagkakabaha-bahagi sa inyo, at bahagya ko itong pinaniniwalaan. ¹⁹Sapagkat kinakailangan pang magkaroon ng mga pagkakabaha-bahagi sa inyo, upang mahayag kung sino ang tunay sa inyo. ²⁰Kaya nga, kapag nagtitipon kayo sa isang lugar, hindi ang Hapunan ng Panginoon ang inyong kinakain. ²¹Sapagkat sa inyong pagkain, ang bawat isa ay nagmamadaling maunang kumain ng sariling hapunan—ang isa ay nagugutom, ang isa naman ay nalalasing. ²²Wala ba kayong mga bahay para kainan at inuman? O hinahamak ba ninyo ang iglesya ng ating Ama at ipinapahiya ang mga walang-wala? Ano ang sasabihin ko sa inyo? Pupurihin ko ba kayo? Hindi ko kayo pinupuri para dito.

²³Sapagkat tinanggap ko mula sa Panginoon ang ibinahagi ko rin sa inyo: ang Panginoong Jesus, nang gabing siya ay ipagkanulo, ay kumuha ng tinapay,

²⁴at matapos magpasalamat, pinagputul-putol niya ito at sinabi, “Ito ang aking katawan, para sa inyo; gawin ninyo ito bilang pag-alaala sa akin.” ²⁵Gayundin, matapos ang hapunan, kinuha rin niya ang kopa, na sinasabi, “Ang kopang ito ang bagong tipan sa aking dugo. Gawin ninyo ito, sa tuwing iinom kayo nito, bilang pag-alaala sa akin.”

²⁶Sa tuwing kakain kayo ng tinapay na ito at iinom sa kopang ito, ipinapahayag ninyo ang kamatayan ng Panginoon hanggang sa kaniyang pagdating.

²⁷Kaya ang sinumang kumakain ng tinapay o umiinom sa kopa ng Panginoon nang hindi karapat-dapat ay nagkakasala sa katawan at dugo ng Panginoon. ²⁸Suriin muna ng isang tao ang kaniyang sarili, saka kumain ng tinapay at uminom sa kopa. ²⁹Sapagkat ang sinumang kumakain at umiinom nang hindi kinikilala ang katawan ay kumakain at umiinom ng paghatol sa kaniyang sarili. ³⁰Iyan ang dahilan kung bakit marami sa inyo ang mahihina at maysakit, at hindi kakaunti ang natulog na sa kamatayan. ³¹Ngunit kung tama nating hahatulan ang ating sarili, hindi tayo hahatulan. ³²Kapag hinahatulan tayo ng Panginoon, tayo ay dinidisiplina niya, upang hindi tayo mahatulan kasama ng sanlibutan. ³³Kaya nga, mga kapatid ko, kapag nagtitipon kayo upang kumain, maghintay kayo sa isa't isa. ³⁴Kung sinuman ay nagugutom, kumain na siya sa bahay, upang ang inyong pagtitipon ay hindi maging sanhi ng paghatol. Aayusin ko ang iba pang bagay pagdating ko.