1 کرنتھیوں 11

11 ¹میری مانند بنو، جیسے میں بھی مسیح کی مانند ہوں۔

²اب میں تمہاری تعریف کرتا ہوں کہ تم ہر بات میں مجھے یاد رکھتے ہو اور اُن روایتوں پر قائم رہتے ہو جو میں نے تمہیں سونپی تھیں۔ ³اب میں چاہتا ہوں کہ تم جان لو: ہر مرد کا سر مسیح ہے، عورت کا سر مرد ہے، اور مسیح کا سر ہمارا باپ ہے۔ ⁴ہر وہ مرد جو اپنے سر کو ڈھانپ کر دعا یا نبوّت کرتا ہے، اپنے سر کی بے حُرمتی کرتا ہے۔ ⁵لیکن ہر وہ عورت جو بے پردہ سر کے ساتھ دعا یا نبوّت کرتی ہے، اپنے سر کی بے حُرمتی کرتی ہے—یہ اُس کے سر منڈوانے کے برابر ہے۔ ⁶اگر کوئی عورت اپنا سر ڈھانپنے سے انکار کرے، تو وہ اپنے بال کٹوا لے؛ لیکن چونکہ عورت کے لیے بال کٹوانا یا سر منڈوانا شرم کی بات ہے، اِس لیے وہ اپنا سر ڈھانپ لے۔ ⁷مرد کو اپنا سر نہیں ڈھانپنا چاہیے، کیونکہ وہ ہمارے باپ کی صورت اور جلال ہے؛ اور عورت مرد کا جلال ہے۔ ⁸کیونکہ مرد عورت سے نہیں نکلا، بلکہ عورت مرد سے۔ ⁹اور نہ مرد عورت کے لیے پیدا کیا گیا، بلکہ عورت مرد کے لیے۔ ¹⁰اِس لیے عورت کو فرشتوں کے سبب اپنے سر پر اختیار کا نشان رکھنا چاہیے۔

¹¹تاہم، خُداوند میں نہ عورت مرد سے آزاد ہے، اور نہ مرد عورت سے۔ ¹²کیونکہ جیسے عورت مرد سے نکلی، ویسے ہی مرد عورت کے وسیلہ سے آتا ہے؛ اور سب کچھ ہمارے باپ سے ہے۔ ¹³تم خود ہی فیصلہ کرو: کیا یہ مناسب ہے کہ عورت بے پردہ سر کے ساتھ ہمارے باپ سے دعا کرے؟ ¹⁴کیا خود فطرت تمہیں نہیں سکھاتی کہ مرد کے لیے لمبے بال رکھنا اُس کے لیے رُسوائی ہے، ¹⁵لیکن اگر عورت کے لمبے بال ہوں، تو یہ اُس کا جلال ہے، کیونکہ اُس کے بال اُسے پردے کے طور پر دیے گئے ہیں۔ ¹⁶اور اگر کوئی اِس بارے میں جھگڑا کرنا چاہے، تو ہماری ایسی کوئی رِیت نہیں، اور نہ ہمارے باپ کی کلیسیاؤں کی۔

خُداوند کی میز کی بے حُرمتی

¹⁷یہ حکم دیتے ہوئے میں تمہاری تعریف نہیں کرتا، کیونکہ تمہارا اکٹھا ہونا بہتری کے لیے نہیں بلکہ خرابی کے لیے ہوتا ہے۔ ¹⁸کیونکہ اوّل تو، جب تم کلیسیا کے طور پر جمع ہوتے ہو، تو میں سنتا ہوں کہ تمہارے درمیان تفرقے ہیں، اور مجھے کچھ کچھ اِس کا یقین بھی ہے۔ ¹⁹کیونکہ تمہارے درمیان تفرقوں کا ہونا بھی ضرور ہے، تاکہ تم میں سے جو کھرے ہیں وہ ظاہر ہو جائیں۔ ²⁰پس جب تم ایک جگہ جمع ہوتے ہو، تو یہ خُداوند کا عشائے ربانی نہیں جو تم کھاتے ہو۔ ²¹کیونکہ کھاتے وقت ہر ایک اپنا کھانا کھانے میں جلدی کرتا ہے—ایک بھوکا رہتا ہے، اور دوسرا مست ہو جاتا ہے۔ ²²کیا کھانے پینے کے لیے تمہارے پاس گھر نہیں؟ یا تم ہمارے باپ کی کلیسیا کو حقیر جانتے ہو اور اُنہیں شرمندہ کرتے ہو جن کے پاس کچھ نہیں؟ میں تم سے کیا کہوں؟ کیا تمہاری تعریف کروں؟ اِس بات میں تو میں تمہاری تعریف نہیں کرتا۔

²³کیونکہ مجھے خُداوند سے وہ ملا جو میں نے تمہیں بھی سونپا: خُداوند یسوع نے، جس رات وہ پکڑوایا گیا، روٹی لی،

²⁴اور شکر کرنے کے بعد اُسے توڑا اور کہا، ”یہ میرا بدن ہے، جو تمہارے لیے ہے؛ یہ میری یادگاری کے لیے کرو۔“ ²⁵اِسی طرح، عشائیے کے بعد، اُس نے پیالہ بھی لیا اور کہا، ”یہ پیالہ میرے خون میں نیا عہد ہے۔ جب کبھی تم اِسے پیو، تو میری یادگاری کے لیے یہ کرو۔“

²⁶کیونکہ جب کبھی تم یہ روٹی کھاتے اور یہ پیالہ پیتے ہو، تو تم خُداوند کی موت کا اعلان کرتے ہو، جب تک وہ نہ آئے۔

²⁷پس جو کوئی ناحق طور پر خُداوند کی روٹی کھائے یا اُس کا پیالہ پیے، وہ خُداوند کے بدن اور خون کا قصوروار ٹھہرے گا۔ ²⁸پس ہر شخص اپنے آپ کو آزمائے، پھر اُس روٹی میں سے کھائے اور اُس پیالے میں سے پیے۔ ²⁹کیونکہ جو کوئی بدن کی تمیز کیے بغیر کھاتا اور پیتا ہے، وہ اپنے اوپر سزا کھاتا اور پیتا ہے۔ ³⁰اِسی سبب سے تم میں سے بہت سے کمزور اور بیمار ہیں، اور کئی سو گئے ہیں۔ ³¹لیکن اگر ہم اپنے آپ کو صحیح طور پر پرکھتے، تو ہم پر سزا نہ آتی۔ ³²جب خُداوند ہماری عدالت کرتا ہے، تو وہ ہمیں تنبیہ کرتا ہے، تاکہ ہم دنیا کے ساتھ مجرم نہ ٹھہریں۔ ³³پس اے میرے بھائیو اور بہنو، جب تم کھانے کے لیے اکٹھے ہو، تو ایک دوسرے کا انتظار کرو۔ ³⁴اگر کوئی بھوکا ہو، تو وہ گھر میں کھا لے، تاکہ تمہارا اکٹھا ہونا سزا کا باعث نہ بنے۔ باقی باتوں کا فیصلہ میں آ کر کروں گا۔