Girmamawa a Sujada da Tsari

Matsaloli biyu a taronsu: rufe kai ko rashin rufewa sa'ad da ake addu'a ga Ubanmu, da Jibin Ubangiji inda masu arziki suke ci da wuri yayin da matalauta suke jin yunwa. Wannan na ƙarshe shi ne dalilin da ya sa waɗansu suke raunana da rashin lafiya — suna ci ba tare da rarrabe jikin ba. Ku jira juna.

Babi na 11.

Ku zama masu koyi da ni, kamar yadda ni ma nake koyi da Almasihu.

To, ina yaba muku domin kuna tunawa da ni cikin kome, kuna kuma riƙe da al'adun da na miƙa muku. Ina so ku sani, kan kowane namiji shi ne Almasihu, kan mace kuwa shi ne namiji, kan Almasihu kuma shi ne Ubanmu. Kowane namiji da yake addu'a ko annabci da kansa a rufe, yana rena kansa. Amma kowace mace da take addu'a ko annabci da kanta a buɗe, tana rena kanta — daidai ne da an aske kanta. Idan mace ta ƙi rufe kanta, to a yanke mata gashinta; amma da yake abin kunya ne ga mace a yanke mata gashi ko a aske mata kai, to sai ta rufe kanta. Namiji kada ya rufe kansa, da yake shi ne siffa da ɗaukakar Ubanmu; mace kuwa ita ce ɗaukakar namiji. Gama ba daga mace namiji ya fito ba, sai dai mace daga namiji. Ba a kuma halicci namiji saboda mace ba, sai dai mace saboda namiji. Saboda haka ya kamata mace ta kasance da alamar iko a kanta, saboda mala'iku.

Duk da haka, cikin Ubangiji, mace ba ta rabuwa da namiji, namiji kuma ba ya rabuwa da mace. Gama kamar yadda mace ta fito daga namiji, haka ma namiji yake zuwa ta wurin mace; kome kuwa daga Ubanmu yake. Ku yi shari'a da kanku, ya dace mace ta yi addu'a ga Ubanmu da kanta a buɗe? Ashe, dabi'a kanta ba ta koya muku cewa dogon gashi a kan namiji abin kunya ne gare shi ba, amma in mace tana da dogon gashi, ɗaukaka ce a gare ta, domin an ba ta gashinta yă zama abin lulluɓi? In wani yana so yă yi jayayya a kan haka, mu ba mu da wata al'ada irin wannan, haka ma ikilisiyoyin Ubanmu.

An Rena Teburin Ubangiji

Cikin ba da wannan umarni, ban yaba muku ba, domin kuna taruwa ba don alheri ba, sai dai don lahani. Da farko dai, sa'ad da kuke taruwa a matsayin ikilisiya, ina jin akwai tsattsaguwa a tsakaninku, na kuwa ɗan gaskata haka. Gama dole har tsattsaguwa ta kasance a tsakaninku, domin a bayyana waɗanda suke na gaskiya a cikinku. To, sa'ad da kuke taruwa wuri ɗaya, ba Jibin Ubangiji ne kuke ci ba. Gama yayin da kuke ci, kowa yana garzaya da jibinsa na kansa — wani yana jin yunwa, wani kuwa yana buguwa. Ashe, ba ku da gidaje na ci da sha? Ko kuna rena ikilisiyar Ubanmu ne, kuna kuma kunyata marasa kome? Me zan ce muku? In yaba muku? A kan wannan ba zan yaba muku ba.

Gama na karɓa daga Ubangiji abin da na kuma miƙa muku, wato Ubangiji Yesu, a daren da aka bashe shi, ya ɗauki gurasa,

bayan ya yi godiya, sai ya gutsura ta ya ce, “Wannan jikina ne, saboda ku; ku yi haka don tunawa da ni.” Haka kuma, bayan jibi, ya ɗauki kwaf, yana cewa, “Wannan kwaf shi ne sabon alkawari cikin jinina. Ku yi haka, duk sa'ad da kuke sha, don tunawa da ni.”

Duk sa'ad da kuke cin wannan gurasa, kuke kuma shan wannan kwaf, kuna shelar mutuwar Ubangiji ne har yă zo.

Saboda haka duk wanda ya ci gurasar ko ya sha kwaf na Ubangiji ba da cancanta ba, yana da laifin jiki da jinin Ubangiji. Sai mutum ya gwada kansa, sa'an nan ya ci gurasar, ya kuma sha kwaf. Gama duk wanda ya ci ya kuma sha ba tare da ya rarrabe jikin ba, yana ci yana sha hukunci a kansa ne. Shi ya sa da yawa a cikinku suke da rauni suke kuma da ciwo, waɗansu kuwa sun yi barci. Amma da mun shari'anta kanmu da kyau, da ba za a shari'anta mu ba. Sa'ad da Ubangiji yake shari'anta mu, yana horon mu ne, domin kada a kāyar da mu tare da duniya. Saboda haka, 'yan'uwana, sa'ad da kuke taruwa don ci, ku jira juna. In wani yana jin yunwa, sai ya ci a gida, domin kada taruwarku ta jawo hukunci. Sauran kuwa zan daidaita sa'ad da na zo.