1ይ ቆሮንቶስ 9 FHB Father's Heart Bible™

9 ¹ነፃ ኣይኮንኩን ድየ? ሃዋርያ ኣይኮንኩን ድየ? ንጐይታና ኢየሱስ ኣይረአኽዎን ድየ? ንስኻትኩም ኣብ ጐይታ ግብረይ ኣይኮንኩምን ድኹም? ²ንኻልኦት ሃዋርያ እንተ ዘይኮንኩ፥ ንኣኻትኩም ግና ብርግፅ ሃዋርያ እየ፤ ንስኻትኩም ኣብ ጐይታ ማሕተም ሃዋርያነተይ ኢኹም እሞ።

³ነቶም ዝምርምሩኒ ዝህቦ መኸላኸልየይ እዙይ እዩ፦ ⁴ክንበልዕ ክንሰትን መሰል የብልናን ድዩ? ⁵ከምቶም ካልኦት ሃዋርያት፥ ከም ኣሕዋት ጐይታን ከም ኬፋን፥ እትኣምን ሰበይቲ ምሳና ኽንወስድ መሰል የብልናን ድዩ? ⁶ወይ ኣነን በርናባስን ጥራሕ ኢና ካብ ስራሕ ክንቁጠብ መሰል ዘይብልና? ⁷መን እዩ ብገንዘቡ ወተሃደር ኮይኑ ዘገልግል? መን እዩ ኣታኽልቲ ወይኒ ተኺሉ ካብ ፍሪኣ ዘይበልዕ? ወይ መን እዩ መጓሰ እናጓሰየ ካብ ፀባ ዘይሰቲ?

⁸እዙይ ብሰብኣዊ ኣተሓሳስባ ጥራሕ ድየ ዝዛረብ ዘለኹ? ሕጊ ኸምኡ ኣይብልን ድዩ? ⁹ሕጊ ሙሴ፥ “እኽሊ እንትኸይድ ዘሎ ብዕራይ ኣፍ ኣይትልጐም” ይብል እዩ እሞ። ኣቦናዶ ብዛዕባ ኣብዑር ይግደስ ኣሎ? ¹⁰ወይ ፈፂሙ ምእንታና ድዩ ዝዛረብ ዘሎ? እወ፥ ምእንታና እዩ ዝተፅሓፈ፤ እቲ ዝሓርስ ብተስፋ ኽሓርስ፥ እቲ ዘኽይድ ከዓ ካብ እኽሊ ንምክፋል ብተስፋ ኽኸይድ ይግብኦ። ¹¹ንሕና መንፈሳዊ ነገር ኣባኻትኩም እንተ ዘራእና፥ ስጋዊ ነገር ካባኻትኩም ክንዓፅድ ብዙሕ ድዩ? ¹²ካልኦት ኣብ ልዕሌኹም እዝ መሰል እዙይ እንተ ተማቐሉ፥ ንሕናስ ኣይበልፅን ድዩ? ግና በዝ መሰል እዙይ ኣይተጠቐምናሉን፤ ንወንጌል ክርስቶስ ከይንዓግቶ ኢልና ደኣ ኵሉ ንፃወር።

¹³እቶም ኣብ ቤተ መቕደስ ዝሰርሑ ካብ ቤተ መቕደስ ከም ዝምገቡ፥ እቶም ኣብ መሰውኢ ዘገልግሉ ኸዓ ካብቲ ኣብ መሰውኢ ዝቐርብ መስዋእቲ ከም ዝማቐሉ ኣይትፈልጡን ድኹም? ¹⁴ከምኡ ኸዓ ጐይታ፥ እቶም ወንጌል ዝሰብኩ ካብ ወንጌል ክነብሩ ኣዘዘ። ¹⁵ኣነ ግና ካብዝ መሰል እዙይ ሓደኳ ኣይተጠቐምኩን፤ እዙይ ዝፅሕፍ ዘለኹ ድማ ንባዕለይ ክጥቀመሉ ኣይኮነን። ካብ ሓደ ሰብ ነዝ ትምክሕተይ ከንቱ ዝገብሮ፥ ምማት ይሐይሸኒ። ¹⁶ወንጌል ምስባኸይ ዝምካሓሉ ምኽንያት የብለይን፤ ተገዲደ እየ እሞ። ወንጌል እንተ ዘይሰበኽኩ ወይለይ! ¹⁷እዙይ ፈትየ እንተ ገበርክዎ ዓስቢ ኣለኒ፤ ፈትየ እንተ ዘይገበርክዎ ግና፥ ገና ናይ ዕዮ ሕድሪ ተዋሂቡኒ ኣሎ። ¹⁸እምበኣር ዓስበይ እንታይ እዩ? እናሰበኽኩ፥ ኣብ ወንጌል ዘለኒ መሰል ምሉእ ብምሉእ እንተይተጠቐምኩሉ፥ ወንጌል ብነፃ ከቕርብ እዩ።

¹⁹ካብ ኵሉ ነፃ እንተ ኾንኩ እኳ፥ ብዙሓት ምእንቲ ኽረክብ፥ ርእሰይ ንኵሉ ባርያ ገበርክዋ። ²⁰ንኣይሁድ ምእንቲ ኽረክብ፥ ንኣይሁድ ከም ኣይሁዳዊ ኾንኩ። ነቶም ኣብ ትሕቲ ሕጊ ዘለዉ ምእንቲ ኽረክብ፥ ባዕለይ ኣብ ትሕቲ ሕጊ እንተ ዘይሃለኹ እኳ፥ ከም ኣብ ትሕቲ ሕጊ ዘሎ ኾንኩ። ²¹ነቶም ብዘይ ሕጊ ዘለዉ ምእንቲ ኽረክብ፥ (ካብ ሕጊ ኣቦና ወፃኢ ዘይኮንኩስ፥ ኣብ ትሕቲ ሕጊ ክርስቶስ እየ እምበር) ነቶም ብዘይ ሕጊ ዘለዉ ኸም ብዘይ ሕጊ ዘሎ ኾንኩ። ²²ንድኹማት ምእንቲ ኽረክብ፥ ንድኹማት ድኹም ኾንኩ። ንገሊኦም ብዅሉ መገዲ ምእንቲ ኸድሕን፥ ንኵሉ ሰብ ኵሉ ነገር ኾንኩ። ²³ካብ በረኸት ምእንቲ ኽማቐል፥ እዝ ዅሉ ምእንቲ ወንጌል እገብር ኣለኹ።

²⁴እቶም ኣብ ሜዳ ጉያ ዝጐዩ ኵሎም ከም ዝጐዩ፥ ግና ሓደ ጥራሕ ዓስቢ ከም ዝረክብ ኣይትፈልጡን ድኹም? ዓስቢ ምእንቲ ኽትረኽቡ ከምኡ ጐዩ። ²⁵ነፍሲ ወከፍ ዝቀዳደም ኣብ ኵሉ ነገር ንነፍሱ ይግስፅ፤ ንሳቶም ዝበሊ ኣኽሊል ምእንቲ ኽረኽቡ እዮም ዝገብርዎ፥ ንሕና ግና ዘይበሊ ኣኽሊል ኢና እንረክብ። ²⁶ስለዙይ ኣነ ብዘይ ሸቶ ኣይጐይን፤ ኣየር እናዘበጥኩ ድማ ኣይቅበፀጥን። ²⁷ነቲ ስጋይ ግና እወቅዖ፥ እገዝኦውን፤ ንኻልኦት ሰቢኸ፥ ኣነ ባዕለይ ዘይብቑዕ ኮይነ ምእንቲ ኸይርከብ።