1 Kọrinti 9

9 ¹Èmi kò ha ní òmìnira bí? Èmi kò ha ṣe aposteli bí? Èmi kò ha ti rí Jesu Olúwa wa bí? Ẹ̀yin kò ha ṣe iṣẹ́ mi nínú Olúwa bí? ²Bí èmi kì í bá ṣe aposteli fún àwọn ẹlòmíràn, dájúdájú èmi jẹ́ ọ̀kan fún yín; nítorí ẹ̀yin ni èdìdì iṣẹ́ aposteli mi nínú Olúwa.

³Èyí ni ìgbèjà mi sí àwọn tí ń fẹ́ wádìí mi: ⁴Àwa kò ha ní ẹ̀tọ́ láti jẹ àti láti mu bí? ⁵Àwa kò ha ní ẹ̀tọ́ láti mú aya onígbàgbọ́ dání, gẹ́gẹ́ bí àwọn aposteli yòókù, àti àwọn arákùnrin Olúwa, àti Kefa bí? ⁶Tàbí èmi àti Barnaba nìkan ni kò ní ẹ̀tọ́ láti má ṣe iṣẹ́ fún ìgbésí ayé bí? ⁷Ta ni ń ṣiṣẹ́ ológun ní ìnáwó ara rẹ̀? Ta ni ń gbin ọgbà àjàrà tí kò sì jẹ nínú èso rẹ̀? Tàbí ta ni ń ṣọ́ agbo ẹran tí kò sì mu nínú wàrà rẹ̀?

⁸Ǹjẹ́ mo ń sọ èyí gẹ́gẹ́ bí ọ̀rọ̀ ènìyàn lásán bí? Òfin kò ha sọ bákan náà bí? ⁹Nítorí òfin Mose wí pé, “Má ṣe di màlúù ẹnu nígbà tí ó bá ń tẹ ọkà.” Baba wa ha ń bìkítà nípa àwọn màlúù bí? ¹⁰Tàbí nítorí wa pátápátá ni ó ṣe ń sọ̀rọ̀? Bẹ́ẹ̀ ni, nítorí wa ni a kọ ọ́—ẹni tí ń tulẹ̀ gbọdọ̀ máa tulẹ̀ ní ìrètí, àti ẹni tí ń tẹ ọkà, ní ìrètí láti pín nínú èso. ¹¹Bí àwa bá fúnrúgbìn ohun tí í ṣe ti ẹ̀mí láàrin yín, ohun ńlá ha ni láti ká ohun ti ara lọ́wọ́ yín bí? ¹²Bí àwọn ẹlòmíràn bá ní ìpín nínú ẹ̀tọ́ yìí lórí yín, àwa kò ha ní jù bẹ́ẹ̀ lọ bí? Síbẹ̀ àwa kò lò ó—kàkà bẹ́ẹ̀, àwa fi ara da ohun gbogbo, kí àwa má ba à ṣe ìdènà fún ìhìnrere Kristi.

¹³Ẹ̀yin kò ha mọ̀ pé àwọn tí ń ṣiṣẹ́ nínú tẹ́mpìlì ń jẹ oúnjẹ láti inú tẹ́mpìlì, àti pé àwọn tí ń ṣe ìránṣẹ́ níbi pẹpẹ ni ó ń ní ìpín nínú ọrẹ pẹpẹ bí? ¹⁴Bákan náà ni Olúwa ti pàṣẹ pé kí àwọn tí ń wàásù ìhìnrere máa gbé ìyè wọn nínú ìhìnrere. ¹⁵Ṣùgbọ́n èmi kò lo ọ̀kankan nínú àwọn ẹ̀tọ́ wọ̀nyí, bẹ́ẹ̀ ni èmi kò kọ èyí láti bèèrè wọn fún ara mi. Ó sàn fún mi láti kú ju kí èmi jẹ́ kí ẹnikẹ́ni sọ ìṣògo mi di òfo. ¹⁶Wíwàásù ìhìnrere kò fún mi ní ìdí láti ṣògo—dandan ni ó jẹ́ fún mi. Ègbé ni fún mi bí èmi kò bá wàásù rẹ̀! ¹⁷Nítorí bí èmi bá ṣe èyí tìfẹ́tìfẹ́, èmi ní èrè; bí ó bá sì jẹ́ tipátipá, síbẹ̀ a fi iṣẹ́ àṣẹ kan lé mi lọ́wọ́. ¹⁸Kí ni èrè mi nígbà náà? Pé nígbà tí mo bá ń wàásù, kí èmi fi ìhìnrere lélẹ̀ lọ́fẹ̀ẹ́, láìlo ẹ̀tọ́ mi ní kíkún nínú ìhìnrere.

¹⁹Nítorí bí ó tilẹ̀ jẹ́ pé èmi ní òmìnira kúrò lọ́wọ́ gbogbo ènìyàn, mo sọ ara mi di ẹrú fún gbogbo ènìyàn, kí èmi lè jèrè àwọn púpọ̀ sí i. ²⁰Fún àwọn Júù mo dàbí Júù, kí èmi lè jèrè àwọn Júù. Fún àwọn tí ń bẹ lábẹ́ òfin, mo dàbí ẹni tí ń bẹ lábẹ́ òfin—bí ó tilẹ̀ jẹ́ pé èmi tìkára mi kò sí lábẹ́ rẹ̀—kí èmi lè jèrè àwọn tí ń bẹ lábẹ́ òfin. ²¹Fún àwọn tí ń bẹ lóde òfin, mo dàbí ẹni tí ń bẹ lóde òfin (kì í ṣe pé èmi wà lóde òfin Baba wa, ṣùgbọ́n èmi wà nínú òfin Kristi), kí èmi lè jèrè àwọn tí ń bẹ lóde òfin. ²²Fún àwọn aláìlera mo di aláìlera, kí èmi lè jèrè àwọn aláìlera. Mo ti di ohun gbogbo fún gbogbo ènìyàn, kí èmi lè gba àwọn mìíràn là nípa gbogbo ọ̀nà. ²³Èmi ń ṣe gbogbo èyí nítorí ìhìnrere, kí èmi lè ní ìpín nínú ìbùkún rẹ̀.

²⁴Ẹ̀yin kò ha mọ̀ pé gbogbo àwọn tí ń sáré nínú ìje ni ń sáré, ṣùgbọ́n ẹnìkan ṣoṣo ni ó ń gba ẹ̀bùn bí? Ẹ máa sáré kí ẹ lè borí. ²⁵Olúkúlùkù ẹni tí ń díje ń kó ara rẹ̀ ní ìjánu nínú ohun gbogbo, kí ó lè gba adé tí ń run—ṣùgbọ́n tiwa kì í run. ²⁶Nítorí náà èmi kì í sáré láìlétò, bẹ́ẹ̀ ni èmi kì í jà bí ẹni tí ń na òfìfo afẹ́fẹ́. ²⁷Ṣùgbọ́n mo ń lu ara mi, mo sì ń mú un bọ́ sí abẹ́ àkóso, kí ó má ba à jẹ́ pé lẹ́yìn tí mo ti wàásù fún àwọn ẹlòmíràn, kí èmi tìkára mi má di ẹni tí a kọ̀ sílẹ̀.