1 Kọrinti 8

8 ¹Ní ti oúnjẹ tí a fi rúbọ sí òrìṣà: a mọ̀ pé gbogbo wa ló ní ìmọ̀. Ìmọ̀ ń mú ni gbéraga, ṣùgbọ́n ìfẹ́ ń gbé ni ró. ²Bí ẹnikẹ́ni bá rò pé òun mọ ohun kan, kò tí ì mọ̀ bí ó ti yẹ kí ó mọ̀. ³Ṣùgbọ́n bí ẹnikẹ́ni bá fẹ́ Baba wa, Baba wa mọ̀ ọ́.

⁴Ní ti jíjẹ oúnjẹ tí a fi rúbọ sí òrìṣà: a mọ̀ pé òrìṣà kì í ṣe ohun kankan ní ayé, àti pé kò sí Baba kankan àfi ọ̀kan ṣoṣo. ⁵Nítorí bí ó tilẹ̀ jẹ́ pé àwọn tí à ń pè ní ọlọ́run wà, yálà ní ọ̀run tàbí ní ayé—àti nítòótọ́ ọ̀pọ̀ “ọlọ́run” àti ọ̀pọ̀ “olúwa” ń bẹ. ⁶Síbẹ̀ fún àwa, Baba wa kan ṣoṣo ni ń bẹ, láti ọ̀dọ̀ ẹni tí ohun gbogbo ti wá, àwa sì wà fún un; Olúwa kan ṣoṣo sì ń bẹ, Jesu Kristi, láti ipasẹ̀ ẹni tí ohun gbogbo ti wá, àwa sì wà nípasẹ̀ rẹ̀. ^a a v6 Níhìn-ín ni Paulu fi Baba àti Ọmọ náà lẹ́gbẹ̀ẹ́ ara wọn: Ọlọ́run kan ṣoṣo náà ni Baba wa, orísun ohun gbogbo, Olúwa kan ṣoṣo náà sì ni Jesu, ẹni tí ohun gbogbo ti ipasẹ̀ rẹ̀ wà.

⁷Ṣùgbọ́n kì í ṣe gbogbo ènìyàn ló ní ìmọ̀ yìí. Àwọn kan, tí wọ́n ṣì ti mọ́ òrìṣà títí di ìsinsìnyí, ń jẹ oúnjẹ yìí bí ẹni pé a fi rúbọ sí òrìṣà nítòótọ́, a sì sọ ẹ̀rí ọkàn wọn tí kò lera di àìmọ́. ⁸Oúnjẹ kì í mú wa súnmọ́ Baba wa. A kì yóò burú sí i bí a kò bá jẹ ẹ́, bẹ́ẹ̀ ni a kì yóò sàn sí i bí a bá jẹ ẹ́. ⁹Ṣùgbọ́n ẹ ṣọ́ra kí ẹ̀tọ́ yín yìí má ṣe di ohun ìkọ̀sẹ̀ fún àwọn aláìlera. ¹⁰Bí ẹnìkan bá rí ìwọ tí o ní ìmọ̀, tí ò ń jẹun nínú tẹ́mpìlì òrìṣà, ǹjẹ́ ẹ̀rí ọkàn rẹ̀ tí kò lera kì yóò ní ìgboyà láti jẹ oúnjẹ tí a fi rúbọ sí òrìṣà? ¹¹Nítorí náà, nípa ìmọ̀ rẹ, ẹni aláìlera yìí parun—arákùnrin náà tí Kristi kú fún. ¹²Nígbà tí ẹ bá dẹ́ṣẹ̀ báyìí sí àwọn arákùnrin yín, tí ẹ sì ṣe ẹ̀rí ọkàn wọn tí kò lera níléṣe, Kristi ni ẹ̀ ń dẹ́ṣẹ̀ sí. ¹³Nítorí náà, bí oúnjẹ bá mú kí arákùnrin mi kọsẹ̀, èmi kì yóò jẹ ẹran mọ́ láéláé, kí èmi má bàa mú kí arákùnrin mi kọsẹ̀.