Sevgi bilimdan ustun

Imonlilar butlarga qurbon qilingan go‘shtni yeyishlari mumkinmi? But hech narsa emas, va hamma narsa Undan kelgan yagona Ota bor. Lekin bilim mag‘rurlantiradi, sevgi esa bunyod etadi: agar uning yeyishi Masih jon fido qilgan birodarni halok qilsa, Pavlus boshqa hech qachon go‘sht yemaydi.

8-bob.

Butlarga atab qurbon qilingan taom haqida: bilamizki, hammamizda bilim bor. Bilim kibrlantiradi, sevgi esa quradi. Agar kimdir oʻzini biror narsani biladi deb oʻylasa, u hali bilishi kerak boʻlganidek bilmaydi. Lekin kimki Otamizni sevsa, Otamiz uni taniydi.

Butlarga atab qurbon qilingan taomni yeyish haqida: bilamizki, dunyoda but — hech narsa, va yagonadan boshqa Ota yoʻq. Chunki osmonda yo yerda xudo deb atalganlar boʻlsa ham — darhaqiqat, koʻplab “xudolar” va koʻplab “hazratlar” bor. Biroq biz uchun yagona Xudo — Otamiz bor, hamma narsa Undan va biz Uning uchun mavjudmiz; va yagona Rabbimiz Iso Masih bor, hamma narsa U orqali va biz U orqali mavjudmiz. ^a

Lekin bu bilim hammada ham yoʻq. Baʼzilar hanuzgacha butlarga oʻrganib qolgani uchun, bu taomni chindan butga atab qurbon qilingandek yeydilar va ularning zaif vijdoni harom boʻladi. Taom bizni Otamizga yaqinlashtirmaydi. Yemasak, bizda kami yoʻq, yesak ortigʻimiz yoʻq. Lekin ehtiyot boʻlinglar, bu huquqingiz zaiflar uchun qoqilish toshiga aylanib qolmasin. Agar kimdir bilimga ega boʻlgan seni but maʼbadida ovqatlanayotganingni koʻrsa, uning zaif vijdoni butlarga atab qurbon qilingan taomni yeyishga jurʼat qilib qolmaydimi? Shunday qilib, sening biliming tufayli bu zaif kishi — Masih u uchun jon bergan birodar — halok boʻladi. Birodarlaringizga qarshi shunday gunoh qilib, ularning zaif vijdonini yaralaganingizda, Masihga qarshi gunoh qilgan boʻlasiz. Shuning uchun, agar taom birodarimni qoqiltiradigan boʻlsa, birodarimni qoqiltirmaslik uchun boshqa hech qachon goʻsht yemayman.