1 Wakorintho 8

8 ¹Kuhusu vyakula vilivyotolewa sadaka kwa sanamu: twajua ya kuwa sote tuna maarifa. Maarifa hujivuna, bali upendo hujenga. ²Mtu akidhani ya kuwa anajua neno, bado hajui kama impasavyo kujua. ³Lakini mtu akimpenda Baba yetu, huyo anajulikana naye.

⁴Basi kuhusu kula vyakula vilivyotolewa sadaka kwa sanamu: twajua ya kuwa sanamu si kitu ulimwenguni, na ya kuwa hakuna Baba ila mmoja tu. ⁵Kwa maana ijapokuwa wako waitwao miungu, iwe mbinguni au duniani—kama vile walivyo miungu wengi na mabwana wengi— ⁶lakini kwetu sisi yuko Baba yetu mmoja, ambaye vitu vyote vyatoka kwake, nasi tuko kwa ajili yake; na yuko Bwana mmoja, Yesu Kristo, ambaye vitu vyote vyatoka kwake, nasi tuko kwake yeye. ^a a v6 Hapa Paulo aweka Baba na Mwana pamoja: Mungu mmoja ndiye Baba yetu, chanzo cha vitu vyote, na Bwana mmoja ndiye Yesu, ambaye kwa yeye vitu vyote vilipata kuwako.

⁷Lakini si wote walio na maarifa haya. Wengine, kwa kuwa walikuwa wamezoea sanamu hata sasa, hula chakula hicho kama kwamba kimetolewa sadaka kwa sanamu kweli, na dhamiri yao iliyo dhaifu hutiwa unajisi. ⁸Chakula hakituleti karibu zaidi na Baba yetu. Tusipokula hatupungukiwi na kitu, wala tukila hatuzidishwi na kitu. ⁹Lakini jihadharini, huu uhuru wenu usije ukawa kwa vyovyote kikwazo kwa walio dhaifu. ¹⁰Kwa maana mtu akikuona wewe uliye na maarifa umeketi chakulani ndani ya hekalu la sanamu, je, dhamiri yake iliyo dhaifu haitatiwa ujasiri hata ale vyakula vilivyotolewa sadaka kwa sanamu? ¹¹Hivyo, kwa maarifa yako, huyo aliye dhaifu aangamia—ndugu ambaye Kristo alikufa kwa ajili yake. ¹²Nanyi mtendapo dhambi namna hii juu ya ndugu zenu na kuzijeruhi dhamiri zao dhaifu, mwamtenda dhambi Kristo. ¹³Kwa hiyo, chakula kikimkwaza ndugu yangu, sitakula nyama kamwe, nisije nikamkwaza ndugu yangu.