Asih Ngungkulan Pangaweruh

Naha jalma percaya meunang ngadahar daging anu geus dikurbankeun ka brahala? Brahala téh lain nanaon, sarta ngan aya hiji Rama anu ti Mantenna sagala hal asalna. Tapi pangaweruh ngajadikeun gumedé, ari kanyaah ngawangun: lamun dahar manéhna ngaruksak hiji dulur anu ku Kristus dibélaan maot, Paulus moal ngadahar daging deui salilana.

Pasal 8.

Hal kadaharan sasajen ka brahala: urang nyaho yen urang kabeh boga pangaweruh. Pangaweruh teh matak jadi gede hulu, tapi asih mah matak ngawangun. Saha bae anu ngarasa geus nyaho kana hiji perkara, enyana mah manehna acan nyaho sakumaha kuduna. Tapi saha bae anu mikaasih ka Rama urang, manehna teh dipikawanoh ku Mantenna.

Hal ngadahar kadaharan sasajen ka brahala: urang nyaho yen brahala teh lain naon-naon di ieu dunya, sarta taya Rama iwal ti anu Hiji. Karana najan aya anu disarebut allah, boh di sawarga boh di bumi—jeung enya ge aya loba “allah” sarta loba “gusti”— Tapi pikeun urang mah ngan aya hiji Allah, nya eta Rama urang; sagala rupa asalna ti Mantenna, sarta urang hirup pikeun Mantenna; jeung ngan aya hiji Gusti, nya eta Yesus Kristus; sagala rupa ngajadi ngaliwatan Anjeunna, sarta urang oge hirup ngaliwatan Anjeunna. ^a

Tapi henteu kabeh jalma boga pangaweruh ieu. Aya sawareh anu nepi ka ayeuna masih kabiasa ka brahala, nepi ka waktu ngadahar kadaharan ieu teh ngarasa bener-bener keur ngadahar sasajen ka brahala, nepi ka ate sanubarina anu lemah teh jadi najis. Kadaharan teu bisa ngadeukeutkeun urang ka Rama urang. Urang teu jadi leuwih goreng lamun henteu ngadahar, sarta teu jadi leuwih hade lamun ngadahar. Tapi sing ati-ati, ulah nepi ka hak maraneh ieu jadi batu tajong pikeun anu lemah imanna. Sabab lamun aya jelema nempo maraneh anu baroga pangaweruh keur ngadahar di jero kuil brahala, lain ate sanubarina anu lemah teh bakal jadi wani ngadahar kadaharan sasajen ka brahala? Jadi ku pangaweruh maraneh, jelema anu lemah ieu teh binasa—nya eta dulur anu Kristus geus pupus pikeun manehna. Waktu maraneh migawe dosa kawas kieu ka dulur-dulur sarta nyedakeun ate sanubarina anu lemah, maraneh teh migawe dosa ka Kristus. Ku sabab eta, lamun kadaharan matak nyandung dulur kuring, kuring moal rek ngadahar daging deui salilana, supaya kuring ulah nepi ka nyandung dulur kuring.