ଜ୍ଞାନ ଅପେକ୍ଷା ପ୍ରେମ

ବିଶ୍ୱାସୀମାନେ କʼଣ ପ୍ରତିମାକୁ ଉତ୍ସର୍ଗ କରାଯାଇଥିବା ମାଂସ ଖାଇପାରିବେ? ପ୍ରତିମା କିଛି ନୁହେଁ, ଏବଂ ଜଣେ ପିତା ଅଛନ୍ତି ଯାହାଙ୍କଠାରୁ ସମସ୍ତ ବିଷୟ ଆସେ। କିନ୍ତୁ ଜ୍ଞାନ ଗର୍ବିତ କରେ, ପ୍ରେମ ଗଢ଼ି ତୋଳେ: ଯଦି ତାଙ୍କ ଖାଇବା ଯୋଗୁଁ ଖ୍ରୀଷ୍ଟ ଯାହା ପାଇଁ ମଲେ ସେହି ଭାଇ ବିନଷ୍ଟ ହୁଏ, ତେବେ ପାଉଲ ଆଉ କେବେ ମାଂସ ଖାଇବେ ନାହିଁ।

ଅଧ୍ୟାୟ 8।

ପ୍ରତିମା ନିକଟରେ ଉତ୍ସର୍ଗୀକୃତ ଖାଦ୍ୟ ବିଷୟରେ, ଆମ୍ଭେମାନେ ଜାଣୁ ଯେ ଆମ୍ଭ ସମସ୍ତଙ୍କର ଜ୍ଞାନ ଅଛି। ଜ୍ଞାନ ଗର୍ବ ଜନ୍ମାଏ, କିନ୍ତୁ ପ୍ରେମ ନିଷ୍ଠା ଜନ୍ମାଏ। ଯଦି କେହି ଆପଣାକୁ କିଛି ଜାଣେ ବୋଲି ମନେ କରେ, ତେବେ ଯେପରି ଜାଣିବା ଉଚିତ ସେପରି ସେ ଏପର୍ଯ୍ୟନ୍ତ ଜାଣି ନାହିଁ। କିନ୍ତୁ ଯଦି କେହି ଆମ୍ଭମାନଙ୍କ ପିତାଙ୍କୁ ପ୍ରେମ କରେ, ତେବେ ସେ ତାହାଙ୍କ ଦ୍ଵାରା ଜ୍ଞାତ ହୋଇଅଛି।

ପ୍ରତିମା ନିକଟରେ ଉତ୍ସର୍ଗୀକୃତ ଖାଦ୍ୟ ଭୋଜନ ବିଷୟରେ, ଆମ୍ଭେମାନେ ଜାଣୁ ଯେ ଜଗତରେ ପ୍ରତିମା କିଛି ନୁହେଁ, ପୁଣି ଏକ ବ୍ୟତୀତ ଅନ୍ୟ କୌଣସି ପିତା ନାହାନ୍ତି। ଯେଣୁ ସ୍ଵର୍ଗରେ ହେଉ କି ପୃଥିବୀରେ ହେଉ, ଦେବତା ବୋଲି କଥିତ ଅନେକ ଥିଲେ ହେଁ—ପ୍ରକୃତରେ ଅନେକ “ଦେବତା” ଓ ଅନେକ “ପ୍ରଭୁ” ଅଛନ୍ତି— ତଥାପି ଆମ୍ଭମାନଙ୍କ ପକ୍ଷରେ ଜଣେ ମାତ୍ର ଈଶ୍ଵର ଅଛନ୍ତି, ଯେ ଆମ୍ଭମାନଙ୍କ ପିତା, ଯାହାଙ୍କଠାରୁ ସମସ୍ତ ବିଷୟ ଉତ୍ପନ୍ନ ଆଉ ଯାହାଙ୍କ ନିମନ୍ତେ ଆମ୍ଭେମାନେ ଅଛୁ; ପୁଣି ଜଣେ ମାତ୍ର ପ୍ରଭୁ ଅଛନ୍ତି, ଯେ ଯୀଶୁ ଖ୍ରୀଷ୍ଟ, ଯାହାଙ୍କ ଦ୍ଵାରା ସମସ୍ତ ବିଷୟ ଉତ୍ପନ୍ନ ଆଉ ଯାହାଙ୍କ ଦ୍ଵାରା ଆମ୍ଭେମାନେ ଅଛୁ। ^a

କିନ୍ତୁ ସମସ୍ତଙ୍କର ଏହି ଜ୍ଞାନ ନାହିଁ। କେତେକ ଲୋକ ଏପର୍ଯ୍ୟନ୍ତ ପ୍ରତିମାର ଅଭ୍ୟସ୍ତ ଥିବାରୁ, ଏହି ଖାଦ୍ୟକୁ ପ୍ରକୃତରେ ପ୍ରତିମା ନିକଟରେ ଉତ୍ସର୍ଗୀକୃତ ବୋଲି ଭାବି ଭୋଜନ କରନ୍ତି, ଆଉ ସେମାନଙ୍କ ଦୁର୍ବଳ ବିବେକ ଅଶୁଚି ହୁଏ। ଖାଦ୍ୟ ଆମ୍ଭମାନଙ୍କୁ ଆମ୍ଭମାନଙ୍କ ପିତାଙ୍କ ନିକଟବର୍ତ୍ତୀ କରାଏ ନାହିଁ। ଯଦି ଆମ୍ଭେମାନେ ନ ଖାଉ, ତେବେ ଆମ୍ଭମାନଙ୍କର କିଛି କ୍ଷତି ନାହିଁ, ଆଉ ଯଦି ଖାଉ, ତେବେ କିଛି ଲାଭ ନାହିଁ। କିନ୍ତୁ ସାବଧାନ ହୁଅ, ଯେପରି ତୁମ୍ଭମାନଙ୍କର ଏହି ଅଧିକାର କୌଣସି ପ୍ରକାରେ ଦୁର୍ବଳମାନଙ୍କ ପ୍ରତି ବିଘ୍ନର କାରଣ ନ ହୁଏ। ଯଦି କେହି ତୁମ୍ଭ ପରି ଜ୍ଞାନଯୁକ୍ତ ଜଣକୁ ପ୍ରତିମାର ମନ୍ଦିରରେ ଭୋଜନ କରିବାର ଦେଖେ, ତେବେ ପ୍ରତିମା ନିକଟରେ ଉତ୍ସର୍ଗୀକୃତ ଖାଦ୍ୟ ଖାଇବାକୁ ତାହାର ଦୁର୍ବଳ ବିବେକ କʼଣ ସାହସୀ ହେବ ନାହିଁ? ଅତଏବ ତୁମ୍ଭର ଜ୍ଞାନ ଦ୍ଵାରା ଏହି ଦୁର୍ବଳ ବ୍ୟକ୍ତି, ଅର୍ଥାତ୍ ଯାହା ନିମନ୍ତେ ଖ୍ରୀଷ୍ଟ ମୃତ୍ୟୁଭୋଗ କଲେ, ସେହି ଭାଇ ବିନଷ୍ଟ ହୁଏ। ଯେତେବେଳେ ତୁମ୍ଭେମାନେ ଏହିପରି ଆପଣା ଭାଇମାନଙ୍କ ବିରୁଦ୍ଧରେ ପାପ କର ଆଉ ସେମାନଙ୍କ ଦୁର୍ବଳ ବିବେକକୁ ଆଘାତ ଦିଅ, ସେତେବେଳେ ତୁମ୍ଭେମାନେ ଖ୍ରୀଷ୍ଟଙ୍କ ବିରୁଦ୍ଧରେ ପାପ କର। ଅତଏବ ଯଦି ଖାଦ୍ୟ ମୋହର ଭାଇର ବିଘ୍ନ ଜନ୍ମାଏ, ତେବେ ମୁଁ ଆଉ କେବେ ହେଁ ମାଂସ ଖାଇବି ନାହିଁ, ଯେପରି ମୁଁ ମୋହର ଭାଇର ବିଘ୍ନ ନ ଜନ୍ମାଏ।