1 Corinthnao 8

8 ¹Meoma̱li pha̱kahai sāwui pongli: ithum saikorali theikakhui lei kaji ithumna thei. Theikakhui mili nganingtit ngasaka, kha leikashina reisang ngasaka. ²Kachikathā mi akhana khikha akha theihaira da phaningakha, ana theiphalungra thāda arui eina tangda matheirangsai. ³Kha kachikathā mi akhana ithumwui Avāli leishiakha, ali ana thei.

⁴Meoma̱li pha̱kahai sā kasāwui pongli: okathuili meoma̱ chi khikhala maningmana kaji, kala Avā akha maningla katei maleimana kaji ithumna thei. ⁵Kaja kazingramli lah okathuili vare da phokkahaibing leilala, kachangkhat eina "vare" kachungkha kala "proho" kachungkha lei. ⁶Chithālala ithumwui vanga, ithumwui Avā akhamānga lei, awui eina ot saikora kharā kala ithum awui vang leira; kala Proho akhamānga Jishu Khrista lei, awui mangā eina ot saikora shokkahai kala ithum awui mangā eina leira. ^a a v6 Hili Paulna Avā kala Anaomayara chi akha eina akha ngava̱zatta yanga: Vare akhamānga chi ithumwui Avā, ot saikorawui haokaphok, kala Proho akhamānga chi Jishu, awui mangā eina ot saikora shokkahaina.

⁷Kha mi saikorali hi theikakhui maleimana. Kaikhana arui eina tangda meoma̱li ngasokazatthuda, hi sā chi kachangkhat eina meoma̱li pha̱kahai thāda shai, kala athumwui ngazankasa mashun-makhui makathar ngasāhaowa. ⁸Kashakazāna ithumli ithumwui Avāli marānganaimara. Ithum mashaiakha khikha mazakshimimana, kala shaiakha khikha maphāmeimala. ⁹Kha nathumwui hi samphangngayi china ngazankasabingli phei ngaphok khavai masā khavai ningngasharlu. ¹⁰Kachikathāna theikakhui kalei nali meoma̱wui khorumshimli phazā theiakha, awui ngazankasa mashun-makhui china meoma̱li pha̱kahai sā shai khavai pangsang ngasak maningmala? ¹¹Chithākha Khristana thimi kahai ngazankasa nachinā chi nawui theikakhui eina shimāna. ¹²Nathum hikathā nachināngarāli morei sāda athumwui ngazankasa mashun-makhui khamā ngasakakha, nathum Khristali morei sāhaira. ¹³Chiwui vang eina sāna ichinā phei ngaphok ngasakakha, ichinā phei ngaphok masā ngasak khavai ina lāngda sā mashaipairarmara.