Chamyet ne Siirei Naet
Imuuch koam che iyani amitwogik che kieng'jin kanamonik? Kanamwet ko ma kiy, ak mi Kwanda agenge, che punu ineendet tuguuk tugul. Ago igoeti naet chii, ago teech chamyet: ngot koriich amiisyennyi tupchonnyi ne ki kime Kristo agobo ineendet, ma koam Paulo amitwogik kogeny.
8 1Agobo amitwogik che kieng'jin kanamonik: kingen ale kitinye naet echeek tugul. Igoeti naet chii, ago teech chamyet. 2Ngot ko bwaat chii age tugul kole ingen kiit age, ko tomo konai ko uu ye nyolu konai. 3Ago ngot ko chame chii age tugul Kwandanyo, ko ingen ineendet.
4Agobo amyeetap amitwogik che kieng'jin kanamonik: kingen ale kanamwet ko ma kiy eng' ng'wony, ak ma mi Kwanda, ago agenge kityo. 5Amu agot ngot ko mi che kiguure kamuktaik, eng' kipsengwet anan eng' ng'wony—ak iman ko mi che chaang' “kamuktaik” ak che chaang' “kiptainik.” 6Ago eng' echeek ko mi Kamuktaindet agenge, Kwandanyo, che punu ineendet tuguuk tugul ak kimenye echeek agobo ineendet; ak mi Kiptaiyat agenge, Jeso Kristo, che bunji ineendet tuguuk tugul ak kimenye echeek eng' ineendet. a a v6 Yu ko inde Paulo Kwanda ak Weeriit kobagenge: Kamuktaindet ne agenge ko Kwandanyo, ole punu tuguuk tugul, ak Kiptaiyat ne agenge ko Jeso, ne kibiitunen tuguuk tugul eng' ineendet.
7Ago ma tinye naennooni chii tugul. Alak, che kata koyomtos kanamonik agoi nguno, koamei amitwogichu ko uu ye kieng'jin iman kanamwet, ak ko murwoon kabwaatennywa ne nyaluli. 8Ma riikech amitwogik eng' Kwandanyo. Ma kiyachin ngot koma kiam, ak ma kikaigaitunech ngot keam. 9Ago oriipkei si matun koek chametapkei ne otinye okweek kiy ne riichei eng' che nyalulyotin. 10Amu ngot ko keer chii inyee, ne itinye naet, iamisyei eng' kootap kanamwet, tos ma kigimitunen kabwaatennyi ne nyaluli koam amitwogik che kieng'jin kanamonik? 11Kou nooto ko wong'kei chiini ne nyaluli eng' naeng'ung'—weeriit ne tupcho ne ki me Kristo agobo ineendet. 12Ye oyai tengek kou nooto agobo tupchosyekwok ak oguoten kabwaatennywa ne nyaluli, oyai tengek agobo Kristo. 13Kou nooto, ngot ko inach amitwogik tupchennyu, ma koi aam panyeek kogeny, si ma anach tupchennyu.