Ngalāfakathuiwui vang Avāwui khangarān
Kapikhui ngahangli nguirui kaphokkhui: ava kala anu kharakhatna kharakhatli ashin ngasāra, shitsanmi mashitsan kaphok kachuiva kala kaphok pamkhavai lungkhala mikhangching, kala tuiwui ngachonkhavai eina kapam da pamkhala ngasāphā. Kahaiva ngasa lei khala, chiwui pamli ithumwui Avā eina pamlu.
7 1Ara nathumna kapisangmikahai chiwui pongli: "Mayarnaona sha̱naoli masinga hi phālaka." 2Kha phokaphāwui eina ngayinkakhui khavai, mayarnao kachiva̱na kachichā apreiva̱ leiphalungra, kala sha̱nao kachiva̱na kachichā agahara leiphalungra. 3Gaharana apreiva̱li a runkahai chi miphalungra, kala chithada sāda preiva̱na agaharali miphalungra. 4Preiva̱na kachichā phasātungli pangshap maleimana, kha gaharana lei; chithada sāda gaharana kachichā phasātungli pangshap maleimana, kha preiva̱na lei. 5Akha eina akha mayā khangarok eina atam akha langchin seihā sākhavai nathum khalatta mikhangaiwui vangmāng maningla, akha eina akha mangareithuialu; chi thili ngarumluishitlu, chi maningakha nathumwui khalatta ngarin makhalei chi eina Satanna nathumli suipaishina. 6Hi ina mayā mihaowa thada kahāngna, ningkhami eina maningmana. 7Mi saikora ina leilak thada leiranu da ina ningngai; kha mi kachiva̱na ithumwui Avāwui eina kachichāwui sokhami lei: akhana hithada samphanga, khangatei akhana chithada samphanga. 8Mafathuirangbing kala ra̱meinaobingli ina kahāngna: I leilak thada pamda leipai hi athumwui vang phālaka. 9Kha athum khalatta mangarinshokakha, ngalāfakathui sāphalungra; kaja khamathang-khamarang eina riktāki kajiwui vanga fakathui sāna phāmei. 10Fakathuihaibingli I maningla, kha Prohona ningmi: preiva̱na agaharali mahorhaimara. 11Kha ana chihohaiakha, mafathuirangla pamphalungra lah agaharali ngashimkhuiphalungra; kala gaharana apreiva̱li mapāngkhaipaimana.
12Kateibingli ina kahāngna (I, Proho maningla): achinā akhana mashitkasang preiva̱ leilaga, preiva̱ china awuili ngasopamda leikhavai mayākha, ana ali mapāngkhaipaimana. 13Kala sha̱nao akhana mashitkasang gahara leilaga, gahara china ali ngasopamda leikhavai mayākha, ana ali mapāngkhaipaimana. 14Khikhalajila mashitkasang gahara chi preiva̱wui mangā eina kathar sāngasaka, kala mashitkasang preiva̱ chi achināwui mangā eina kathar sāngasaka. Chi maningsi kaje nathumwui nao ngarā makathar ngasāra, kha ara athum katharana. 15Mashitkasanga china kānthuiakha, kānthuiranu; achinā lah azarva̱ china hikathā otli makhalapmana. Ithumwui Avāna nathumli chingri kahaili hokakhuina. 16O preiva̱, nana nagaharali huimira lah maningla kathāda na theirakhala? Lah O gahara, nana napreiva̱li huimira lah maningla kathāda na theirakhala?
17Prohona kachiva̱li assir thada, kala ithumwui Avāna kachiva̱li hokakhui thada, kachiva̱ ringphalungra. Hi church saikorali iwui ningkhamina. 18Kachikathā mi akha hokkahai tharan ahui rimkashok kahaila? Ana chi shimān masapaimana. Kachikathā ahui marimkashok eina hokhui kahaila? Ana ahui rimshok khavai masapaimana. 19Ahui rimkashoknala khikha maningmana, marimkashoknala khikha maningmana, kha ithumwui Avāwui ningkhami mayona khamataina. 20Mi kachiva̱na ana hokkahai tharan leilakha chithāda pamchingphalungra. 21Na rao sāda hokhui kahaila? Chiwui vang ngachāng machatalu. Kha na ningkhān samphangakha, chi khuilu. 22Proholi hokkahai rao chi Prohowui ningkhān kahai mina; chi tākam eina, hokkahai ningkhān kahai mi chi Khristawui raona. 23Nathumli aman mida lokhuihaira; nathum mibingwui rao mangasaalu. 24Ivānaongarā, mi kachiva̱na hokkahai tharan leilakha, chipāli ithumwui Avā eina ngasoda pamchingphalungra.
25Mafathuirangbingwui pongli, Proholi ningkhami ili maleimana, kha Prohowui lukhamashan eina chānsam ngasakpai mi thāda iwui kaphaning hāngmiga. 26Ara atamli khalei kasakwui vang, mi akha ana leilakha chithāda pamsai hi kaphāna da ina phaninga. 27Na preiva̱li khalap kahaila? Chihomi vang maphaalu. Na preiva̱wui eina ningkhān kahaila? Preiva̱ maphaalu. 28Kha na ngalā khuiakha, morei masamana; kachingva̱ akhana fathuihaiakha, ana morei masamana. Kha hikathā mibingna phasāli kasak samphangra, kala ina nathumli chi shivāmngaina. 29Ivānaongarā, ina hi hāngmiga: retmi kahai atam sha̱sanghaira. Ara eina, preiva̱ khalei mibingna preiva̱ makhalei thāda ringranu, 30kala kachapbingna machapa thāda, kala ringphābingna maringphā thāda, kala kalobingna khikha maleila thāda, 31kala okathui khuiphungbingna chili maokthuivāma thāda ringranu; kaja okathui hiwui atamli khalei khangachā chi shimānhaora.
32Ina nathumli malungkharing makhalei sāngai. Ngalā makhui mayarnaona Proholi kathāda ningyāng ungngasakra da Prohowui otbingli phaninga. 33Kha ngalā khui kahai mayarnaona apreiva̱li kathāda ningyāng ungngasakra da okathuiwui otbingli phaninga, 34kala awui ning ngakai ngarokhaira. Mafathui sha̱nao lah kachingva̱na phasā kala manglāli kathara ngasakra da Prohowui otbingli phaninga; kha fathui kahai sha̱naona agaharali kathāda ningyāng ungngasakra da okathuiwui otbingli phaninga. 35Ina hi nathumli khalap khavai maningla, nathumwui kānnā khavai kala khamashung acham kala Proholi ning ngarumda dharma kaphaning samphang khavai kahāngna.
36Kachikathā mi akhana awui khām kahaiva̱ khamashung maningla ot sai da phaningakha, kala awui ningkachāng pang khangasaka chi shokphalungrakha, a ningkachānga chi sāranu; ani ngakumranu; chi morei maningmana. 37Kha kachikathāna awui ningli nganingtitta, ali kasokahai maleila, kha awui khalattawui ningkachāng chili ngarinkashapa, kala awui khām kahaiva̱li mangakum khavai awui ningli ngarān sāhaiakha, ana kaphā sāhaira. 38Chieina awui khām kahaiva̱ ngakuma china kaphā sāhaira; ali mangakum china lāngmeida phāmei.
39Preiva̱ chi agahara ringlakha eina tangda gaharali khalappai; kha gahara chi thihaiakha, ana ningkachānga mi khipālikha ngakum khavai ningkhān ngasaka, kha Proholi khalei mangla. 40Kha iwui phaningli, ana chithākha leichingakha mahaimeida leira. Kala ina ilala ithumwui Avāwui Manglā lei da phaninga.
