1 ቆሮንቶስ 7

7 ¹አሁን፣ ስለ ጻፋችሁት ነገር፦ “ወንድ ሴትን ባይነካ ለእርሱ መልካም ነው።” ²ነገር ግን ከዝሙት ኀጢአት ለመራቅ እያንዳንዱ ወንድ የራሱ ሚስት ይኑረው፤ እያንዳንዷም ሴት የራሷ ባል ይኑራት። ³ባል ለሚስቱ የሚገባትን ይስጣት፤ እንደዚሁም ሚስት ለባልዋ ታድርግ። ⁴ሚስት በገዛ ሰውነትዋ ላይ ሥልጣን የላትም፤ ባልዋ እንጂ፤ እንደዚሁም ባል በገዛ ሰውነቱ ላይ ሥልጣን የለውም፤ ሚስቱ እንጂ። ⁵ለጸሎት ራሳችሁን ልትሰጡ ለተወሰነ ጊዜ በተስማማችሁበት ካልሆነ በቀር እርስ በርሳችሁ አትከላከሉ፤ ከዚያም ራሳችሁን መግዛት ባለመቻላችሁ ሰይጣን እንዳይፈታተናችሁ እንደገና ኅብረት አድርጉ። ⁶ይህን የምለው እንደ ፈቃድ እንጂ እንደ ትእዛዝ አይደለም። ⁷ሰው ሁሉ እንደ እኔ ቢሆን እወዳለሁ። ነገር ግን እያንዳንዱ ከአባታችን የራሱ የሆነ ስጦታ አለው፤ አንዱ እንዲህ፣ ሌላው እንዲያ። ⁸ላላገቡትና ለመበለቶች እንዲህ እላለሁ፦ እንደ እኔ ቢኖሩ ለእነርሱ መልካም ነው። ⁹ነገር ግን ራሳቸውን መግዛት ባይችሉ ይጋቡ፤ በፍትወት ከመቃጠል መጋባት ይሻላልና። ¹⁰ላገቡት እኔ ሳልሆን ጌታ እንጂ እንዲህ ብዬ አዝዛለሁ፦ ሚስት ከባልዋ አትለይ። ¹¹ብትለያይ ግን ሳታገባ ትኑር ወይም ከባልዋ ጋራ ትታረቅ፤ ባልም ሚስቱን አይፍታ።

¹²ለቀሩቱ እኔ እላለሁ፤ ጌታ አይደለም፦ አንድ ወንድም የማታምን ሚስት ቢኖረው እርስዋም ከእርሱ ጋራ ለመኖር ብትፈቅድ አይፍታት። ¹³አንዲት ሴትም የማያምን ባል ቢኖራት እርሱም ከእርስዋ ጋራ ለመኖር ቢፈቅድ አትፍታው። ¹⁴የማያምን ባል በሚስቱ በኩል ይቀደሳልና፤ የማታምንም ሚስት በወንድሙ በኩል ትቀደሳለች። አለዚያ ልጆቻችሁ ርኩሳን በሆኑ ነበር፤ አሁን ግን ቅዱሳን ናቸው። ¹⁵የማያምነው ወገን ቢለይ ይለይ፤ በእንደዚህ ያለ ነገር ወንድም ወይም እኅት አይገደድም። አባታችን ወደ ሰላም ጠርቶአችኋልና። ¹⁶አንቺ ሚስት ሆይ፣ ባልሽን ታድኚ እንደ ሆነ ምን ታውቂያለሽ? ወይስ አንተ ባል ሆይ፣ ሚስትህን ታድን እንደ ሆነ ምን ታውቃለህ?

¹⁷ነገር ግን ጌታ ለእያንዳንዱ እንዳካፈለው፣ አባታችንም እንደ ጠራው እንዲሁ ይኑር። በአብያተ ክርስቲያናት ሁሉ የማዝዘው ይህ ነው። ¹⁸ማንም ተገርዞ ሳለ ተጠርቶ ነበርን? ቈዳውን አይመልስ። ማንም ሳይገረዝ ተጠርቶ ነበርን? አይገረዝ። ¹⁹መገረዝ ምንም አይደለም፤ አለመገረዝም ምንም አይደለም፤ ነገር ግን የአባታችንን ትእዛዛት መጠበቅ ዋጋ አለው። ²⁰እያንዳንዱ በተጠራበት ኹኔታ ይኑር። ²¹ባሪያ ሆነህ ተጠርተህ ነበርን? አያስጨንቅህ። ነገር ግን ነጻ ልትወጣ ብትችል ዕድሉን ተጠቀም። ²²በጌታ የተጠራ ባሪያ የጌታ ነጻ የወጣ ሰው ነውና፤ እንደዚሁም የተጠራ ነጻ ሰው የክርስቶስ ባሪያ ነው። ²³በዋጋ ተገዝታችኋል፤ የሰዎች ባሪያዎች አትሁኑ። ²⁴ወንድሞች ሆይ፣ እያንዳንዱ በተጠራበት ኹኔታ ከአባታችን ጋራ በዚያው ይኑር።

²⁵ስለ ያላገቡ ከጌታ የተቀበልሁት ትእዛዝ የለኝም፤ ነገር ግን በጌታ ምሕረት የታመንሁ ሆኜ ፍርዴን እሰጣለሁ። ²⁶ስለ አሁኑ ችግር ሰው እንዳለ ቢኖር መልካም ይመስለኛል። ²⁷ከሚስት ጋራ ታስረሃልን? መፍቻ አትሻ። ከሚስት ነጻ ነህን? ሚስት አትሻ። ²⁸ብታገባ ግን ኀጢአት አልሠራህም፤ ድንግልም ብታገባ ኀጢአት አልሠራችም። ነገር ግን እንደነዚህ ያሉ ሰዎች በሥጋ መከራ ያገኛቸዋል፤ እኔም ይህን ልቆጥብላችሁ እወዳለሁ። ²⁹ወንድሞች ሆይ፣ ይህን እላለሁ፦ የተወሰነው ጊዜ አጥሮአል። ከእንግዲህ ሚስት ያላቸው እንደሌላቸው ይኑሩ፤ ³⁰የሚያለቅሱም እንዳያለቅሱ፣ ደስ የሚላቸውም ደስ እንዳላላቸው፣ የሚገዙም ምንም እንደሌላቸው ይሁኑ፤ ³¹ዓለምን የሚጠቀሙም በእርሱ እንዳልተመሰጡ ይሁኑ፤ የዚህ ዓለም የአሁኑ መልክ ያልፋልና።

³²ያለ ጭንቀት እንድትኖሩ እወዳለሁ። ያላገባ ሰው ጌታን እንዴት ደስ እንደሚያሰኝ የጌታን ነገር ያስባል። ³³ያገባ ሰው ግን ሚስቱን እንዴት ደስ እንደሚያሰኝ የዓለምን ነገር ያስባል፤ ³⁴ልቡም ተከፍሎአል። ያላገባች ሴት ወይም ድንግል በሥጋም በመንፈስም ቅድስት ልትሆን የጌታን ነገር ታስባለች፤ ያገባች ሴት ግን ባልዋን እንዴት ደስ እንደምታሰኝ የዓለምን ነገር ታስባለች። ³⁵ይህን የምለው ለጥቅማችሁ ነው፤ ልገድባችሁ ሳይሆን ለተገባ ኑሮና ሳትከፋፈሉ ለጌታ እንድትገዙ ነው።

³⁶ማንም በእጮኛው ላይ ያላግባብ የሚያደርግ ቢመስለው፣ ፍትወቱም ቢበረታ መሆንም ቢገባው የወደደውን ያድርግ፤ ይጋቡ፤ ኀጢአት አይደለም። ³⁷ነገር ግን ሳይገደድ በልቡ የጸና፣ በራሱ ፈቃድ ላይም ሥልጣን ያለው፣ እጮኛውን ሊጠብቅ በልቡ የወሰነ መልካም ያደርጋል። ³⁸እንግዲህ እጮኛውን የሚያገባ መልካም ያደርጋል፤ የማያገባት ግን ይበልጥ መልካም ያደርጋል።

³⁹ሚስት ባልዋ በሕይወት ሳለ ከእርሱ ጋራ ታስራለች፤ ባልዋ ቢሞት ግን በጌታ ብቻ ለወደደችው ልታገባ ነጻ ናት። ⁴⁰ነገር ግን እንዳለች ብትኖር እንደ እኔ ሐሳብ ይበልጥ ደስተኛ ናት። እኔም ደግሞ የአባታችን መንፈስ ያለኝ ይመስለኛል።