1 ቆሮንቶስ 6

6 ¹ከእናንተ አንዱ ከሌላው ጋራ ክርክር ቢኖረው፣ ለፍርድ በእግዚአብሔር ሕዝብ ፊት ሳይሆን በዓመፀኞች ፊት ሊያቀርበው ይደፍራልን? ²ቅዱሳን ዓለምን እንደሚፈርዱ አታውቁምን? ዓለምን የምትፈርዱ ከሆነ፣ ከሁሉ ለሚያንሱ ጒዳዮች የማትበቁ ናችሁን? ³መላእክትን እንደምንፈርድ አታውቁምን? ይልቁንም የዚህን ሕይወት ጒዳዮች እንዴታ! ⁴እንግዲህ እንዲህ ያሉ ክርክሮች ሲኖሩአችሁ፣ በቤተ ክርስቲያን ዘንድ እንደ ምናምን የሚቈጠሩትን ዳኞች አድርጋችሁ ትሾማላችሁን? ⁵ይህን የምለው ላሳፍራችሁ ነው። በወንድማማች አማኞች መካከል ሊፈርድ የሚችል ጥበበኛ በእናንተ መካከል የለምን? ⁶ከዚህ ይልቅ ወንድም ወንድሙን ወደ ፍርድ ይወስደዋል፤ ይህም በማያምኑ ሰዎች ፊት ነው! ⁷እርስ በርሳችሁ መካሰሳችሁ ቀድሞውንም ፍጹም ሽንፈት ነው። ይልቁንስ ለምን በደል አትቀበሉም? ይልቁንስ ለምን አትታለሉም? ⁸ከዚህ ይልቅ እናንተ ራሳችሁ በደል ታደርጋላችሁ፤ ታታልላላችሁ፤ ይህንም በገዛ ወንድሞቻችሁና እኅቶቻችሁ ላይ ታደርጋላችሁ።

⁹ወይስ ዓመፀኞች የአባታችንን መንግሥት እንደማይወርሱ አታውቁምን? አትታለሉ፤ ሴሰኞች፣ ጣዖት አምላኪዎች፣ አመንዝሮች፣ ቀላጮች፣ ወይም ከወንዶች ጋራ የሚተኙ ወንዶች፣ ¹⁰ሌቦች፣ ስግብግቦች፣ ሰካራሞች፣ ተሳዳቢዎች፣ ወይም አጭበርባሪዎች የአባታችንን መንግሥት አይወርሱም። ¹¹አንዳንዶቻችሁ እንደዚህ ነበራችሁ። ነገር ግን በጌታ በኢየሱስ ክርስቶስ ስም በአባታችንም መንፈስ ታጥባችኋል፤ ተቀድሳችኋል፤ ጸድቃችኋል።

¹²“ሁሉን ነገር ለማድረግ ነጻ ነኝ”፤ ነገር ግን ሁሉም አይጠቅምም። “ሁሉን ነገር ለማድረግ ነጻ ነኝ”፤ ነገር ግን በምንም አልገዛም። ¹³“ምግብ ለሆድ፣ ሆድም ለምግብ ነው”፤ አባታችንም ሁለቱንም ያጠፋቸዋል። ሰውነት ግን ለዝሙት አይደለም፤ ለጌታ ነው እንጂ፤ ጌታም ለሰውነት ነው። ¹⁴ጌታን ያስነሣው አባታችንም እኛን ደግሞ በኀይሉ ያስነሣናል። ¹⁵ሰውነታችሁ የክርስቶስ ብልቶች እንደ ሆኑ አታውቁምን? እንግዲህ የክርስቶስን ብልቶች ወስጄ የጋለሞታ ብልቶች ላድርጋቸውን? ከቶ አይሁን! ¹⁶ወይስ ከጋለሞታ ጋራ የሚተባበር ከእርሷ ጋራ አንድ ሰውነት እንደሚሆን አታውቁምን? “ሁለቱ አንድ ሥጋ ይሆናሉ” ተብሎአልና። ¹⁷ከጌታ ጋራ የሚተባበር ግን ከእርሱ ጋራ አንድ መንፈስ ነው።

¹⁸ከዝሙት ሽሹ። ሰው የሚያደርገው ኀጢአት ሁሉ ከሰውነቱ ውጭ ነው፤ ዝሙት የሚሠራ ግን በገዛ ሰውነቱ ላይ ኀጢአት ያደርጋል። ¹⁹ወይስ ሰውነታችሁ ከአባታችን የተቀበላችሁት በውስጣችሁ ያለው የመንፈስ ቅዱስ ቤተ መቅደስ እንደ ሆነ አታውቁምን? የራሳችሁ አይደላችሁም፤ ²⁰በዋጋ ተገዝታችኋልና። ስለዚህ በሰውነታችሁ አባታችንን አክብሩ።