1ይ ቆሮንቶስ 6 FHB Father's Heart Bible™

6 ¹ካባኻትኩም ሓደ ምስ ካልእ ባእሲ ዘለዎ፥ ናብ ህዝቢ እግዚኣብሄር ዘይኮነስ፥ ናብ ዓመፅተኛታት ንፍርዲ ክወስዶ ይደፍርዶ? ²ቅዱሳን ንዓለም ከም ዝፈርዱዶ ኣይትፈልጡን ኢኹም? ንስኻትኩም ንዓለም እንተ ትፈርድዋ፥ ነቲ ኣናእሽቱ ነገር ክትፈርዱ ዘይትበቕዑዶ ኢኹም? ³ንመላእኽቲ ኸም እንፈርዶምዶ ኣይትፈልጡን ኢኹም? ነገር እዝ ህይወት እዙይ ግዳ ኽንደይ ኣይበዝሕን! ⁴እምበኣር ከምዙይ ዝበለ ባእሲ ምስ ዝህልወኩም፥ ነቶም ኣብ ቤተ ክርስቲያን ዋጋ ዘይብሎም ፈረድቲ ጌርኩም ትሽይሙዶ? ⁵ከሕፍረኩም ኢለ እየ እዝ ዝብል ዘለኹ። ኣብ መንጎ ኣሕዋት ክፈርድ ዝኽእል ጥበበኛ ሓደ እኳ ኣባኻትኩምዶ የለን? ⁶ኣብ ክንዳኡስ፥ ሓው ንሓው ናብ ፍርዲ ይወስዶ፥ እዙይ ድማ ኣብ ቅድሚ ዘይኣምን! ⁷ንሕድሕድኩም ክስ ምህላውኩም ድሮ ፍፁም ስዕረት እዩ። ስለ ምንታይ ደኣ ኣይትብደሉን? ስለ ምንታይከ ደኣ ኣይትታለሉን? ⁸ኣብ ክንዳኡስ፥ ንስኻትኩም ባዕልኻትኩም ትብድሉን ተታልሉን፥ እዙይ ድማ ነሕዋትኩም ትገብሩ።

⁹ወይ ዓመፅተኛታት መንግስቲ ኣቦና ኸም ዘይወርሱዶ ኣይትፈልጡን ኢኹም? ኣይትታለሉ፦ ዝሙተኛታት ኾነ መምለኽቲ ጣዖት፥ ዘመውቲ፥ ተባዕታይ ኣመንዝራ፥ ወይ ምስ ሰብኣይ ዝድቅስ ሰብኣይ፥ ¹⁰ሰረቕቲ ኾነ ስሱዓት፥ ሰካራት፥ ፀረፍቲ፥ ወይ ኣታለልቲ፥ መንግስቲ ኣቦና ኣይወርሱን። ¹¹ገሊኣትኩም ከምዙይ ኔርኩም። ግናኸ ተሓፂብኩም፥ ተቐዲስኩም፥ ብስም ጐይታና ኢየሱስ ክርስቶስን ብመንፈስ ኣቦናን ፃድቃን ተገይርኩም።

¹²“ዅሉ ክገብር ነፃ እየ” ግና ኵሉ ኣይጠቅምን። “ዅሉ ክገብር ነፃ እየ” ግና ሓንቲ እኳ ኣይትገዝኣንን። ¹³“መግቢ ንከብዲ፥ ከብዲ ኸዓ ንመግቢ እዩ” ኣቦና ድማ ንኽልቲኡ ኼጥፍኦ እዩ። ስጋ ግና ንዝሙት ዘይኮነስ፥ ንጐይታ እዩ፤ ጐይታ ኸዓ ንስጋ እዩ። ¹⁴ኣቦና ኸዓ ንጐይታ ኸም ዘተስኦ፥ ንዓናውን ብሓይሉ ኼተስኣና እዩ። ¹⁵ኣካላትኩም ኣካላት ክርስቶስ ምዃኖምዶ ኣይትፈልጡን ኢኹም? እምበኣር ኣካላት ክርስቶስ ወሲደ ኣካላት ኣመንዝራ ክገብሮምዶ? ከቶ ኣይኹን! ¹⁶ወይ ምስ ኣመንዝራ ዝዋሃድ ሰብ ምስኣ ሓደ ስጋ ኸም ዝኸውንዶ ኣይትፈልጡን ኢኹም? “እቶም ክልተ ሓደ ስጋ ኪኾኑ እዮም” ይብል እዩ እሞ። ¹⁷ምስ ጐይታ ዝዋሃድ ግና ምስኡ ሓደ መንፈስ እዩ።

¹⁸ካብ ዝሙት ህደሙ። ሰብ ዝገብሮ ዅሉ ኻልእ ሓጢኣት ካብ ስጋ ወፃኢ እዩ፤ እቲ ዝሙተኛ ግና ኣብ ልዕሊ ገዛእ ስጋኡ ሓጢኣት ይገብር። ¹⁹ወይ ስጋኹም፥ ናይቲ ኣባኻትኩም ዘሎ፥ ካብ ኣቦና ዝተቐበልኩምዎ መንፈስ ቅዱስ ቤተ መቕደስ ምዃኑዶ ኣይትፈልጡን ኢኹም? ናይ ርእስኹም ኣይኮንኩምን፤ ²⁰ብዋጋ ተዓዲግኩም ኢኹም እሞ። እምበኣር ንኣቦና ብስጋኹም ኣኽብርዎ።