1 Corinto 6

6 ¹Kon ang usa kaninyo adunay away batok sa lain, mangahas ba siya sa pagdala niini atubangan sa mga dili matarong aron hukman, dili ba sa atubangan sa katawhan sa Dios? ²Wala ba kamo masayod nga ang mga balaan maghukom sa kalibotan? Kon kamo maghukom sa kalibotan, dili ba kamo takos sa paghukom sa labing gagmayng mga kaso? ³Wala ba kamo masayod nga kita maghukom sa mga anghel? Labi na gayod ang mga butang niining kinabuhia! ⁴Busa kon kamo adunay maong mga away, inyo bang itudlo nga mga maghuhukom ang mga walay bili diha sa iglesia? ⁵Gisulti ko kini aron kamo maulawan. Wala ba gayoy usa kaninyo nga igong maalamon aron mohukom tali sa mga isigkamagtutuo? ⁶Hinuon, ang usa ka igsoon modala sa laing igsoon ngadto sa korte, ug kini atubangan pa sa mga dili magtutuo! ⁷Ang pagbinutnganay ug mga kaso batok sa usag usa maoy usa na ka hingpit nga kapildihan alang kaninyo. Nganong dili na lang kamo magpadaogdaog? Nganong dili na lang kamo magpalimbong? ⁸Hinuon, kamo mismo ang nagbuhat ug sayop ug nanglimbong, ug gibuhat ninyo kini sa inyong kaugalingong mga igsoon.

⁹O wala ba kamo masayod nga ang mga dili matarong dili makapanunod sa gingharian sa atong Amahan? Ayaw kamo palimbong: walay tawong malaw-ay sa pakighilawas, walay magsisimba sa mga dios-dios, mananapaw, lalaking nagabaligya sa iyang lawas, ni lalaking makigdulog sa laing lalaki, ¹⁰ni mga kawatan, ni mga hakog, ni mga palahubog, ni mga mapasipalaon, ni mga limbongan ang makapanunod sa gingharian sa atong Amahan. ¹¹Ingon niini ang pipila kaninyo kaniadto. Apan gihugasan na kamo, gibalaan na kamo, gipakamatarong na kamo sa ngalan sa Ginoong Jesu-Cristo ug pinaagi sa Espiritu sa atong Amahan.

¹²“Gawasnon ako sa pagbuhat sa bisan unsa”—apan dili ang tanan makatabang. “Gawasnon ako sa pagbuhat sa bisan unsa”—apan walay bisan unsa nga magagahom kanako. ¹³“Ang pagkaon alang sa tiyan ug ang tiyan alang sa pagkaon”—ug ang atong Amahan maglaglag sa duha. Apan ang lawas dili alang sa sala sa pakighilawas—kini alang sa Ginoo, ug ang Ginoo alang sa lawas. ¹⁴Ug ang atong Amahan, nga nagbanhaw sa Ginoo, magabanhaw usab kanato pinaagi sa iyang gahom. ¹⁵Wala ba kamo masayod nga ang inyong mga lawas mao ang mga bahin ni Cristo? Kuhaon ko ba ang mga bahin ni Cristo ug himoon kining mga bahin sa usa ka bigaon? Dili gayod! ¹⁶O wala ba kamo masayod nga si bisan kinsa nga makighiusa sa usa ka bigaon mahimong usa ka lawas uban kaniya? Kay giingon, “Ang duha mahimong usa ka unod.” ¹⁷Apan si bisan kinsa nga makighiusa sa Ginoo usa ka espiritu uban kaniya.

¹⁸Kalagiw gikan sa kalaw-ayan sa pakighilawas. Ang tanang lain nga sala nga buhaton sa usa ka tawo anaa sa gawas sa lawas, apan ang malaw-ay sa pakighilawas nakasala batok sa iyang kaugalingong lawas. ¹⁹O wala ba kamo masayod nga ang inyong lawas mao ang templo sa Espiritu Santo nga anaa sa sulod ninyo, nga inyong nadawat gikan sa atong Amahan? Dili kamo iya sa inyong kaugalingon, ²⁰kay gipalit kamo sa usa ka bili. Busa himayaa ninyo ang atong Amahan diha sa inyong lawas.