ଅବିଶ୍ଵାସୀମାନଙ୍କ ସମ୍ମୁଖରେ ଭାଇମାନଙ୍କ ବିରୁଦ୍ଧରେ ଅଭିଯୋଗ

ବିଶ୍ୱାସୀମାନେ ପରସ୍ପରକୁ ଅଣଯିହୁଦୀ ବିଚାରାଳୟକୁ ଟାଣି ନେଉଛନ୍ତି — ଏହା ପୂର୍ବରୁ ଏକ ପରାଜୟ; ଅନ୍ୟାୟ ସହିବା ଭଲ। ତାʼପରେ ସ୍ୱାଧୀନତା ବିଷୟରେ ସେମାନଙ୍କ ନାରାକୁ ଯୌନ ପାପ ବିରୁଦ୍ଧରେ ପରୀକ୍ଷା କରାଯାଏ: ସେମାନଙ୍କ ଶରୀର ଖ୍ରୀଷ୍ଟଙ୍କ ଅଙ୍ଗ ଓ ଆତ୍ମାଙ୍କ ମନ୍ଦିର, ମୂଲ୍ୟ ଦେଇ କିଣାଯାଇଛି, ତେଣୁ ଶରୀରରେ ଆମ ପିତାଙ୍କୁ ଗୌରବାନ୍ୱିତ କର।

ଅଧ୍ୟାୟ 6।

ତୁମ୍ଭମାନଙ୍କ ମଧ୍ୟରୁ କାହାରି ଅନ୍ୟ କାହା ସହିତ ବିବାଦ ହେଲେ, ସେ କʼଣ ଈଶ୍ଵରଙ୍କ ଲୋକଙ୍କ ସମ୍ମୁଖରେ ନ ଯାଇ ଅଧାର୍ମିକମାନଙ୍କ ସମ୍ମୁଖରେ ବିଚାର ନିମନ୍ତେ ଯିବାକୁ ସାହସ କରେ? ସାଧୁମାନେ ଜଗତର ବିଚାର କରିବେ ବୋଲି କʼଣ ତୁମ୍ଭେମାନେ ଜାଣ ନାହିଁ? ଯଦି ତୁମ୍ଭେମାନେ ଜଗତର ବିଚାର କରିବ, ତେବେ କʼଣ ତୁମ୍ଭେମାନେ ଅତି କ୍ଷୁଦ୍ର ବିଷୟର ବିଚାର କରିବାକୁ ଅଯୋଗ୍ୟ? ଆମ୍ଭେମାନେ ଦୂତମାନଙ୍କର ବିଚାର କରିବା ବୋଲି କʼଣ ତୁମ୍ଭେମାନେ ଜାଣ ନାହିଁ? ତେବେ ଏହି ଜୀବନର ବିଷୟ ତ ଆହୁରି ଅଧିକ! ଅତଏବ, ତୁମ୍ଭମାନଙ୍କର ଏପରି ବିବାଦ ଥିଲେ, ତୁମ୍ଭେମାନେ କʼଣ ମଣ୍ଡଳୀରେ ଯେଉଁମାନେ ତୁଚ୍ଛ ବୋଲି ଗଣିତ, ସେମାନଙ୍କୁ ବିଚାରକର୍ତ୍ତା ରୂପେ ନିଯୁକ୍ତ କରୁଅଛ? ତୁମ୍ଭମାନଙ୍କୁ ଲଜ୍ଜା ଦେବା ନିମନ୍ତେ ମୁଁ ଏହା କହୁଅଛି। ତୁମ୍ଭମାନଙ୍କ ମଧ୍ୟରେ କʼଣ ଏପରି ଜଣେ ହେଁ ଜ୍ଞାନୀ ଲୋକ ନାହିଁ, ଯେ ଆପଣା ଭାଇମାନଙ୍କ ମଧ୍ୟରେ ବିଚାର କରିପାରିବ? ତାହା ବଦଳରେ, ଗୋଟିଏ ଭାଇ ଆଉ ଗୋଟିଏ ଭାଇକୁ ବିଚାରାଳୟକୁ ନେଉଅଛି, ପୁଣି ଏହା ଅବିଶ୍ଵାସୀମାନଙ୍କ ସମ୍ମୁଖରେ! ପରସ୍ପର ବିରୁଦ୍ଧରେ ବିବାଦ କରିବା ତ ତୁମ୍ଭମାନଙ୍କ ପକ୍ଷରେ ସମ୍ପୂର୍ଣ୍ଣ ପରାଜୟ ହୋଇସାରିଅଛି। ବରଂ ଅନ୍ୟାୟ ଭୋଗ ନ କରିବ କାହିଁକି? ବରଂ ଠକାମି ନ ସହିବ କାହିଁକି? ତାହା ବଦଳରେ, ତୁମ୍ଭେମାନେ ନିଜେ ଅନ୍ୟାୟ କରୁଅଛ ଓ ଠକୁଅଛ, ପୁଣି ଆପଣା ଭାଇ ଓ ଭଉଣୀମାନଙ୍କ ପ୍ରତି ଏହା କରୁଅଛ।

ଅବା, ଅଧାର୍ମିକମାନେ ଆମ୍ଭମାନଙ୍କ ପିତାଙ୍କ ରାଜ୍ୟର ଅଧିକାରୀ ହେବେ ନାହିଁ ବୋଲି କʼଣ ତୁମ୍ଭେମାନେ ଜାଣ ନାହିଁ? ଭ୍ରାନ୍ତ ହୁଅ ନାହିଁ: କୌଣସି ବ୍ୟଭିଚାରୀ, କି ପ୍ରତିମାପୂଜକ, କି ପରଦାରଗାମୀ, କି ପୁଂଶ୍ଚଳ, କି ପୁରୁଷଗାମୀ ପୁରୁଷ, କି ଚୋର, କି ଲୋଭୀ, କି ମଦ୍ୟପ, କି ନିନ୍ଦକ, କି ଠକ, ଏମାନେ କେହି ଆମ୍ଭମାନଙ୍କ ପିତାଙ୍କ ରାଜ୍ୟର ଅଧିକାରୀ ହେବେ ନାହିଁ। ତୁମ୍ଭମାନଙ୍କ ମଧ୍ୟରୁ କେହି କେହି ଏପରି ଥିଲ। କିନ୍ତୁ ତୁମ୍ଭେମାନେ ପ୍ରକ୍ଷାଳିତ ହେଲ, କିନ୍ତୁ ପବିତ୍ରୀକୃତ ହେଲ, କିନ୍ତୁ ପ୍ରଭୁ ଯୀଶୁ ଖ୍ରୀଷ୍ଟଙ୍କ ନାମରେ ଓ ଆମ୍ଭମାନଙ୍କ ପିତାଙ୍କ ଆତ୍ମାଙ୍କ ଦ୍ଵାରା ଧାର୍ମିକ ଗଣିତ ହେଲ।

“ମୁଁ ସମସ୍ତ କିଛି କରିବାକୁ ସ୍ଵାଧୀନ”—କିନ୍ତୁ ସମସ୍ତ ବିଷୟ ହିତଜନକ ନୁହେଁ। “ମୁଁ ସମସ୍ତ କିଛି କରିବାକୁ ସ୍ଵାଧୀନ”—କିନ୍ତୁ କୌଣସି ବିଷୟ ମୋʼ ଉପରେ ଅଧିକାର କରିବ ନାହିଁ। “ଖାଦ୍ୟ ଉଦର ନିମନ୍ତେ ଓ ଉଦର ଖାଦ୍ୟ ନିମନ୍ତେ”—ଆଉ ଆମ୍ଭମାନଙ୍କ ପିତା ଉଭୟକୁ ବିନଷ୍ଟ କରିବେ। କିନ୍ତୁ ଶରୀର ବ୍ୟଭିଚାର ନିମନ୍ତେ ନୁହେଁ—ତାହା ପ୍ରଭୁଙ୍କ ନିମନ୍ତେ, ଆଉ ପ୍ରଭୁ ଶରୀର ନିମନ୍ତେ। ପୁଣି ଆମ୍ଭମାନଙ୍କ ପିତା, ଯେ ପ୍ରଭୁଙ୍କୁ ଉତ୍ଥାପିତ କଲେ, ସେ ଆପଣା ଶକ୍ତି ଦ୍ଵାରା ଆମ୍ଭମାନଙ୍କୁ ମଧ୍ୟ ଉତ୍ଥାପିତ କରିବେ। ତୁମ୍ଭମାନଙ୍କ ଶରୀର ଖ୍ରୀଷ୍ଟଙ୍କ ଅଙ୍ଗ ବୋଲି କʼଣ ତୁମ୍ଭେମାନେ ଜାଣ ନାହିଁ? ତେବେ ମୁଁ କʼଣ ଖ୍ରୀଷ୍ଟଙ୍କ ଅଙ୍ଗ ନେଇ ବେଶ୍ୟାର ଅଙ୍ଗ କରିବି? ଏପରି କେବେ ନ ହେଉ! ଅବା, ଯେ ବେଶ୍ୟା ସହିତ ଆପଣାକୁ ସଂଯୁକ୍ତ କରେ, ସେ ତାହା ସହିତ ଏକ ଶରୀର ହୁଏ ବୋଲି କʼଣ ତୁମ୍ଭେମାନେ ଜାଣ ନାହିଁ? କାରଣ ଲେଖାଅଛି, “ସେ ଦୁହେଁ ଏକ ଶରୀର ହେବେ।” କିନ୍ତୁ ଯେ ପ୍ରଭୁଙ୍କ ସହିତ ଆପଣାକୁ ସଂଯୁକ୍ତ କରେ, ସେ ତାହାଙ୍କ ସହିତ ଏକ ଆତ୍ମା ହୁଏ।

ବ୍ୟଭିଚାରଠାରୁ ପଳାୟନ କର। ମନୁଷ୍ୟ ଆଉ ଯେଉଁ ସମସ୍ତ ପାପ କରେ, ତାହା ଶରୀରର ବାହାରେ, କିନ୍ତୁ ବ୍ୟଭିଚାରୀ ଆପଣା ଶରୀର ବିରୁଦ୍ଧରେ ପାପ କରେ। ଅବା, ତୁମ୍ଭମାନଙ୍କ ଅନ୍ତରରେ ବାସ କରୁଥିବା ଯେଉଁ ପବିତ୍ର ଆତ୍ମାଙ୍କୁ ତୁମ୍ଭେମାନେ ଆମ୍ଭମାନଙ୍କ ପିତାଙ୍କଠାରୁ ପ୍ରାପ୍ତ ହୋଇଅଛ, ତୁମ୍ଭମାନଙ୍କ ଶରୀର ସେହି ପବିତ୍ର ଆତ୍ମାଙ୍କ ମନ୍ଦିର ବୋଲି କʼଣ ତୁମ୍ଭେମାନେ ଜାଣ ନାହିଁ? ତୁମ୍ଭେମାନେ ଆପଣାର ନୁହ, କାରଣ ତୁମ୍ଭେମାନେ ମୂଲ୍ୟ ଦ୍ଵାରା କ୍ରୀତ ହୋଇଅଛ। ଅତଏବ ଆପଣା ଶରୀରରେ ଆମ୍ଭମାନଙ୍କ ପିତାଙ୍କୁ ମହିମାନ୍ଵିତ କର।