Kai Ƙarar 'Yan'uwa Gaban Marasa Bi

Masu bi suna jan juna zuwa kotunan arna — wannan kanta ta riga ta zama kasawa; gara a zalunce ka. Sa'an nan aka gwada take-takensu na 'yanci da zunubin jima'i: jikunansu gaɓoɓin Almasihu ne da haikalin Ruhu, an saye su da tamani, saboda haka ku ɗaukaka Ubanmu cikin jiki.

Babi na 6.

Sa'ad da waninku yana da gardama da wani, ya kuskura yă kai ƙara gaban marasa adalci domin a yi shari'a, ba gaban mutanen Allah ba? Ba ku sani ba cewa tsarkaka za su yi wa duniya shari'a? In za ku yi wa duniya shari'a, ashe ba ku isa ku yanke ƙananan ƙararraki ba? Ba ku sani ba cewa za mu yi wa mala'iku shari'a? Balle fa al'amuran wannan rayuwa! Saboda haka, in kuna da irin waɗannan gardandami, kukan naɗa waɗanda ba su da wani matsayi a ikkilisiya su zama alƙalai? Ina faɗin haka ne domin in kunyata ku. Babu wani mai hikima a cikinku da zai iya yin shari'a tsakanin 'yan'uwa masu bi? A maimakon haka, ɗan'uwa yakan kai ɗan'uwansa kotu, har ma a gaban marasa bi! Yin ƙararraki da juna shan kashi ne ƙaƙaf gare ku tun farko. Me ya sa ba za ku bari a yi muku zalunci ba? Me ya sa ba za ku bari a cuce ku ba? A maimakon haka, ku kanku kukan yi zalunci kuna kuma cuta, har ma ga 'yan'uwanku.

Ko ba ku sani ba cewa marasa adalci ba za su gāji Mulkin Ubanmu ba? Kada a ruɗe ku: ba masu fasikanci, ba masu bautar gumaka, ba mazinata, ba karuwan maza, ba kuma maza masu kwana da maza, ba ɓarayi, ba masu kwaɗayi, ba mashaya, ba masu zagi, ba mazambata, da za su gāji Mulkin Ubanmu ba. Haka waɗansunku suka kasance. Amma an wanke ku, an tsarkake ku, an kuma baratar da ku da sunan Ubangiji Yesu Almasihu da kuma ta Ruhun Ubanmu.

“Ina da 'yanci in yi kome”—amma ba kome ne yake da amfani ba. “Ina da 'yanci in yi kome”—amma ba zan bar kome yă mallake ni ba. “Abinci domin ciki ne, ciki kuma domin abinci”—Ubanmu kuwa zai hallaka dukansu. Amma jiki ba domin fasikanci ba ne—domin Ubangiji ne, Ubangiji kuma domin jiki. Ubanmu kuwa, wanda ya tā da Ubangiji, zai tā da mu ma ta ikonsa. Ba ku sani ba cewa jikunanku gaɓoɓin Almasihu ne? To, in ɗauki gaɓoɓin Almasihu in mai da su gaɓoɓin karuwa? Sam, ba zai taɓa yiwuwa ba! Ko ba ku sani ba cewa duk wanda ya haɗa kansa da karuwa ya zama jiki ɗaya da ita? Gama Nassi ya ce, “Su biyun za su zama nama ɗaya.” Amma duk wanda ya haɗa kansa da Ubangiji, ruhu ɗaya ne da shi.

Ku guji fasikanci. Kowane irin zunubi da mutum yake yi yana waje da jiki ne, amma mai fasikanci yana yin zunubi a kan jikinsa ne. Ko ba ku sani ba cewa jikinku haikalin Ruhu Mai Tsarki ne wanda yake cikinku, wanda kuka samu daga wurin Ubanmu? Ku ba naku ba ne, gama an saye ku da tsada. Saboda haka ku ɗaukaka Ubanmu cikin jikinku.