Unao Rwan Ding Balumsa Maknu Nun Meithaan Bi Kainu
Balumsanu rwanna khatna khat ding baze maknu mi nun om chongtok meithaan bi kai beida—haba kamaga braannu ye; baraan thangnu ga saye. Atiga bani om ringriak om chong ga lungkoi lungmaannu le diga mut rwe: bani pum ga Christa om baraan khatle Katha om in gaye, man bina kaleinu, atibriakpina bani pum bina ani Pa ding karungro.
6 1Nani lak pina pakhatna katei khat le kae kana amme dabe, maanna haga Rikrwang om mi nun meithaan bi makka baze maknu mi nun meithaan bi chong kasem lang kaiga sung raang ngamgabo? 2Bathiangnu mi nunna talei ram ding chong kasem thanglune dinu nani theinu makpo? Talei ram ding nanina chong kasem ongnu nun gana, kae kana khon kataknu bing lang nani batik cha maknubo? 3Anina tambaan chonglang rwan ding chong kasemlune dinu nani thei makpo? Ati dabe heiba ringnu om pot bing ga khang inku rwe! 4Atibriakpina nani hadannu kae kana amme dabe, rupkathan bi khatchale bathaang maaknu mi nun ding nanina chong kasemnu rwan toga zong thangnubo? 5Eina heiya nani ding pi kazak lang rinnuwe. Nani lak pi unao rwan lak pi chong kasem lang ningtingnu mi pakhatchale makpo? 6Atiyeda unao pakhatna katei khat ding chongsempuba meithaan bi kaiye, khatle heiya balumsa maknu nun meithaan bi towe! 7Nani khatle khat kae kana amnu heiya nani ding atun batakka ngamlan rwe. Pa-aam langna nanina hakna koi thangnu lou lan mak ngaakpo? Pa-aam langna nanina baraan thangnu lou lan mak ngaakpo? 8Atiyeda nani bapum bahakna hakna towe khatle baraan piye, atiga nani bahak om unao rwan ding le hadanga towe.
9Makka baze maknu nunna ani Pa om krwang talei rakhum lousulaye dinu nani thei makpo? Nani ding pi minam mako: lungkoi lungmaannu mi, ri katha kalumnu mi, rwan mei rwan basan laannu, kapaisa boulaanu, mak tabe kapaisa le katha latnu kapaisa, 10barusanu nun, ra-aamnu nun, mi tweinu nun, zu kalonu nun khatle kasut sanu nun ga le ani Pa om krwang talei rakhum lousu ngamlaye. 11Nani lak pi mi kasem ga hadannu ngaake. Atiyeda nani ga Pukraangba Jisu Christa om meng bi khatle ani Pa om Katha paanna pi sin thang rwe, pi bathiang thang rwe, khatle pi baze thang rwe.
12“Eina balang bingza to lang azanuwe” — atiyeda balang bingza kanaanu make. “Eina balang bingza to lang azanuwe” — atiyeda khatchale Ating karak thanglaye. 13“Thaisaak ga bon lang gaye khatle bon ga thaisaak lang gaye” — atiga ani Pa na barwei ding to braan satlune. Atiyeda pum ga lungkoi lungmaannu lang make; haga Pukraangba lang gaye, khatle Pukraangba ga pum lang gaye. 14Atiga Pukraangba ding ring thou lat thangnu ani Pa na Bating bakung paanna ani ding le ring thou latlune. 15Nani pum bing ga Christa om naat bing gaye dinu nani thei makpo? Ati dabe eina Christa om naat bing ding louluga boulaanu om naat bing toga toro? Hadannu ga to lang makcho! 16Makka tudannu boulaanu le karungnu maan ga baom le pum khatcha to ding gaye dinu nani thei makpo? Balangbe, “Barwei ga pum khatcha to ding gaye” diga hiak thang nge. 17Atiyeda tudannu Pukraangba le karungnu maan ga Baom le katha khatcha gaye.
18Lungkoi lungmaannu bina pak tammo. Mi khatna tonu noh katei bingza pum langkaang la amme, atiyeda lungkoi lungmaannu maan ga bapum bahak chung bi noh towe. 19Makka nani pum ga nani sung bi ongnu, ani Pa khouna nanina lousunu Katha Bathiangnu om kalum in gaye dinu nani thei makpo? Nani ga nani bahak om make, 20balangbe nani ding baman pi luga kaleinu rwe. Atibriakpina nani pum bi ani Pa ding pi lian thang ngo.