1 Corinto 5

5 ¹Adunay balita nga tinuod gayod nga anaay pakighilawas nga malaw-ay diha kaninyo—usa ka matang nga wala gani makaplagi taliwala niadtong wala makaila sa Amahan: usa ka lalaki nga nakigpuyo sa asawa sa iyang amahan. ²Ug mapahitas-on pa kamo! Dili ba angay nga nagbangotan hinuon kamo, aron kuhaon gikan kaninyo ang nagbuhat niini? ³Kay bisan tuod wala ako diha sa lawas apan anaa ako diha sa espiritu, gihukman ko na ang nagbuhat niini, nga daw anaa ako. ⁴Sa diha nga magtigom kamo sa ngalan sa atong Ginoong Jesus, nga anaa ang akong espiritu, uban sa gahom sa atong Ginoong Jesus, ⁵itugyan ninyo kining tawhana ngadto kang Satanas aron laglagon ang unod, aron maluwas ang iyang espiritu sa adlaw sa atong Ginoong Jesus.

⁶Dili maayo ang inyong pagpanghambog. Wala ba kamo masayod nga ang gamay nga igpapatubo motuhop sa tibuok minasa? ⁷Wagtanga ninyo ang daang igpapatubo, aron mahimo kamong bag-ong minasa—maingon nga kamo walay igpapatubo. Kay si Cristo, nga atong nating karnero sa Paskwa, gihalad na. ⁸Busa sauloga nato ang pista, dili pinaagi sa daang igpapatubo, ang igpapatubo sa pagkadaotan ug sa pagkangil-ad, kondili pinaagi sa tinapay nga walay igpapatubo, ang tinapay sa kadalisay ug sa kamatuoran.

⁹Nagsulat ako kaninyo sa akong sulat nga dili kamo makig-uban sa mga tawong malaw-ay ug pagkinabuhi. ¹⁰Dili kini nagpasabot sa mga malaw-ay ug pagkinabuhi niining kalibotana, o sa mga hakog ug sa mga limbongan, o sa mga magsisimba sa mga dios-dios—kay kon mao pa, kinahanglan unta nga biyaan ninyo ang kalibotan. ¹¹Apan nagsulat ako kaninyo nga dili kamo makig-uban kang bisan kinsa nga nag-angkon nga igsoon apan malaw-ay ug pagkinabuhi, o hakog, o magsisimba sa mga dios-dios, o tigpasipala, o palahubog, o limbongan. Sa maong tawo ayaw gani kamo pagpakigkaon. ¹²Nganong hukman ko man ang mga anaa sa gawas sa iglesia? Dili ba kamo ang maghukom sa mga anaa sa sulod? ¹³Ang atong Amahan maoy maghukom sa mga anaa sa gawas. “Papahawaa ninyo ang tawong daotan gikan kaninyo.”