Watheti wa Khoditu 5 FHB Father's Heart Bible™

5 ¹Kyedika, mbongi yisi samuna hana kati dya benu, mbongi ya mutindu wuna wumonikaku ata hana kati dya batu bana bázayaku Tata: yakala mosi kenina yi mukhetu wa tata wandi. ²Amana benu lwenina bakwa lulendu! Aketi bulungiki ni lwasya khondu, ndangu wuna wáhanga mambu mama kakatuka hana kati dya benu? ³Mukuma, ho kyana yenina mu kimutu, kaasi yenina mu kitembu, yifundisi kedi wuna wáhanga mambu mama, hanga ni yenina ha kati dya benu. ⁴Tangwa lwisi kutakana muna khumbu ya Pfumu wetu Yesu, kitembu kyama kina hakimosi yi benu, ni lulendu lwa Pfumu wetu Yesu, ⁵luhekenu mutu wawu kwena Satana hanga lutu lwandi lwafwa, ndangu kitembu kyandi kyahuluka muna kilumbu kya Pfumu wetu Yesu.

⁶Kuditsikisa kwenu kwisi bukheti ku. Luzayiku ni muvimbu wa khunda wisi thutumuna kithoba kyosu? ⁷Katulenu muvimbu wa khulu, ndangu lwakala kithoba kya pha—bwosu lwenina makonda muvimbu. Mukuma Kidisitu, Mwana wa mukoku wetu wa Phaki, bátambika kedi. ⁸Buna, tutenu mukinzi, ka ni muvimbu wa khulu ku, muvimbu wa khu yi mambu ma mbi, kaasi ni mapha makonda muvimbu ma bukheti yi kyedika.

⁹Yálusonikina muna mukanda wama ni lukadikasaku yi batu ba mbongi. ¹⁰Ka mu kuzimbula batu ba mbongi ba tsi yayi ku, holo bakwa lukusu yi bamangusi, holo bisi fukamina biteki—mukuma, buna, bulungiki ni lwakatuka mu tsi. ¹¹Kaasi, bwabu, yílusonikina ni lukadikasaku yi mutu wuna wisi zonza ni yandi kenina phangi, kaasi kenina mutu wa mbongi, holo mukwa lukusu, holo wisi fukamina biteki, holo nzonzidi yambi, holo kinwa malafu, holo mangusi. Yi mutu wa mutindu wuna, lubingamanaku ata mu kudya yi yandi. ¹²Kikuma kya biki yifweti fundisa bana ba ku phenza ya Dibundu? Aketi benu lufweti fundisa bana ba mu kati? ¹³Tata wetu wisi fundisa bana ba ku phenza. «Katulenu mutu wa mbi hana kati dya benu.»