Mang Haapla Üangbü Chempen
Müt cheei haoeibü bou yak yoa yepda, hoba lashongei kho damentibü aoa liliko kia. Paulei lauda, haoen manga kikei tegüje, hoba ho müt kho Satan to khümbo kuashi, khünei haoeibü soushou khümenlabü. Lubü tokai sungan apjan; phangto kibü shuong matjembü kho haoeneibü kümsilei ki, seneibü Bouei khünyua kibü shuong matjemda.
5 1Maimaitham kan yoa pejapela kibü ditda—kho tegü Bou angebü shuong yoakei ühüpbü che: müt cheei haoeibü bou yak lea. 2Hoba kan sekokbü ki! Ho kümbou kho kan yoa ka wapan apla shanga, kanei aeiko mang haplep aying lo? 3Aishanga ngo manga akisikei soushoua kia; ngo khünei kibü tegü, ho kümbou kho matjemsüha. 4Kanei seneibü Bunyubou Jisu nyena kamshaian, ngeibü soushou yoan, seneibü Bunyubou Jisu seiei, 5phe mautila shanga, ho müt kho Satan ik to khümbo kuashi, khünei haoeibü soushou seneibü Bunyubou Jisu chaloua khümenlabü.
6Kaneibü lenenbü maibü aying. Tokai shisho cheei wen pendou phangto khombuda dogo kanei anglep aying lo? 7Kan wen haanbü che kila shanga, lubü tokai sungan apbushi—kan tokai ajinbü kibü tegü. Aishanga seneibü Püetbü sanlon Khrista lemla haitia. 8Kheijinei senei lem liakho; lubü tokaiei aying, kho maangsha maangkok hoba amaibü tokai ki, lausikei himjama hoba ngühmai tokai ajinbü wentekei liakho.
9Ngei kü lea kan jungto, pejapela kümbü shuong yoa teyoa dogo dokei. 10Ho kaodak pejapela kümbü shuong, ayingsi aeilam aeiphopbü hoba jukbüsabü, ayingsi heangsho lembü shuong to tetlabü aying; khülonga kanei kaodak ka longngaijan kilabü. 11Lausikei tou ngei kan jungto doda; jaisina che ki dogo lenbou lausikei pejapela kümbou, ayingsi aeilam aeiphopbü, ayingsi heangsho lembü, ayingsi lilisese, ayingsi ihei jaketbü, ayingsi jukbüsabü kho tegübü müt yoa teyoa dogo doda. Kho tegübü müt yoa shau ongkei teyung. 12Lashong koukhüna kibü shuong ngei aila matjemla? Maanga kibü shuong kanei matjemla aying lo? 13Lashong koukhüna kibü shuong kho seneibü Bouei matjemda. “Amaibü müt kho kan yoa ka wapan apjan.”
