1 Corinthnao 5

5 ¹Nathumwui ngachaili maningakha khamathang-khamarang lei da pao kashā samphanga. Chikathā khamathang-khamarang chiya Avāli makatheiabingwui ngachaili eina tangda matheipaimara: mi akhana awui avāwui preiva̱li ngavai. ²Kha nathum hiklaka! Hi kasā mi chi nathumwui ngachai eina horhaikasā khavai, nathumna chapngachā mamashungmala? ³Khikhalajila iwui phasāli mangasopamsālala manglāli ngasopamda, ina samkaphanglila thada hi kasā mi chili arui bichar sāhaira. ⁴Nathumna ithumwui Proho Jishuwui ming eina rākazip tharan, imanglā ngasopamda, ithumwui Proho Jishuwui pangshap eina, ⁵aphasāli sāshimān khavai hi mipa chi Satanwui pāngli horsanglu; chithākha awui manglā chi ithumwui Proho Jishuwui zimiksholi kahui samphangra.

⁶Nathumwui langkaso chi mamashungmana. Khawok kateokhana khamui khongsaikhali kapchung ngasaka da nathum matheimalā? ⁷Khawok kachā chi horhaolu, chithākha nathum khamui kadhar onra, kaja nathum khawok makazangana. Khikhalajila ithumwui Makānkhami yaonao Khrista taithat kahaira. ⁸Chiwui vang eina khawok kachā, makaphā kala makhayāwui khawok eina maningla, kha ningkathar kala khamashungwui khawok makazang khamui eina ithumna phanit chi mayonsa.

⁹Shāmkasābingli mangasoalu da ina iwui chithi eina nathumli kapihaira. ¹⁰Chi okathui hiwui shāmkasābing, lah kākharāmbing kala khaleekasa̱bing, lah meoma̱li khokharumbing pongli maningmana. Chithā jisi kaja nathum okathuiwui eina shokphalungra. ¹¹Kha aruila ina nathumli kagapina: chinaongarā da khahongaipaisālala shāmkasā, lah kākharāma, lah meoma̱li khokharuma, lah mashātkazar, lah khamaripa, lah khaleekasa̱ khalei mi chili mangasoalu; chikathā mi eina tangda phazā masaalu. ¹²Khisāda ina church ayarli khalei mibingli bichar sākhala? Alungli khalei mibingli nathumna bichar masāmarala? ¹³Ayarli khalei mibingli ithumwui Avāna bichar sāra. "Makaphā mi chi nathumwui ngachai eina kashamshoklu."