哥林多前書 5

5 ¹聽聞喺你哋中間竟然有淫亂嘅事,連唔識天父嘅人當中都搵唔到咁樣嘅事:居然有人同自己父親嘅妻子同居。 ²你哋仲要咁自高自大!你哋唔係應該為呢件事哀慟,將做呢件事嘅人趕出你哋中間咩? ³我雖然身體唔喺你哋度,但係心靈同你哋一齊,已經好似親身喺場咁,審判咗做呢件事嘅人。 ⁴當你哋奉我哋主耶穌嘅名聚集嘅時候,我嘅心靈同你哋一齊,靠住我哋主耶穌嘅權能, ⁵就要將呢個人交畀撒但,敗壞佢嘅肉體,好等佢嘅靈喺我哋主耶穌嘅日子可以得救。

⁶你哋咁樣自誇並唔好。你哋唔知道少少酵就會令成團麵發起嚟咩? ⁷你哋要除淨舊酵,好等你哋成為新團麵——正如你哋本來就係無酵嘅。因為基督,我哋逾越節嘅羔羊,已經被獻上做祭牲喇。 ⁸所以我哋守呢個節,唔好用舊酵,唔好用惡毒同邪惡嘅酵,只用真誠同真理嘅無酵餅。

⁹我喺信入面寫過畀你哋,叫你哋唔好同淫亂嘅人來往。 ¹⁰我唔係話呢個世界上淫亂嘅人,或者貪心嘅人、詐騙嘅人,又或者拜偶像嘅人;若係咁,你哋就要離開呢個世界喇。 ¹¹但係我而家寫畀你哋,係叫你哋唔好同任何自稱係弟兄姊妹、但係卻淫亂、貪心、拜偶像、毀謗人、醉酒、或者詐騙嘅人來往;同呢種人,連飯都唔好一齊食。 ¹²審判教會以外嘅人,同我有咩相干呢?你哋唔係應該審判教會以內嘅人咩? ¹³教會以外嘅人,自有我哋嘅父審判。「你哋要將那惡人從你哋中間趕出去。」