1 Ndị Kọrint 5 FHB Father's Heart Bible™

5 ¹Nʼezie, a na-akọ akụkọ banyere ịkwa iko nʼetiti unu—ụdị nke a na-adịghị ahụ ọbụladị nʼetiti ndị na-amaghị Nna: nwoke lụụrụ nwunye nna ya. ²Ma unu na-ebuli onwe unu elu! Ọ bụghị iru ụjụ ka unu kwesịrị iru kama, ka ewezuga onye mere ihe a site nʼetiti unu? ³Nʼihi na ọ bụ ezie na anọghị m nʼahụ ma anọ m nʼime mmụọ, ekpeelarị m onye mere ihe a ikpe, dịka a ga-asị na anọ m nʼebe ahụ. ⁴Mgbe unu zukọrọ nʼaha Onyenwe anyị Jisọs, mmụọ m nọnyeere unu, tinyere ike nke Onyenwe anyị Jisọs, ⁵werenụ nwoke a nyefee Ekwensu ka e bibie anụ ahụ ya, ka a zọpụta mmụọ ya nʼụbọchị nke Onyenwe anyị Jisọs.

⁶Ịnya isi unu adịghị mma. Ọ bụ na unu amaghị na ntakịrị ihe na-eko achịcha na-eme ka ogbe achịcha niile koo? ⁷Wezuganụ ihe na-eko achịcha ochie ahụ, ka unu wee bụrụ ogbe ọhụrụ—dịka unu si dị na-enweghị ihe na-eko achịcha. Nʼihi na e jirila Kraịst, bụ nwa atụrụ anyị nke Mmemme Ngabiga, chụọ àjà. ⁸Ya mere, ka anyị mee mmemme ahụ, ọ bụghị site nʼihe na-eko achịcha ochie, bụ ihe na-eko achịcha nke obi ọjọọ na ihe ọjọọ, kama site nʼachịcha na-ekoghị eko nke ezi obi na eziokwu.

⁹Edere m unu nʼakwụkwọ ozi m ka unu ghara iso ndị na-akwa iko na-emekọrịta ihe. ¹⁰Ọ bụghị ma ọlị ndị na-akwa iko nke ụwa a ka m na-ekwu, ma ọ bụ ndị anyaukwu na ndị aghụghọ, ma ọ bụ ndị na-efe arụsị—ebe ọ bụ na mgbe ahụ unu gaara aghaghị ịhapụ ụwa. ¹¹Ma ana m edere unu ugbu a ka unu ghara iso onye ọbụla na-akpọ onwe ya nwanne, mana ọ na-akwa iko, ma ọ bụ onye anyaukwu, ma ọ bụ onye na-efe arụsị, ma ọ bụ onye nkwutọ, ma ọ bụ onye aṅụ mmanya na-egbu egbu, ma ọ bụ onye aghụghọ, na-emekọrịta ihe. Unu na ụdị onye ahụ erikọla ọbụladị nri ọnụ. ¹²Gịnị mere m ga-eji kpee ndị nọ nʼèzí nke ụka ikpe? Ọ bụ na unu ekwesịghị ikpe ndị nọ nʼime ya ikpe? ¹³Nna anyị na-ekpe ndị nọ nʼèzí ikpe. “Sitenụ nʼetiti unu chụpụ onye ajọ omume ahụ.”